Bible udi wamba tshinyi bua mvita ya bingoma binene bia mbutula?

Bu mudi makokeshi a bukole a buloba bujima mikale ne bingoma binene bia mbutula ne enda enza bikuabu, mvita ya bingoma ebi mmifuane kuenzeka. Padi bantu bamona bungi bua bingoma bia mbutula bidiku, badi ne buôwa bua ne: mvita yabi ikadi pa kuenzeka. Badi kabidi ne buôwa bua ne: ditunga nansha dimue diodi dikume tshingoma tshia mbutula, matunga makuabu neabange kututa pawu, dîba adi mvita idi mua kubutula bintu bionso bia pa buloba idi ituadija. Tudi mu “tshikondo tshidi mvita ya bingoma bia mbutula mifuane kuenzeka.” Ke tshivua mukanda wa Bulletin du savant atomiste muambe.

Mvita ya bingoma bia mbutula mmifuane kuenzeka anyi? Yoyi mienzeke, buloba buetu ebu nebushalaku kashidi anyi? Mmunyi mutudi mua kulekela kusamisha mutu, wela meji ne: mvita ya bingoma bia mbutula ikadi pa kuenzeka? Ntshinyi tshidi Bible wamba?

Mu tshiena-bualu etshi

Bible ukavua muakule bua mvita ya bingoma binene bia mbutula anyi?

Bible ki mmutele mvita ya bingoma bia mbutula to. Kadi bikadilu bia bantu ne malu akavua Bible muambe ne: neenzeke ke bidi bifuane kukebesha mvita eyi.

Tufuanyikija malu adi mu mvese idi ilonda eyi ne adi enzeka lelu:

Mvese wa mu Bible: Bayidi ba Yezu bakamuebeja ne: “Tshinyi tshikala tshimanyinu tshia dikalaku diebe ne tshia nshikidilu wa ndongoluelu wa malu eu?” Yezu wakabandamuna ne: “Tshisamba netshiluishe tshisamba tshikuabu, bukalenge nebuluishe bukalenge bukuabu.”—Matayi 24:3, 7.

Malu adi enzeka lelu: Matunga atu ne bingoma bia mbutula anyi adi ne mushindu wa kubienza atu atu aluishangana.

“Malu a tshikisu mmenzeke bikole matuku mashale aa. Mvita idi yenzeka bikole menemene.—The Armed Conflict Location & Event Data Project.

Mvese wa mu Bible: ‘Mu tshikondo tshia ku nshikidilu, mukalenge wa ku sud neasakilangane ne mukalenge wa ku nord.’—Danyele 11:40.

Malu adi enzeka lelu: Anu mukavua Bible muambe, kudi matunga adi asakilangana anyi aluishangana afuila bukokeshi bua buloba bujima. Ditunga dionso dikale ne matunga adi aditua mu nyima. Lelu, matunga adi ne bingoma binene bia mbutula atu epuka bua kuluishangana buludiludi. Kadi atu avudija bingoma biawu binene bia mbutula.

“Tudi bamone ne: mu bidimu 10 bishale ebi, matunga a bungi mmaluishangane bikole. Matunga a bukole bua bungi mmatue too ne matunga avua aluishangana au mpanda.”—The Uppsala Conflict Data Program

Mvese wa mu Bible: ‘Mu matuku a ku nshikidilu nekuikale bikondo bia malu makole bidi bikole mua kupita nabi. Bualu bantu nebikale kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji.’—2 Timote 3:1-3.

Malu adi enzeka lelu: Anu mutu bantu ba bungi lelu kabayi batamba kumvuangana, bakalenge ba pa buloba pabu kabatu batamba kumvuangana to. Pamutu pa bobu kudienzeja bua kujikija bilumbu biabu mu ditalala, badi bazakejangana ne bia mvita biabu anyi baluishangana. Kuenza nanku kudi kukebesha mvita ya bingoma bia mbutula.

“Bobu kabayi badienzeja bua kupetangana, nebaluishangane misangu ya bungi, biteka too ne mioyo ya bantu ba bungi mu njiwu.”—Samir Saran ne J. Harman ba mu Forum économique mondial.

Nzambi nealekele mvita ya bingoma bia mbutula yenzeka anyi?

Bible ki mmuakule bua bualu abu to. Muambe yeye ne: malu adi akuatshisha buôwa avua ne bua kuenzeka matuku etu aa. (Luka 21:11) Bombe ivuabu bele mu Mvita mibidi ya pa buloba bujima ntshimue tshia ku malu au. Bible udi umvuija tshidi Nzambi mulekele mvita yenzeka. Bua kumanya malu makuabu, tangila filme wa Nzambi mmulekele makenga bua tshinyi?

Buloba buetu ebu nebushalaku kashidi anyi?

Eyowa. Nansha bantu bobu baluishangane kabidi ne bingoma bia mbutula, Nzambi kakulekela mvita ayi ifika too ne ku dibutula buloba bujima to. Bible udi wamba ne: buloba kabuakubutudibua to, ne bantu nebasombelapu bua kashidi nansha bana ba bantu benze tshinyi bua kububutula.

“Buloba budi bushalaku kashidi.”—Muambi 1:4.

‘Nzambi uvua muenze buloba, kavua mubufuke anu bua tshianana, kadi uvua mubuenze bua bantu basombelapu.’—Yeshaya 45:18.

Bamue bantu badi bela meji ne: penzeka mvita ya bingoma bia mbutula kumpala eku, nekushale anu bantu bakese badi badienzeja bua kushala ne muoyo pa buloba. Buloba buine nebuikale bunyanguke anyi buatuke bua mvita ayi. Kadi Bible udi uleja ne: nansha mvita minyangakaje buloba mushindu kayi, nebabuakaje.

“Tshipela ne buloba bume nebisanke bikole, ne mpata wa tshipela neikale ne disanka ne neele bilongo bu bilongo bia safran.”—Yeshaya 35:1.

Bantu mu mparadizu ne disanka benza mudimu pamue. — Nzambi mmusue bua tuikale ne disanka mu buloba bulenga.

Mufuki wetu muenze buloba ne mushindu wa ne: nansha bobu bunyanguke, budi buakana bobu nkayabu. Ndekelu wa bionso, Nzambi nealongolole buloba ku bukole buende; nebuikale muaba muimpe wa bantu kusombela bua kashidi.—Misambu 37:11, 29; Buakabuluibua 21:5.

Mmunyi mutudi mua kulekela buôwa bua mvita ya bingoma bia mbutula?

Bamue bantu badi mua kupeta ntatu anu bualu badi ne buôwa bua mvita ya bingoma bia mbutula. Badi ne buôwa bua mvita ayi ne bua tshidiyi ikebesha. Milayi ya mu Bible ne mibelu idiye ufila bidi mua kubambuluisha bua kukepesha buôwa buabu. Mushindu kayi?

Bible udi uleja muakana buloba buetu ebu kumpala eku ne nsombelu muimpe wikala nende bantu basombamu. Kulonga malu au kudi bu “luongo bua mioyo yetu,” kudi kukepesha buôwa. (Ebelu 6:19, dimanyisha) Tudi kabidi mua kukepesha buôwa butudi nabu tuetu tutuma meji etu ku malu adi enzeka dituku dionso, katuyi tutamba kusamisha mutu bua malu enzeka kumpala eku to. Anu mukavua Yezu muleje, “dituku ne dituku didi ne yadi ntatu idi midikumbanyine.”—Matayi 6:34.

Nunku mbimpe bua tuetu bonso kuikala kuditabalela bua tumone mua kuela meji bimpe ne kushala batukije. Tuetu katuyi tuteya ntema ku ngumu idi kayiyi ne mushinga idi yenza buôwa bu mudi, miyuki ya bingoma binene bia mbutula bidibu bafuma kudienza anyi bienzabu, nebituambuluishe bua kuela meji bimpe ne kushala batukije. Patudi tuenza nanku kabiena biumvuija ne: tudi tulengulula malu adi enzeka to, kadi tudi tudienzeja bua kulekela kusamisha mutu bua malu atudi katuyi mua kujikija anyi adi kaayi mua kuenzeka to.

“Kanyinganyinga mu muoyo wa muntu kadi kawunemesha bujitu, kadi dîyi dimpe didi diwusanguluja.”—Nsumuinu 12:25.

Lekela kuteleja ngumu mibi, tuma meji ku malu mimpe a mu nsombelu webe.

“Nzambi udi ufila ditekemena anuwuje tente ne disanka dionso ne ditalala dionso bualu nudi numueyemena.”—Lomo 15:13.

Foto: Muntu mulume mutangile kumpala ne dishindika dionso. 1. Panyi pende padi mvita, ndeke ya mvita, bingoma bia mbutula ne mudilu wa bingoma bia mbutula. 2. Kumpala kuende kudi buloba buimpe bua ditalala buikale ne mikuna, bibandabanda bimpe kumone, musulu wa mâyi upueka, ne nyunyi. — Bible udi utulaya nsombelu muimpe kumpala eku. Mbualu buakumbana

Wewe ulonga malu adi atangila milayi ya Nzambi, udi upeta ditekemena, disanka ne ditalala dia mu muoyo.

Bible ukavua muakule bua mvita ya bingoma bia mbutula ya Armagedone anyi?

Bamue batu bamba ne: Armagedone mmvita ya bingoma bia mbutula yenzeka pa buloba bujima. Badi bamba nanku bualu badi bela meji a mushindu wabutuka bintu bua mvita ayi.

Kadi padi Bible wakula bua muaku Armagedone, udi wakula bua mvita yenzeka pankatshi pa Nzambi ne “bakalenge ba pa buloba bujima budi bantu basombele” anyi mbulamatadi ya bana ba bantu.a (Buakabuluibua 16:14, 16) Mvita ya Armagedone kayakubutula bantu ne buloba tshianana tshianana bu mudi mvita ya bingoma bia mbutula ne bua kuenza to. Kadi mu mvita ya Armagedone Nzambi neabutule anu bantu babi. Dîba adi, bantu nebikale mu ditalala ne mu bukubi.—Misambu 37:9, 10; Yeshaya 32:17, 18; Matayi 6:10.

Ntshinyi tshidi Bible wamba bua tshiafikila mvita?

“Udi ujikija mvita pa buloba buonso bujima. Udi utshibula buta bua mikete ne usunsula difuma; udi wosha matempu a basalayi ne kapia.”—Misambu 46:9.

Yehowab Nzambi nealeje bisamba bidi biluishangana bukole buende. Neajikije mvita idi pankatshi pabi ne neabutule bia mvita biabi. Neenze nanku ku diambuluisha dia Bukalenge buende, mbulamatadi wa mu diulu watuadija kukokesha buloba.—Danyele 2:44.

Bukalenge bua Nzambi nebulongeshe bantu mua kusomba mu ditalala ne mu buobumue. Bu muikala mbulamatadi umuepele ulombola buloba bujima, kakuakuila kabidi dibenga kumvuangana dia mbulamatadi ya bantu to. Bantu kabakulonga kabidi mvita nansha kakese. (Mika 4:1-3) Bua bualu abu, “nebashikame, muntu ne muntu, muinshi mua muonshi wandi wa tumuma tua nvinyo ne muinshi mua mutshi wandi wa nfigi; kakuena muntu wabakuatshisha buowa.”—Mika 4:4, Mukanda wa Mvidi Mukulu (Mishonyi).

a Bala tshiena-bualu tshia ne: “Mvita ya Armagedone ntshinyi?”

b Yehowa ke dîna dia Nzambi (Misambu 83:18) Tangila tshiena-bualu tshia ne: “Yehowa nnganyi?”

Mukanda wa Buakabuluibua udi wakula bua mvita ya bingoma bia mbutula anyi?

Bamue bantu batu bela meji ne: mukanda wa Buakabuluibua udi wakula bua muabutuka bintu ku mvita ya bingoma bia mbutula. (Buakabuluibua 6:14; 8:7-12; 16:1-21) Tshilejilu, mbambamu ne: “upatula too ne kapia mu diulu kapueka pa buloba.” (Buakabuluibua 13:11-13) Bantemu ba Yehowa badi bumvua bobu ne: kabena bakula bua mvita ya bingoma bia mbutula to, kadi bua bombe ivuabu bele mu Mvita mibidi ya pa buloba bujima.

Nansha mudi mukanda wa Buakabuluibua wakula bua malu adi atangila mvita ayi, tshipatshila tshiende ki ntshia kumvuija kalu ne kalu konso kadi katangila malu adi akuatshisha buôwa au to. Paudi ubala mukanda wa Buakabuluibua, vuluka ne:

Mukanda wa Buakabuluibua mmuakule malu a bungi mu bimanyinu. Katuena mua kubiangata anu mudibi amu to.—Buakabuluibua 1:1.
Ki mbafunde malu adi mu mukanda wa Buakabuluibua kua kumvuija bantu badi baabala buôwa to. Kadi mmukenji udi upetesha bantu badi buwumvua ne bawutumikila disanka.—Buakabuluibua 1:3.

Bua kumanya malu a bungi, bala tshiena-bualu tshia ne: “Mukanda wa Buakabuluibua udi umvuija tshinyi?”