Bua tshinyi kupesha Yehowa?

BU MUVUA dîba diteme mu Salefata, tshimenga tshikese tshia Sidona, mukaji mukàmbà kampanda wakinama bua kuangula nkunyi. Uvua ujinga bua kukuatshisha kapia bua yeye kumona mua kulamba biakudia kabiyi nansha bia nsongo​—imue misangu biakudia bia ndekelu bivua yeye ne muanende mukese wa balume mua kudia. Uvua muluijakane bua kushala ne muoyo yeye ne muanende wa balume munkatshi mua tshipolo tshile tshia munanga ne tshia nzala, ne biakashikila ne nsombelu eu wa dikengakana. Bavua bafua ne nzala.

Muntu kampanda wakasemena pabuipi. Dîna diende divua Eliya, ne mukaji mukamba kumona diakamue ne: uvua muprofete wa Yehowa. Mbimueneke se: ukavua mumvue lumu lua Nzambi eu. Yehowa uvua mushilangane ne Baala, muena ntendelelu wa tshikisu, munyanguke uvuaku mu ditunga diende dia Sidona. Nenku pakamulomba Eliya mâyi a kunua, mukaji wakajinga bikole bua kumuambuluisha. Pamu’apa wakela meji ne: dienza nenku divua mua kumupetesha dianyishibua kudi Yehowa. (Matayo 10:41, 42) Kadi pashishe Eliya wakalomba bikuabu​—tshiakudia tshikese. Mukaji wakumvuija ne: uvua anu ne biakudia bikumbane didia dia musangu umuepele. Kadi, Eliya wakasuminyina, umushindikila ne: Yehowa uvua mua kumupesha biakudia mu tshishima too ne pajika munanga. Ntshinyi tshiakenzaye? Bible udi wamba ne: ‘Wakaya, wakenza bu muvua dîyi dia Eliya.’ (1 Bakelenge 17:10-15) Mêyi aa mapepele adi umvuija tshienzedi tshia ditabuja dinene​—bushuwa ditambe bunene, mu mushindu wa se: Yezu Kristo wakasamuna mukaji mukàmbà au bidimu bitue ku tshinunu pashishe!​—Luka 4:25, 26.

Nansha nanku, bidi mua kumueneka bu bualu bua dikema se: Yehowa uvua mua kulomba bintu bipite bungi kudi mukaji uvua ne tuntu tukese. Ebi bidi nanku nangananga patudi tukonkonona disambila dienza kudi muntu muende lumu bikole. Disangisha dia mapa dia Mukalenge Davidi bua muanende Solomo kutumika nau mu luibaku lua ntempelo diakasonsola mmuenenu muimpe wa kalolo. Mu miaku ya lelu, mapa mafila avua ne mushinga wa miliyare mivule ya dolare! Nansha nanku, Davidi wakambila Yehowa mu disambila ne: “Kadi meme nganyi ne bantu banyi mbanganyi, bua tuetu tuakadifidila bintu bietu nunku? Bualu bua bintu bionso bidi bifuma kûdi, tuakafila anu bintu biebe kûdi.” (1 Kulondolola 29:14) Anu bu muakamba Davidi, bintu bionso mbia Yehowa. Nenku tshikondo tshionso tshitudi tufila bua kutuma bipatshila bia ntendelelu mukezuke kumpala, tudi tupingajila Yehowa patupu bintu bìdì bimane kuikala biende. (Musambu wa 50:10) Nunku, lukonko ludi lujuka ne: Bua tshinyi Yehowa mmusue tshia kumpala bua tuetu kuanji kufila?

Tshitupa tshia mushinga mukole tshia ntendelelu mulelela

Diandamuna ditambe kupepela didi se: kubangila ku kale Yehowa mmuvuije difila tshitupa tshia mushinga mukole tshia ntendelelu mukezuke. Muena lulamatu Abele wakalambula Yehowa bimue bia ku bimuna biende bia mushinga mukole. Bankambua aba Nowa, Abrahama, Izake, Yakoba, ne Yobo bakafila milambu ya muomumue.​—Genese 4:4; 8:20; 12:7; 26:25; 31:54; Yobo 1:5.

Mikenji ya Mose ivua ilomba ne ivua mene ne mêyi pa difila dia mapa kudi Yehowa. Tshilejilu, bena Izalele bonso bavua batumina dîyi dia tshia-dikumi, peshi kufila tshimue tshia pa dikumi tshia bia pa madimi ne tshia divulangana dia bimuna biabu. (Nomba 18:25-28) Mapa makuabu kaavua melela mêyi makole menemene to. Tshilejilu, muena Izalele yonso uvua mulombibue bua kupa Yehowa mamuma a kumpala a bimuna biende ne a bia pa madimi ende. (Ekesode 22:29, 30; 23:19) Kadi, Mikenji ivua ishiila muntu yonso budikadidi bua kupangadija bungi bua mamuma a kufila, tshikole afile matambe buimpe ku onso. Mikenji ivua kabidi ilomba milambu ya kusakidila nayi ne ya mitshipu, ivua buonso buayi mikale ya ku budisuile. (Lewitiki 7:15, 16) Yehowa wakakankamija bantu bende bua kufila bilondeshile mushindu uvuaye mubabeneshe. (Dutelonome 16:17) Anu bu muvuabi bua diibaka dia tabernakle ne pashishe dia ntempelo, muntu yonso wakafila bintu bivua mutshima wende mumusake bua kufila. (Ekesode 35:21; 1 Kulondolola 29:9) Bushuwa mapa a budisuile bu aa avua asankisha bikole Yehowa!

Muinshi mua “mikenji ya Kristo,” dipa dionso divua ne bua kuikala dia ku budisuile. (Galatia 6:2, NW; 2 Kolinto 9:7) Abi kabiakumvuija ne: balondi ba Kristo bakalekela difila peshi ne: bakafila bikese. Bishilangane! Pavua Yezu ne bapostolo bende bayisha mu Izalele, tshisumbu tshia bakaji tshivua tshibalonda ne bavua babakuatshila mudimu ne bintu biabu. (Luka 8:1-3) Bia muomumue mupostolo Paulo wakapeta mapa akakuatshisha mudimu wende wa bu-misionere, ne pashishe yeye pende wakakankamija bimue bisumbu bua kupesha bakuabu bintu padibu mu dikengela. (2 Kolinto 8:14; Filipoi 1:3-5) Kasumbu kaludiki mu Yeruzaleme kakuomekela balume bakumbane bujitu bua kujadika se: mpetu ya ku mapa ivua miabanyina bakengedi. (Bienzedi 6:2-4) Mbimueneke patoke se: bena nkristo ba kumpala bakamona bu disanka bua kusanyika ntendelelu mulelela mu mishindu bu eyi.

Nansha nanku, tudi anu mua kudikonka bua tshinyi Yehowa udi uvuija difila bu tshitupa tshia ntendelelu wende. Tukonkononayi tubingila tunayi.

Bua tshinyi tudi tufila

Tshia kumpala: Yehowa udi uvuija difila bu tshitupa tshia ntendelelu mulelela bualu dienza nunku ndimpe buetu tuetu. Didi diela kashonyi pa dianyisha dietu dia buimpe bua Nzambi. Tshilejilu, padi muana usumbila muledi tshintu anyi umupesha dipa, bua tshinyi muledi udi uleja disanka? Dipa edi didi dikumbaja dijinga kampanda dia lukasa lukasa divua muledi kayi mua kujikija mu mushindu mukuabu anyi? Imue misangu to. Kadi, muledi udi usanka bikole bua kumona muana udiundisha mmuenenu wa dianyisha ne wa dipangana. Bua tubingila tumuetumue Yehowa udi utukankamija bua kufila ne udi usanka bikole patudi tuenza nenku. Eu ke mushindu utudi tumuleja ne: tudi bushuwa tuanyisha bulenga buende buonso bukena mikalu ne kalolo kende kutudi. Yeye udi mufidi wa “dipa dilenga dionso ne tshintu tshipuangane tshionso,” nenku katuakudilakana bua dipangila tubingila tua kumuelela tuasakidila. (Yakobo 1:17, NW) Kupita bionso, Yehowa wakafila Muanende munangibue bikole, pa kuanyisha bua kufuaye bua ne: tuikale ne muoyo wa kashidi. (Yone 3:16) Katuenaku mua kumuela tuasakidila wa bungi anyi?

Tshibidi: bituikala ne tshibidilu tshia difila, tudi pa nanku tulonga mua kuidikija Yehowa ne Muanende Yezu Kristo, mu mushindu musunguluke mutambe mushinga. Yehowa udi misangu yonso ufila, misangu yonso muena kalolo. Anu bu mudi Bible wamba, udi utupesha ‘muoyo ne mupuya ne bintu bionso.’ (Bienzedi 17:25) Tudi mua kumuela tuasakidila mu mushindu muimpe bua mupuya utudi tueyela, bua tshiakudia tshikese tshionso tshitudi tupeta, bua bikondo bionso bia disanka ne diukuta bia mu nsombelu. (Bienzedi 14:17) Anu bu Tatuende, Yezu wakaleja mmuenenu wa dipangana. Wakafila bionso bivuaye nabi ne kalolo konso. Úvua mumanye ne: pavua Yezu wenza bishima, uvua wenza nunku pa kujimija bia bungi anyi? Misangu mivule Mifundu idi ituambila ne: pakondapaye babedi, bukole ‘buakapatuka munda muende.’ (Luka 6:19; 8:45, 46) Yezu uvua muena kalolo mu mushindu wa se: wakafika too ne ku difila anyima wende, muoyo wende, ku lufu mene.​—Yeshaya 53:12.

Nenku patudi tufila, nansha bikala dîba dietu, bukole buetu, peshi bintu bietu, tudi tuidikija Yehowa ne tusankisha mutshima wende. (Nsumuinu 27:11; Efeso 5:1) Tudi kabidi tulonda tshitembelu tshipuangane tshia ngikadilu udi muntu ne bua kuikala nende tshitushila kudi Yezu Kristo.​—1 Petelo 2:21.

Tshisatu: difila didi dikumbaja majinga malelela ne a mushinga. Bushuwa, Yehowa uvua mua kukumbaja bipepele majinga a bipatshila bia Bukalenge kakuyi diambuluisha dietu nansha, anu bu muvuaye mua kulongolola bua mabue kuelawu mbila pamutu pa kutumika netu bua kuyisha dîyi. (Luka 19:40) Kadi wakasungula bua kutupesha bunême ne masanka a mudimu aa. Nenku patudi tufila mpetu yetu bua kutungunuja bipatshila bia Bukalenge, tudi ne disankishibua dinene dia kumanya se: tudi tukumbaja tshitupa tshinene mu mudimu wa mushinga mutambe udi wenzeka mu bulongolodi ebu.​—Matayo 24:14.

Kabiena bikengela mene bua tuetu kuvuluija ne: mfranga idi ikengedibua bua kutungunuja mudimu wa pa buloba bujima wa Bantemu ba Yehowa. Mu tshidimu tshia mudimu tshia 1995, Société wakatula pabuipi ne miliyo 60 ya dolare anu bua kuambuluisha bampanda-njila ba pa buabu, ba-misionere, ne batangidi bena ngendu mu mudimu wabu wa budimi mu miaba mibatuma. Nansha nanku, abu mbungi bukese pa kubufuanyikija ne luibaku ne midimu ya ku biro bia filiale ne nzubu ya dipatuila mikanda pa buloba bujima. Pabi, bionso ebi bidi bienjibua ku mapa a ku budisuile!

Pa tshibidilu bantu ba Yehowa kabatu bamba ne: bikalabu buobu bine kabayi mu dibodiama dia bintu, badi mua kulekela bantu bakuabu bambule bujitu abu. Mmuenenu bu eu uvua mua kutufikisha ku dijimija diakalenga pa bidi bitangila tshitupa etshi tshia ntendelelu wetu. Bilondeshile mupostolo Paulo, bena nkristo mu Makedonia bavua batata bua ‘bupele bua bungi.’ Kadi, bakalomba muabi wa difila. Paulo wakajadika ne: bintu biakafilabu bivua ‘bipite bukole buabu’!​—2 Kolinto 8:1-4.

Tshinayi: Yehowa mmuvuije difila tshitupa tshia ntendelelu mulelela bualu difila nedituambuluishe bua kuikala ne disanka. Yezu muine wakamba ne: “Disanka dia kupa ndipite dia kupeta.” (Bienzedi 20:35, NW) Ke mushindu wakatuenza Yehowa. Kutshidi kakuabu kabingila katudi mua kudiumvua se: nansha tuetu bamupeshe bintu bungi kayi, katuvua mua kufuanyikija dianyisha ditudi tumvua buende yeye mu mitshima yetu. Kadi, diakalenga, Yehowa kêna utekemena bipitshidile kupita bitudi mua kufila. Tudi mua kuikala ne dieyemena se: ùdi ne disanka patudi tufila bitudi nabi ne disanka dionso!​—2 Kolinto 8:12; 9:7.

Mabenesha adi afumina ku dileja mmuenenu wa dipangana

Bua kupingana ku tshilejilu tshietu tshia ntuadijilu, ela meji bu bikala mukaji mukamba wa mu Salefata mudibingishe ne: muntu mukuabu uvua mua kukumbaja dijinga dia Eliya dia biakudia. Ndibeneshapu kayi divuaye mua kuikala mupangile!

Kakuena mpata bua se: Yehowa udi ubenesha aba badi baleja mmuenenu wa dipangana. (Nsumuinu 11:25) Mukaji mukàmbà wa ku Salefata kakatata bualu wakafila bivuaye muelele meji bu biakudia biende bia ndekelu. Yehowa wakamufuta ne tshishima. Anu bu muvua Eliya mulaye, bilaminu biende bia bukula ne mafuta kabiakashala munda mutupu too ne pakapita munanga. Kadi wakapeta difutu dikuabu dipite bunene. Pakasama muanende ne kufuaye, Eliya, muntu wa Nzambi mulelela, wakamubiishilaye. Mmunyipu muvuabi ne bua kuikala bimukoleshe mu nyuma!​—1 Bakelenge 17:16-24.

Lelu’eu katuena tutekemena kubeneshibua ne bishima. (1 Kolinto 13:8) Kadi Yehowa udi utushindikila ne: neambuluishe aba badi bamusadila ne anyima mujima. (Matayo 6:33) Nenku tudi mua kuikala bu mukaji mukàmbà wa mu Salefata mu muanda au, pa kufila ne kalolo konso, ne dieyemena dia se: Yehowa neatuambuluishe. Bia muomumue, tudi mua kupeta mafutu manene a mu nyuma. Bikala difila dietu dikale muanda wa buatshiabuatshia, pamutu pa kuikalawu wa mu mpukapuka, ukena muelele meji, nedituambuluishe bua kulama dîsu dietu dipepele ne ditangija ku bipatshila bia Bukalenge, anu bu muakatuma Yezu dîyi. (Luka 11:34; 1 Kolinto 16:1, 2) Nedituambuluishe kabidi bua kudiumvua pabuipi menemene ne Yehowa ne Yezu bu benzejanganyi nabu ba mudimu. (1 Kolinto 3:9) Ne nedikoleshe mmuenenu wa kalolo, wa dipangana ukadi mulejibue kudi batendeledi ba Yehowa pa buloba bujima.

[Kazubu mu dibeji 31]

MISHINDU IDI BAMUE BASUNGULA BUA KUFILA

MAPA BUA MUDIMU WA PA BULOBA BUJIMA

Bavule batu bateka mfranga ku luseke ya kuela mu tushete tudi ne miaku eyi: “Mapa bua mudimu wa pa buloba bujima wa Société​—Matayo 24:14.” Ngondo yonso bisumbu bidi bituma mfranga eyi ku tshilombuelu tshia buloba bujima ku Brooklyn, mu New York, anyi ku biro bia filiale wa ditunga.

Mapa a ku budisuile a mfranga adi mua kutumibua kabidi buludiludi ku Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, peshi ku biro bia Société bidi bitumika mu ditunga dienu. Biju anyi binga bintu bia mushinga bidi pabi mua kufidibua. Mukanda mufunda mu tshikoso ùdì uleja ne: aa mmapa a buludiludi, udi ne bua kutumibua pamue nawu.

DILONGOLOLA DIA MAPA ADI AKENGELA BUALU

Mfranga idi mua kufidibua kudi Société Watch Tower bua kulamibua bu dîyi dishiya (testament) too ne ku lufu lua muyifidi, ne tshijadiki tshia se: bikala muenayi mua kuikala nayi dijinga, nebamupingajileye. Bua mamanyisha makuabu, suaku ufundile Treasurer’s Office mu adrese mufunda kuulu eku.

MAPA MAPANGADIJA BUA KUFILA

Kusakidila ku mapa mafila buludiludi a mfranga ne mapa a mfranga adi akengela bualu, kudi mishindu mikuabu ya difila bua kuambuluisha mudimu wa Bukalenge wa pa buloba bujima. Ng’eyi idi ikonga:

Mfranga ya pansio: Société Watch Tower udi mua kupeshibua bukenji bua kuangata mfranga ya pansio. Bidi bikengela kumanyisha Société bua ndongoluelu yonso wa nunku.

Konte ya ku banke: Konte ya ku banke, konte ya depo, peshi konte wa mfranga ya pansio wa muntu pa nkayende idi mua kufundibua mu dîyi dishiya bua anyi kuyivuija ya kufuta dîba dia lufu kudi Société Watch Tower, mu diumvuangana ne malu malomba a banke wa muaba au. Bidi bikengela kumanyisha Société bua ndongoluelu yonso wa nunku.

Lupetu ne nsombu: Badi mua kupesha Société Watch Tower lupetu ne nsombu (titres et obligations) mu mushindu wa dipa dia buludiludi anyi pa kuenza dilongolola kuikalabu ne bua kutungunuka ne kufuta mufidi makasa.

Nzubu: Badi mua kupa Société Watch Tower nzubu idi mua kusumbibua, anyi mufidi udi ufila dipa buludiludi, anyi mu mushindu wa kupetelaku mfranga patshidiye ne muoyo. Bidi bikengela kumvuangana ne Société kumpala kua kumupa dipa dia nzubu.

Dîyi dishiya ne bintu bieyeka ku budisuile: Badi mua kushiila Société Watch Tower nzubu anyi mfranga ku diambuluisha dia dîyi dishiya didi Mbulamatadi mumanye, peshi badi mua kufunda dîna dia Société bua ababidile tshipungidi tshia bintu bieyeka ku budisuile (contrat de fideicommis). Bintu bieyeka bulongolodi bua malu a Nzambi bidi mua kutapisha makasa mu difuta bitadi. Kopi wa dîyi dishiya anyi wa tshipungidi tshia bintu bieyeka udi ne bua kutumibua kudi Société.

Aba bàdì bakokibue ku dimue dia ku malongolola a mapa aa mapangadija bua kufila badi ne bua kufundila Planned Giving Desk mu adrese mufunda kuinshi eku peshi biro bia Société bidi bisadila mu ditunga dienu. Biro bia Planned Giving Desk bidi ne bua kupeta kopi wa mikanda mifunda idi ijadika dilongolola dionso dia mushindu’eu.

Société mmulongolole broshire wa mu Anglais udi ne tshiena-bualu: Planned Giving (Mapa mapangadija bua kufila). Aba bàdì mu États-Unis bàdì bapangadija mpindieu bua kufila dipa dia pa buadi kudi Société peshi kushiila Société bumpianyi dîba dia lufu badi mua kupeta mamanyisha aa makuatshishi. Ebi bidi bilelela menemene bikalabu bajinga bua kukumbaja bimue bipatshila bia dîku peshi dilongolola pa bintu bia bumpianyi mu ditumika ne bitadi bia makasa bua kukepesha mushinga wa dipa peshi bumpianyi. Broshire udi mua kupeteka ku dilomba, pa kufunda anyi kuela telefone.

PLANNED GIVING DESK

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000