Nnganyi Wateleja Mukenji Wetu?
1 Bivua kabiyi bienzeka kumpala, bantu badi mu dijiba dia mamanyisha, mavule a kudiwu mikale anu a pamutu pamutu, pamu’apa a dishima. Nunku, kudi ba bungi mmabapite, ne tudi ne lutatu lua kubafikisha ku diteleja mukenji wa Bukalenge bua Nzambi. Ki mbamanye buenzeji buimpe budi diteleja dia Dîyi dia Nzambi mua kuikala nabu kudibu.—Luka 11:28.
2 Tudi ne disanka dia kumona se: mu bitupa bivule bia pa buloba, makumi a binunu bia bantu adi ateleja mukenji eu ne itaba bua kulonga Bible. Pabi, mu teritware mikuabu kamuena bushuwa ngandamuinu wa mushindu’eu. Mayukidilangana mavule atutu tuenza mu buambi kaena apatula bipeta, ne pamu’apa tudi tudiebeja ne: nnganyi wateleja mukenji wetu.
3 Tudi ne bua kudimuka bua kubenga kuteketa mu maboko. Paulo wakamba ne: “ ‘Yonso wabila dîna dia Yehowa neapandishibue.’ Kadi, mmunyi muabilabu eu . . . udibu kabayi bumvue bualu buende? Apu mmunyi mumvuabu padiku kakuyi muntu bua kuyisha? . . . Anu bu mudibi bifunda: ‘Mbulengelepu kayi budi makasa a badi bamba ngumu mimpe ya malu mimpe!’ ” (Lomo 10:13-15, NW) Bituakuna ne tshisumi dimiinu dia Bukalenge, Nzambi neadikoleshe kudi bantu ba muoyo muakane.—1 Kol. 3:6.
4 Nsapi ya dilubuluka nkuenza makumbulula pa tshibidilu: Mu teritware idi imueneka se: bantu bakese ke batu bateleja mukenji wetu, tudi ne bua kutabalela bua kudiundisha dijinga dionso dia kumanya ditudi tupetamu, nansha bashiye mukanda peshi katuyi bashiye. Bua tshinyi kuikala ne lukasalukasa bua kukoma ne: kakuakupatuka tshipeta? Patudi tukuna luteta, katutu tumanya kualubulukalu. (Muambi 11:6) Bitualukila badilongolole ne kipatshila ka kumanyisha lungenyi kampanda luangatshila mu Mifundu, nansha pa kuakula mu tshikoso, pamu’apa netufike ku dilenga mutshima wa muntu. Tudi mua kushiya trakte peshi kufila bibejibeji bia nimero ya ndekelu. Panyima pa matuku nebitupeteshe pamu’apa mushindu wa kuleja mutu dilonga dia Bible dienzeka. Netukemeshibue pa kumona muabenesha Yehowa madikolela etu.—Mus. 126:5, 6.
5 Bakashiila mukaji kampanda wakasankidila bulelela trakte. Anu panyima pa ngondo ibidi ke pakamupetabu kumbelu, kadi uvua ne mudimu wa bungi kayi mua kuyukila. Bakamushiila tshiakabidi trakte umue-umue eu. Nansha muvua mumanyishi eu ne dinanukila mu diya kumutangila, wakalua kumumona amu panyima pa ngondo isatu, ne kumusangana usama. Muanetu wa bakaji e kualukila lumingu luvua lulonda, diyuki dîpi diakenzeka mu diumvuangana ne trakte. Pakaluaye mu lumingu luvua lulonda, mukaji eu wakaleja dijinga dilelela dia kumanya mukenji wa Bukalenge. Dishintuluka dia malu mu nsombelu wende diakamumanyisha makengela ende a mu nyuma. Dilonga dia Bible diakatuadija, ne mukaji eu wakalonga ne musangelu mbingu yakalonda.
6 Nansha bikalabi bua bilongo, bisekiseki peshi dijinga dia kumanya mukenji wa Bukalenge, tshionso tshituasua kumona tshikola tshidi ne bua kudimibua. Ebi bidi bilomba tshikondo, madikolela, ntema ne disuminyina bua kubenga kulekela. Tshidimu tshishale bantu batue ku 400 000 bàvuà dimiinu dia Bukalenge dipete miji munda muabu bakatambuishibua! Bituatungunuka ne kuyisha, netuikale mua kutuishibua ne: netupete bantu bavule bateleja mukenji wetu.—Tangila Galatia 6:9.