Mua kuyisha bimpe mu njila
1. Tudi mua kuidikija Yezu mu mushindu kayi?
1 Patshivua Yezu pa buloba, kavua welakana bua kuyisha bantu bavuaye upetangana nabu mu njila anyi miaba mikuabu ivuabu to. (Luka 9:57-61; Yone 4:7) Uvua musue kuyisha mukenji wende wa mushinga mukole kudi bantu ba bungi menemene. Lelu eu, kuyisha mu njila mmushindu muimpe mutambe wa kuambuluisha bantu bua kupeta meji a Nzambi. (Nsu. 1:20) Tuetu tuya kudi bantu ne bikale kabidi ne dijingulula dia mianda, netupete bipeta bimpe.
2. Leja bua tshinyi tudi ne bua kuya kudi bantu patudi tuyisha mu njila.
2 Uye kudi bantu: Bitu nangananga bimpe bua kuya kudi bantu bua kuyikila nabu pamutu pa kushala muimane anyi musombe anu muaba umue bua bapitshi ba njila kulua kuudi. Fukisha mimuemue, tangila muntu, ikala mutukije, ikala bu mulunda wende. Panuikala nuyisha ne bamanyishi bakuabu, mbimpe yonso wa kunudi aye kudi wende muntu, pamutu pa nuenu bonso kuya kudi muntu umue. Udienzeje bua kulua kuyikila kabidi ne muntu yonso udi wanyisha bulelela. Nanku mbimpe panudi nujikija kuyikila, webeje muntu ne dîyi dimpe bua mushindu wa kuyikila nende kabidi. Bamue bamanyishi batu bayisha mu njila anu muaba umue umue bualu bitu bibambuluisha bua kupetangana ne bantu bamue bamue bua kubayisha misangu ya bungi.
3. Patudi tuyisha mu njila, mmunyi mutudi mua kuleja disunguluja dia mianda?
3 Ikala ne disunguluja dia mianda: Ikala wela meji bimpe bua kusungula muaba wa kuimanyina mu njila ne kabidi bantu ba kuyikila nabu. Kabiena bikengela kuyikila amu ne bantu bonso to. Ikala utangila. Tshilejilu, padi muntu uya lukasa, mbimpe umulekele apite ne njila wende. Paudi uyisha muaba udibu bapanyina bintu, mbimpe kuikala ne budimu bua kubenga kutatshisha bapanyishi ba bintu. Nanku bitu bimpe kuyisha bantu badi bapatuka mu makazen pamutu pa kubayisha padibu babuelamu. Uye kudi muntu mu mushindu udi kawuyi mua kumutshingisha anyi kumupapuisha to. Ikala ne busunguluji paudi ufila mikanda. Padi muntu kayi musue kukuteleja bimpe, udi mua kumupesha trakte pamutu pa tshibejibeji.
4. Kuyisha mu njila nkuimpe bua tshinyi?
4 Kuyisha mu njila kudi kutuambuluisha bua kukuna ntete ya bulelela ya bungi mu mêba makese. (Muam. 11:6) Bamue bantu mene batudi tupeta mu njila, ngaba batudi katuyi mua kupeta patudi tuyisha ku nzubu ne ku nzubu to. Kuenaku mua kulomba bamanyishi bakuabu bua kuenza nabu mudimu mulenga wa kuyisha mu njila eu anyi?