Nkonko ya babadi

Tuakasankidila bikole dilonga dia milayi ya Danyele bu mudiyi mikonkonona mu “Tshibumba tshia Nsentedi.” Kadi, bua tshinyi, matuku a bikondo bisatu ne tshitupa bia Buakabuluibua 11:3 mmashilangane ne adi mu mukanda wa “Révélation​—dénouement”?

Eyowa, Tshibumba tshia Nsentedi tshia dia 1 Kasuabanga 1993, tshiakasakidila dijadika dikese ku tshikondo tshia dikumbana dia Buakabuluibua 11:3 dia matuku etu aa. Mbua tshinyi?

Tuanjibi kutangila mu Buakabuluibua 11:2, udi ku ndekelu kuende utela “ngondo makumi anayi ne ibidi.” Tudi tutungunuka mu mvese 3: “Nempe bamanyishi banyi babidi bukole, ne nebambe dî dia Nzambi matuku tshinunu ne nkama ibidi ne makumi asambombo, baluatshisha bilulu bia miosa.” Biakakumbana munkatshi mua tshikondo kayi?

Eyowa, katshia ku kale Bantemu ba Yehowa mbajingulule ne: mulayi eu wakakumbana ne bena nkristo bela manyi a mu nyuma kunyima kua ndekelu wa “bikondo bijadika bia matunga” (Bikondo bia matunga a bende) mu 1914. (Luka 21:24; 2 Kolinto 1:21, 22) Pa kumvuija bualu ebu, mukanda wa Révélation​—le grand dénouement est proche!a (1988) udi wamba mu dibeji dia 164 ne: “Kuvua tshikondo kampanda tshijadika tshia bidimu bisatu ne tshitupa, tshivua basadidi ba Nzambi bapetangane ne makenga akakumbanangana ne mianda mimanyisha apa mu mulayi​—tshikondo etshi tshiakatuadija ne dibudika dia Mvita ya Kumpala ya buloba bujima pabuipi ne ndekelu wa 1914, kulungulukatshi too ne ku ntuadijilu wa 1918.”

Mona ne: tshikondo tshifila “ndibudika dia Mvita ya Kumpala ya buloba bujima pabuipi ne ndekelu wa 1914 [too ne ku] ntuadijilu wa 1918.” Bidi bikumbanangane ne matuku maleja pa tshibidilu, bu mudibi mu mukanda wa “Alors sera consommé le mystère de Dieu,” mabeji a 281-283, (1969).b

Kadi, Tshibumba tshia Nsentedi tshiakashindamena pa milayi idi mu Danyele, mukanda udi misangu ibidi utela tshikondo tshifuanangane ne tshidi tshitela ku shòò mu Buakabuluibua​—Bidimu bisatu ne tshitupa, anyi ngondo 42. Bua kubisunguluja, Danyele 7:25 udi wamba ne: bansantu ba Nzambi bavua ne bua kubundibua “tô ne hahita tshikondo tshimue, bikondo bibidi ne tshituha tshia tshikondo,” anyi bikondo bisatu ne tshitupa. Ku shòò, Danyele 12:7 udi ulaya “tshikondo [tshijadika, NW] tshimue, bikondo [bijadika, NW] bibidi ne tshituha tshia tshikondo [tshijadika, NW],” anyi bikondo bisatu ne tshitupa bijadika, biafika ku nkomenu “hamanabo kutekesha bukole bua [bansantu, NW].”

Nunku tudi ne milayi idi itangila tshikondo tshiakanangane mu Danyele 7:25, Danyele 12:7, ne Buakabuluibua 11:2, 3, bia muomumue ne mu Buakabuluibua 13:5. Mikanda yetu yakaleja ne: yonso eyi yakakumbana munkatshi mua tshikondo tshituadijile mu 1914 too ne mu 1918. Kadi pa kukonkonona milayi eyi umue ku umue, matuku a ntuadijilu ne ndekelu akashilangana kakese.

Kadi, Tshibumba tshia Nsentedi tshia dia 1 Kasuabanga 1993, tshiakebeja ne: “Mmunyi muakakumbana milayi mifuanangane eyi?” Eyowa, milayi ya bikondo bisatu ne tshitupa mitela mu Danyele 7:25, Danyele 12:7, ne mu Buakabuluibua 11:3 yakajinguludibua bu “milayi mifuanangane.” Nunku, ntuadijilu ne ndekelu wayi bidi ne bua kuikala mu diumvuangana.

Pa bidi bitangila ndekelu, tshibejibeji [tshietu] tshiakaleja mushindu wakafika dibundibua dia bela manyi a mu nyuma ba Nzambi ku nkomenu (Danyele 7:25) mu Kabalashipu 1918 pakafundilabo J. F. Rutherford ne ba-direktere bakuabo ba Watch Tower Bible and Tract Society “tshibawu tshikole tshia [buloko bua tshikondo tshile], bua mabandu a dishima.” Bualu ebu kakuyi mpata buvua ‘nkomenu wa ditekeshibua dia bukole bua [bansantu, NW],’ anu bu mudibi mu Danyele 12:7.

Pa kubadika tshianyima bituadijile ku Kabalashipu 1918 tudi tufika ku Tshisua-Munene 1914 bua ntuadijilu wa bikondo bisatu ne tshitupa. Mu ngondo awu wa ndekelu wa 1914, bela manyi a mu nyuma ba Nzambi pa buloba bakalonga tshiena-bualu tshia mvese ya tshidimu tshivua tshilonda: “‘Udi mua kunua lupanza luanyi anyi?’​—Matayo 20:20-23” Tshibejibeji tshivua tshimanyisha didimuija dia tshiena-bualu esthi tshiakamba ne: “Nganyipu udi mumanye bikalaku diteta kampanda disunguluke: lupanza lua dikenga ne dipetudibua, bua balondi ba Mukoko balamatshi ba ku mikenji mu 1915!” Anu bu muakalaya Danyele 7:25 bua tshikondo etshi tshia bikondo bisatu ne tshitupa, ‘dibundibua dia bansantu ba Eu Mutambe Bunene diakatuadija ne diakatungunuka kabidi.’ Matunga akadibuejakaja mu Mvita ya Kumpala ya pa buloba bujima, nunku biakapepela bua kubabundawu kakuyi bualu. Nkomenu udi se: Milayi yonso isatu eyi mifuanangane​—Danyele 7:25, 12:7, ne Buakabuluibua 11:3—​yakakumbana mu bidimu bisatu ne tshitupa, anyi ngondo 42, bituadijile ku Tshisua-munene 1914 too ne ku Kabalashipu 1918.

Ebi bidi biumvuija disakidila dia dijadika dikese ku tshikondo tshia dikumbana dia Buakabuluibua 11:3. Dijadika edi ndiakulama mu lungenyi patudi tulonga ne patudi tutumika ne mukanda wa Révélation​—dénouement! matuku alua.

[Mêyi adi kuinshi]