Bueja munda mua bakuabu ditekemena dia muoyo wa kashidi

¹ Nansha mudi bantu bakebe mishindu ya kukepesha dikulakaja ne kuvudija matuku abu a muoyo, dikulakaja ne lufu bidi anu bikole bua kubiepuka. Ndianyisha kayipu ditudi nadi dia mudi Bible umvuija bua tshinyi bantu badi bakulakaja ne bafua, pamue ne mushindu wikala ntatu ya bukulakaje mua kujimina ne lufu kumbushibua. Malelela aa mmaleja mu mushindu udi utuisha mu mukanda wa Dimanya didi difikisha ku muoyo wa kashidi. Mukanda eu udi wandamuna patoke ku nkonko idi ipampakaja bua muoyo ne lufu, uludika mubadi ku tshikondo tshiapingajabu Mparadizu.

² Mu Tshisanga netufile mukanda wa Dimanya ne tshipatshila tshia kutuadija malonga a Bible a ku nzubu. (Mat. 28:19, 20) Pashishe netuenze makumbulula kudi bonso badi baleja dijinga dia kumanya bivule pa mukenji wa Bukalenge. Mu dienza nunku tudi mua kubueja munda mua bakuabu ditekemena dia muoyo wa kashidi. (Tito 1:2) Bua kukumbaja bionso ebi, ngenyi-mifila idi ilonda eyi idi mua kukuambuluisha.

³ Mu dimonangana dia kumpala, udi mua kuela lukonko elu:

▪ “Ukadiku mudiebeje bua tshinyi bantu batu bajinga bikole muoyo mule? [Lekela muntu andamune.] Bena Buddha, bena nkristo, bena Hindu, ba-Mizilman, ne bakuabu bonso badi ne ditekemena dia muoyo kunyima kua lufu.” Bulula mukanda wa Dimanya mu nshapita 6, “Bua tshinyi tudi tukulakaja ne tufua?,” ne bala tshikoso 3. Welangane meji pa mvese mifila. Mushindamene pa nkonko ibidi idi ku ndekelu kua tshikoso, ebeja mukuyukidishi bikalaye musue kupeta mandamuna. Bikalaye musue, nutungunuke ne diyukidilangana pa bikoso ndambu bidi bilonda. Dilonga ndimana kutuadija! Pikalayi kayi musue, umushile mukanda bua kubala, ne nupunge dîyi bua wewe kualukila, nangananga panyima pa dituku dimue anyi abidi bua kukonkonona mandamuna.

⁴ Paudi ulondakaja difila dia mukanda wa “Dimanya,” udi mua kuamba ne:

▪ “Ndi mualukile bua tukonkonone nkonko ibidi idi itangila lufu ituvua bashiye kayiyi miandamuna.” Vuluija mukuyukidishi nkonko ayi. Pashishe nuyukile pa malu adi mu nshapita 6 pa ka-tshiena-bualu: “Didinga dibiadibi.” Bilondeshile nsombelu udiku, nudi mua kutungunuka ne dilonga anyi kutumika ne lukonko lua ndekelu ludi ku ndekelu kua tshikoso 7 bua kuasa tshishimikidi bua dilonga dialonda. Pungayi bimpe dîyi bua wewe kualukila. Pesha mukuyukidishi kabeji ka dibikila, ne umvuija mu mêyi makese mushindu utu bisangilu bia mu tshisumbu bienzeka. Mubikile ne luya luonso bua alue kubuelamu.

⁵ Nansha mu mudimu wa ku tshiibi ne ku tshiibi anyi bumanyishi bua mu mpukapuka, udi mua kutuadija diyuki ne muntu pa kuamba ne:

▪ “Ukadiku mudiebeje tshidi matuku atshilualua matulamine tuetu ne buloba ebu anyi? [Lekela muntu andamune.] Bible udi umvuija matuku atshilualua mu muaku umue​—Mparadizu! Udi umvuija ne: ku ntuadijilu, Nzambi wakalongolola tshitupa kampanda tshia buloba ne kutshivuija Mparadizu mulengele muakatekaye bantu babidi bakafukaye. Bavua ne bua kuuja buloba bujima, babukudimuna ku kakese ku kakese mparadizu. Tangila diumvuija edi dia mushindu uvuabu ne bua kuikala.” Bulula mukanda wa Dimanya mu dibeji 8, ne bala tshikoso 9, pa ka-tshiena-bualu: “Muoyo mu Mparadizu.” Pashishe yukilayi pa bidi mu tshikoso 10, ne bala mvese mutela, Yeshaya 55:10, 11. Lomba bua kutungunuka ne diyukila pa mushindu wikala nsombelu mu Mparadizu muasulula ne bua kujikija bikoso 11-16 pamue. Anyi ukankamije muntu bua adibadile nkayende, ne numvuangane bua kupetangana kabidi ne kuyukidilapu.

⁶ Binuikala kanuvua batuadije dilonga mu dimonangana dia kumpala, udi mua kuteta bua kudituadija mu dikumbulula pa kuamba ne:

▪ “Anu bu mutuvua bayukile musangu mushale, dilongolola dia Nzambi ndia se: buloba bujima bukudimuke mparadizu. Ebi bidi bijula lukonko elu, Mparadizu neikale mushindu kayi?” Bulula mukanda wa Dimanya mu nshapita 1, ne longayi bikoso 11-16, pa ka-tshiena-bualu: “Nsombelu mu Mparadizu muasulula.” Kunyima uleje tshimfuanyi mu mabeji 4-5, ne webeje muntu bikalaye musue bua kuikala ne muoyo muaba mulengele wa nunku. Pashishe ubale tshiambilu tshia kumpala mu tshikoso 17 mu dibeji 10. Bilondeshile nsombelu udiku, udi mua kutungunuka ne dilonga anyi kuamba ne: mu dikumbulula diebe dialonda neumvuije tshidi tshilombibue bua muntu kuikalaye mu Mparadizu muasulula. Shiya kabeji ka dibikila, umvuija ndongamu wa bisangilu, ne bikila muntu ne luya luonso bua kuluaye ku Nzubu wa Bukalenge.

⁷ Mukanda wa Dimanya ntshiamu tshilenga tshia kutumika natshi mu disokoluela bakuabu “muoyo wa kashidi” mulaya kudi Nzambi. Dilombola diebe dia malonga a Bible ku nzubu ne bantu didi mua kubueja munda muabu ditekemena edi dinene dienzeja ku spiritu kudi Nzambi “udi kai mua kudinga.”