Dilonga dia mukanda wa Muntu mutambe bunene wa katshia ne katshia

¹ Lumingu lua dia 30 Kashipu, netutuadije kulonga mukanda wa Muntu mutambe bunene wa katshia ne katshia mu dilonga dia mukanda. Nebikale bualu bua disanka patualonga muvua nsombelu ne mudimu wa Yezu Kristo! Bu mudi mukanda eu muikale mushilangane kakese ne mikuabu itukadi balonge, mbimpe bua tuetu kuanji kulonda imue mibelu bua kuulonga bimpe.

² Bu mudi mabeji a mukanda eu kaayi ne nimero, programe utudi bapatule mu Mudimu wetu wa Bukalenge udi uleja nshapita ya dilonga, pa tshibidilu ibidi anyi isatu ku lumingu. Nshapita wa 35, wa 111 ne wa 116 mmile bikole; nanku nebayikosolole mu bitupa bia bungi bia dilonga. Padi muanetu udi mumanye dibala bimpe ujikija kubala nshapita mujima (peshi bikoso bia ka-tshiena-bualu, tshilejilu bu mudi mu nshapita wa 35, 111 ne 116), mulombodi wa dilonga neele nkonko idi ku ndekelu kua nshapita ya tshitupa tshidibu bafuma ku dibala. Mandamuna kaena anu malondangane mu nshapita to. Badi ne bua kufila mumvuija mimpe mîpi ne masunguluke mashindamene onso anu pa malu a mu nshapita au.

³ Pashishe, pikalaku dîba, nenubale mvese yonso idibu bafile ku ndekelu kua nshapita. Mvese idi mitambe bule nebikale mua kuyikosolola mu bitupa mu bitupa bua bamanyishi bashilashilangane bapete mushindu wa kuyibala; pashishe numvuije inuikale babale. Mulombodi wa dilonga dia mukanda neadianjile kulongolola nkonko mijalame ya kusaka nayi bantu ku difila mumvuija mimpe adi aleja diumvuangana didi pankatshi pa mvese inudi babale ne ngenyi minene idi mu mukanda eu. Nkonko yonso ne mumvuija onso adi ne bua kuambuluisha bateleji bua kutumabu lungenyi luonso anu kudi Yezu Kristo, kuela meji bua nsombelu wende ne malu avuaye ulongesha.

⁴ Mukanda wa Muntu mutambe bunene udi ulonda malu a nsombelu wa Yezu malondangane bilondeshile muvuawu menzeke. Bua tuetu kuvuluka malu ende, mbimpe tuikale tuafuanyikija mu lungenyi ne tukuata miaba ivuawu menzekele. Nunku, kanupu muoyo bua kutangila bimfuanyi bia mekala bidi mu mukanda eu ne kuikala kabidi nutangila karte kadi kunyima kua mbuelelu ku mbangilu kua mukanda eu.

⁵ Nenukonkonone mbuelelu wa mukanda eu mu lumingu lua kumpala. Kunyima kua bamane kubala bikoso bionso bidi muinshi mua ka-tshiena-bualu, mulombodi neele nkonko miakanyine ikalaye mulongolole. Dilonga dia mukanda eu nedituambuluishe anu pikala muntu ne muntu udilongolola bimpe. Mulombodi wa dilonga udi ne bua kuikala udilongolola bimpe lumingu luonso bua kuambuluisha bena mu kasumbu kende bua kumanyabu bimpe muntu mutambe bunene wa katshia ne katshia, Mukalenge wetu ne Mupandishi wetu, Yezu Kristo.