Kutshinyi to!

1. Mmu mushindu kayi mutudi katuyi ‘tupala bantu tshintu tshimpe’?

¹ Patudi tuyisha bantu ba mu teritware wetu lumu luimpe lua Bukalenge bua Nzambi ne tshisumi, katuena ‘tubapala tshintu tshimpe.’ (Nsu. 3:27) Kakuena lumu luimpe lutudi mua kuambila bantu ludi lupite lua nsombelu wikalaku mu Bukalenge bua Nzambi to. Nansha tuetu tuyisha bantu misangu yonso idi mpunga umueneka anyi tuabanya mikanda, tudi ne bua kudifundila tshipatshila tshia kutuadija kulonga Bible nansha ne muntu umue.

2. Ntshinyi tshidi mua kutupangisha bua kutuadija kulonga Bible ne bantu?

² Imue misangu, bualu budi butupangisha bua kulonga Bible ne bantu mmushindu utudi tumona mudimu eu. Bamue bamanyishi badi batshina bua kulonga Bible ne bantu bualu badi badiumvua kabayi bakumbane anyi bualu kabena ne dîba. Mibelu idi ilonda eyi idi mua kutuambuluisha bua katuikadi tutshina bua kulonga Bible ne bantu.​—Mat. 28:19; Bien. 20:20.

3. Bua tshinyi tudi bakumbane bua kulongesha Bible?

³ Tuetu tudimona katuyi bakumbane: Tudi mua kudimona katuyi bakumbane bua kulonga Bible ne bantu bualu katuena balonge tulasa tua bungi anyi bua bualu bukuabu. Kadi vuluka ne: bena Kristo bavua bayisha bimpe mu bidimu lukama bia kumpala kabavua “bamanye mikanda” to. Ntshinyi tshivua tshibambuluisha bua kulongesha bakuabu bulelela? ‘Bavua ne Yezu.’ (Bien. 4:13) Bavua bidikija Mulongeshi Munene Yezu. Tudi ne malongesha ende ne mishindu yende ya dilongesha mu Bible. Nansha tuetu katuyi balonge bikole, tudi tulonga malu a Nzambi atudi katuyi mua kufuanyikija ne makuabu a tshianana to.​—Yesh. 50:4; 2 Kol. 3:5.

4. Tshilejilu tshia Amosa tshidi tshitulongesha tshinyi?

⁴ Yehowa uvua imue misangu utuma baprofete bua kuambila bantu bavua ne mianzu minene bilema biabu. Bamue ba kudibu bu mudi Amosa bavua bantu bashadile. Amosa wakamba ne: “tshiena muprofete, ne tshiena muana wa muprofete; kadi ndi mulami wa bimuna ne musangishi wa tumuma tua mitshi ya sycomore.” (Amo. 7:14) Nansha nanku, Amosa kakatshina bua kuambila muakuidi Amasaya uvua mutendeledi wa kana ka ngombe mukenji wa dilumbuluisha dia Yehowa to. (Amo. 7:16, 17) Katupu muoyo ne: mudimu utudi tuenza ngua Nzambi ne yeye neenze bua tuikale bakumbane bua kuwenza.​—2 Tim. 3:17.

5. Bua tshinyi tudi ne bua kudienzeja bua kulonga Bible ne bantu nansha tuetu katuyi ne dîba?

⁵ Tuetu katuyi ne dîba: Nansha wewe ne bia bungi bia kuenza, ukadi mudifundile dîba dia kuyisha pa tshibidilu. Kulonga Bible ne bantu mbumue bua ku malu adi atupetesha disanka mu mudimu wa buambi. Kumona mudi Dîyi dia Yehowa dilengeja nsombelu wa bantu ndiakalenga dinene be! (Eb. 4:12) Yehowa udi usanka padiye utumona tudipangisha amue malu bua kuambuluisha bantu bua “bafike ku dimanya dia malu malelela.” (1 Tim. 2:4) Nansha banjelu batu basanka bikole padibu bamona muntu ukudimuna mutshima wende ne utuadija kutendelela Yehowa.​—Luka 15:10.

6. Ndiakalenga kayi ditudi nadi mu dikumbaja disua dia Nzambi?

⁶ Nzambi ‘mmusue bantu bonso basungidibue, bafike ku dimanya dia malu malelela.’ (1 Tim. 2:4) Tudi ne diakalenga dinene dia kuenza mudimu udi wambuluisha bua disua dia Nzambi edi kukumbanadi. Nunku katutshinyi bua kulonga Bible ne bantu to.