Top left: Marek M. Berezowski/Anadolu Agency via Getty Images; bottom left: Halfpoint Images/Moment via Getty Images; center: Zhai Yujia/China News Service/VCG via Getty Images; top right: Ismail Sen/Anadolu Agency via Getty Images; bottom right: E+/taseffski/via Getty Images
NUSHALE BATABALE!
Tshidimu tshia 2023 ntshidimu tshia tunyinganyinga—Ntshinyi tshidi Bible wamba?
Malu a bungi adi menzeke mu tshidimu tshia 2023 adi aleja ne: tudi mu matuku adi Bible ubikila ne: “matuku a ku nshikidilu.” (2 Timote 3:1) Mona mudi malu adi enzeka lelu apetangana ne akavua Bible muambe ne: neenzeke matuku etu aa.
Bible ne malu adi enzeka pa buloba bujima
“Mvita ne ngumu ya mvita.”—Matayi 24:6.
“Malu a tshikisu mmavule bikole mu matunga a bungi pa buloba.”a
Tangila tshiena-bualu tshia “Nganyi wasungila bantu badi kabayi basalayi?” ne tshia “Makuta adibu batule bua basalayi pa buloba bujima mmapite pa ndola miliyare binunu 2.”
“Buloba nebukanke ku muaba ne ku muaba.”—Mâko 13:8.
“Katshia tshidimu tshia 2023 tshiatuadija, nkuenzeke dikanka dia buloba dibi menemene misangu 13 pa buloba bujima; etshi ke tshidimu tshia kumpala tshidi dikanka dia buloba dienzeke misangu ya bungi.”b
Tangila tshiena-buala tshia “Dikanka dibi dia buloba ndienzeke mu Turquie ne mu Syrie.”
“Malu adi akuatshisha buôwa.”—Luka 21:11.
“Tshikondo tshia luya lukole tshiajiki; kadi tshikondo tshia midilu ituka mu metu tshiatuadiji.”—António Guterres, sekretere generale wa Nations Unis.c
Tangila tshiena-bualu tshia “Dibanda dibi dia luya pa buloba bujima mu muvu wa luya mu 2023.”
“Biyole bia nzala.”—Matayi 24:7.
“2023: Ntshidimu tshikuabu tshia ntatu mikole bua badi batata bua kudisha bena mu mêku abu.”d
Tangila tshiena-bualu tshia “Biyole bia nzala pa buloba bujima bikebesha kudi mvita ne dinyanguka dia malu a mivu.”
“Bikondo bia malu makole bidi bikole mua kupita nab.”—2 Timote 3:1.
“Muntu umue pa bantu muanda mukulu udi ne lutatu lua disamisha mutu.”e
Tangila tshiena-bualu tshia “Divulangana dia masama a mitu mu bana ba bitende.”
Tutekemena tshinyi bua tshidimu tshia 2024?
Muntu nansha umue ki mmumanye tshienzeke mu 2024 to. Kadi malu adi enzeka pa buloba adi aleja ne: Bukalenge bua Nzambi (anyi mbulamatadi wa mu diulu) nebupingane pa makalenge a bana ba bantu ne nebujikije malu onso adi akebesha ntatu ne tunyinganyinga.—Danyele 2:44; Buakabuluibua 21:4.
Kadi bua mpindieu, tulombe diambuluisha kudi Nzambi patudi ne tunyinganyinga. Bible udi wamba ne:
“Pandi ne buôwa, ndi nkueyemena wewe.”—Misambu 56:3.
Mmunyi mutudi mua kuleja ne: tudi beyemene Nzambi? Tudi tukulomba bua kulonga milayi ya mu Bible idi itangila matuku atshilualua ikala dikenga kaditshiyiku. Itaba dilonga dia Bible dia nuenda nuyukila kuyi ufuta makuta, bua kumona muudi wewe ne bena mu dîku dienu mua kupeta masanka adi afumina ku milayi ya mu Bible.
a Ministère des Affaires étrangères, “Buloba budi mu mvita: Ntshinyi tshidi tshikebesha malu a tshikisu pa buloba bujima nunku?” kudi Emma Beals ne Peter Salisbury, 30/10/2023.
b Nouvelles sur les tremblements de terre, “Tshidimu tshia 2023: bungi bua dikanka dia buloba mbuvule bikole,” ngondo 5 wa 2023.
c Nations Unis, “Sekretere generale wakula bua mivu mu tshisangilu ne bakamona kamba,” 27/7/2023.
d Programme alimentaire mondial, “Biyole bia nzala pa buloba bujima.”
e Bulongolodi budi butangila malu a makanda a mubidi pa buloba, “Dituku dia bena masama a mitu pa buloba bujima mu 2023,” 10/10/2023.