Tshia kuenza bua kuikala ne disanka mu bikondo bikole​—Ntshinyi tshidi Bible wamba?

Mu bikondo bikole ebi, bidi mua kutukolela bua kumanya tshia kuenza bua malu onso adi atufikila. Nansha nanku, disanka dietu ditu difumina misangu ya bungi ku malu atudi tuenza kadi ki nku malu adi atufikila nangananga to. Bible udi uleja ne: “Muena diakalenga udi ne disanka matuku onso” nansha yeye mu ntatu. (Nsumuinu 15:15, Mukanda wa Mvidi Mukulu [Katolike]) Ntshinyi tshitudi mua kuenza bua kuikala ne disanka dia bungi? Tumonayi mudi mibelu ya mu Bible mua kutuambuluisha.

Mua kupita bimpe ne tunyinganyinga

Bible udi wamba ne: “Kanyinganyinga mu muoyo wa muntu kadi kawunemesha bujitu, kadi dîyi dimpe didi diwusanguluja.”​—Nsumuinu 12:25.

• Bible udi mua kukuambuluisha bua kukepesha tunyinganyinga. Bua kumanya mudiye mua kukuambuluisha, bala tshiena-bualu tshia “Tshidi Bible wamba bua kanyinganyinga.”

Mua kutshimuna bunkaya

Bible udi wamba ne: “Mulunda mulelela udi uleja dinanga mu bikondo bionso ne yeye mmuanetu udi muledibue bua bikondo bia dikenga.”​—Nsumuinu 17:17.

• Mu Bible mudi mibelu idi mua kutuambuluisha bua kukolesha malanda etu ne bakuabu bua tumone mua kutshimuna bunkaya. Bala tshiena-bualu tshia “Kudia bulunda bua kuluisha lutatu lua bunkaya​​—Mudi Bible mua kuambuluisha.”

Nanga Nzambi ne bantu nebe

Bible udi wamba ne: “Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso. . . . Udi ne bua kunanga mukuebe bu muudi mudinange.”a​—Matayi 22:37-39.

• Disambila didi mua kutuambuluisha bua kunanga Nzambi bikole. Bua kumanya malu makuabu, bala tshiena-bualu tshia “Nzambi utu uteleja masambila etu anyi?”

• Tudi tuleja mutudi banange bakuabu patudi tutumikila tshivua Yezu muambe tshia kunanga bakuabu bu mutudi badinange. Manya malu makuabu mu tshiena-bualu tshia “Qu’est-ce que la Règle d’or?”

Keba bua kumanya malu a bungi a mudi Bible mua kukuambuluisha bua kuikala ne disanka mu bikondo bikole. Bua bualu ebu, tudi tukulomba bua kuitaba dilonga dia Bible dia nuenda nuyukila kuyi ufuta.