Ukadi mumanye tshiwasungula anyi?

Bungi bua mpitadi idi ipanda bantu kakuyi dibela mashi budi buenda anu buvula pa buloba bujima. Ukadi mumanyaku mishindu mishilashilangane ya luondapu idiku mpindieu idi muntu mua kusungula ya kabayi bamuela mashi anyi? Mbimpe wewe kuyimanya bua se: wamanya tshimpe tshia kusungula ne meji onso dîba dia kukuondopabu anyi kukupandabu. Bandila bande anyi ditadi dia Pas de sang: la médecine relève le défi. Pashishe usambile bua kukonkonona biudi mumone ku diambuluisha dia nkonko idi kuinshi eku.​—Wamanya ne: Bu mudi bindidimbi bidimu bikale ne bitupa bia bapanda bantu, baledi bikale ne budimu padibu babibandila ne bana batekete.

(1) Mbualu kayi bunene butu Bantemu ba Yehowa babengela bua kubelabu mashi? (2) Ntshinyi tshitu Bantemu ba Yehowa bajinga padibi bikengela kudiondapisha? (3) Mbukenji kayi budi nabu mubedi yonso padibu basua kumuondopa? (4) Bua tshinyi kusungula ngondapilu ya kabayi bakuela mashi ki mbutatakane anyi kulengulula kua muoyo webe? (5) Padi mashi mapite bungi apatuka, mmalu kayi manene abidi adi baminganga ne bua kuanji kuenza kumpalampala? (6) Mmalu manene kayi anayi atu akengedibua bua kuondopa anyi kupanda muntu bimpe kakuyi dimuela mashi? (7) Mmushindu kayi udi badoktere mua (a) kukepesha bungi bua mashi adi aya panshi, (b) kulobelela bungi bua tubulu tua mashi (anyi globile mikunze), (c) kuvudija mashi mu mubidi, ne (d) kuenza bua kubenga kujimija mashi adi apatuka mu mubidi wa muntu? (8) Umvuija ngondapilu udibu babikila ne: (a) diengulula dia mashi (hémodilution) ne wa (b) dibenga kujimija mashi adi apatuka mu mubidi wa muntu. (9) Ntshinyi tshiudi ne bua kumanya pa bidi bitangila nguondapilu yonso udibu mua kukuondopa nende wa kabayi bakuela mashi? (10) Muntu udi bamunganga kabayi mua kupanda bipepele badiku mua kumupanda kabayi bamuele mashi anyi? (11) Mbualu kayi buimpe budi baminganga benda benza mu malu a diondopangana matuku etu aa?

Kuitaba imue ya ku mishindu ya diondopangana idibu baleje mu bande eu (anyi ditadi edi) mbualu bua muntu kudisunguilaye nkayende bilondeshile kondo kende ka muoyo kalongesha ne Bible. Ukadi mudisunguile mushindu wa luondapu uudi umona muimpe buebe wewe ne bua bana bebe ne muuje kalata ka Instructions médicales (DPA) anyi? Bua kumanya malu a bungi pa bualu ebu, balulula bimpe “Nkonko ya babadi” mu Tshibumba tshia Nsentedi tshia dia 15 Kabalashipu 2004 ne tshia dia 15 Kasuamansense 2000. Pashishe, bua wewe nkayebe kusungula luondapu luwitaba anyi luwabenga, bala malu adi mu tuzubu mu tshisakidila tshia Mudimu wetu wa Bukalenge wa Kasuabanga 2006 tshidi tshiamba ne: “Tshingenza ntshinyi pikalabu bakeba kungela tuntu tukese tua mu mashi anyi bakeba kungondapa ne ngondapilu idi ilomba mashi anyi meme muine?” Ku ndekelu, ufunde malu audi mudisunguile au bimpe mu kalata kebe ka Instructions médicales (DPA). Udi ne bua kumvuija baminganga baudi musungule bua kukuondopa ne balele bebe badi kabayi Bantemu nguondapilu uudi mudisunguile bua bakuondope.

[Kazubu mu dibeji 3]

• Ukadi mudisunguile mushindu wa luondapu uudi umona muimpe buebe wewe ne bua bana bebe anyi?

• Utu wendaku ne kalata kebe ka Instructions médicales (DPA) kuwuja bimpe bua kudimukila njiwu anyi?