Tshibumba tshia Nsentedi ne Réveillez-vous!: Bibejibeji bikumbanyine tshikondo tshietu etshi tshikole

¹ Mu diumvuangana ne milayi ya mu Bible, malu mapampakaji adi enzeka pa buloba bujima! Patudi tumona malu adi apitakana ku luseke luetu, munda anyi pambelu pa bulongolodi bua teokrasi, tudi tujadika se: bidi bikengela kuamba “lumu luimpe” lua Bukalenge pa lukasa. (Mâko 13:10) Ebi bidi bitusaka bua kutungunuka ne mudimu wetu ne mitalu mu ngondo wa Kasuamansense.

² Mudimu wetu mu ngondo eu udi uzangika mushinga wa dimanyisha dietu. Tudi mua kutungunuka ne diabanya dia Ngumu ya Bukalenge dituvua batuadije mu Tshisanga ne Lumungulu. Bua kusonsolola musangelu wetu ku mudimu eu ne kujudija dijinga dia kumanya bia bungi kudi bantu mu teritware wetu, Tshibumba tshia Nsentedi ne Réveillez-vous! nebipatule biena-bualu biakanyine biazangika mushinga wa diumvuija didi milayi ifila pa dikondakana dia malu pa buloba bujima. Mmushindu kayi uudi mua kulongolola dileja diasonsola dijinga dia kumanya bia bungi ku bibejibeji?

³ Dileja diebe nedikale ditue bushuwa biwalonda malu aa a nshindamenu: 1) Usungule mu tshibejibeji tshiena-bualu tshidi mua kulenga mutshima wa bena mu teritware webe. 2) Usunguluje mu tshiena-bualu etshi lungenyi lumue anyi mvese uwudi mumone se: udi mua kusonsolola dijinga dia kumanya bia bungi kudi mukuteleji. 3) Ulongolole mbuelelu muipi muikale ne diela muoyo dia bulunda, lukonko anyi tshiambilu tshidi tshizangika lungennyi kampanda lusankishi lua mu Bible, ne dilomba dia musangelu bua kuanyisha bibejibeji. Anu muudi mua kubimona, mbipepele menemene. Bua tshinyi kubenga kulongolola dileja dimue pamua ne mumanyishi wakufila mu mudimu wa buambi? Maleja adi alonda aa mmafila bu tshilejilu. Udi mua kuakaja bilondeshile bibejibeji bia matuku aa bidi mu tshisumbu.

⁴ Bu mudi numero wa “Réveillez-vous!” wa dia 22 Tshisanga mujule lukonko lua se: “Vivons-nous les derniers jours?” (Tudi mu matuku a ku nshikidilu anyi?), udi mua kukonkonona ngenyi mileja muinshi mua ka-tshiena-bualu: “Derniers jours” (Matuku a ku nshikidilu) mu dibeji 89 dia mukanda wa “Comment raisonner.” Udi mua kutuadija diyukidilangana pa kuamba ne:

◼ “Tudi tunukumbula bua kuakula nenu pa mianda misumpakaji idi yenzeka munkatshi mua bantu. Tangila tshidi tshiena-bualu etshi tshileja. . . ”

⁵ “Tshibumba tshia Nsentedi” tshia mu dia 1 Tshisanga ntshijule lukonko elu: “Ntendelelu: ntshiena-bualu tshijidika?” Udi mua kuamba nunku mu difila tshibejibeji etshi:

◼ “Batu bamba misangu mivule ne: ki mbimpe kuyukidilangana pa ntendelelu, bualu ntshiena-bualu tshidi tshijudisha milandu mivule. Udi pebe wela meji munyi?” Pashishe uleje miaku misunguluke ya tshiena-bualu.

⁶ Udi mua kuleja tshiena-bualu tshia ne: “Bulelela mu malu a ntendelelu budi mua kupetshibua anyi?” tshipatula mu “Tshibumba tshia Nsentedi” tshia mu dia 15 Tshisanga. Mbuelelu eu udi mua kumueneka mutue:

◼ “Bitendelelu mbipita kuvula lelu’eu ne bamue badi badiebeja bikala bulelela mua kupetshibua pa bualu ebu. Tshiena-bualu etshi tshidi tshiumvuija mushindu wa kupeta diandamuna didi disankisha ku lukonko elu. . . ”

⁷ Kumpala kua kupatuka mu buambi, bua tshinyi kubenga kuambulula dileja diebe pamue ne mumanyishi mukuabu bua udiumvue mukazamuke. Pa nanku nudi mua kupangana ngenyi mikuatshishi yanuambuluisha bua kuikala ne ngakuilu mutue ne kuikala bashindame.

⁸ Bu mudi nshikidilu wa ndongoluelu eu wa malu usemena apa, tuambulujayi makasa bua kuambuluisha bantu bena mmuenenu mujalame bua bapatuka mu Babylone Munene! (Buak. 18:4) Tshibumba tshia Nsentedi ne Réveillez-vous! bidi bia diambuluisha dinene mu mudimu eu wikala kawuyi ne bua kuenzuludibua. Tuasakidile Yehowa bua mudiye mutupeteshe biamu bia mudimu ebi bilenga.