Nudi ‘bela mu tshialu’!
1 Mupostolo Paulo wakafunda ne: ‘Bulelela, badi batuele mu tshialu ku mêsu kua bonso, [banjelu] ne bantu.’ (1 Kol. 4:9, Mukanda wa Mvidi Mukulu [Katolike, MMM]) Bualu ebu budi bumvuija tshinyi ne mmunyi mudibu butangila mudimu wetu lelu’eu?
2 Kudi bena Kolinto, tshiambilu etshi: “batuele mu tshialu” tshivua pamu’apa tshibavuluija bualu bua manaya a baluanganyi ba mvita mu tshipalu tshia bena Lomo, muvua bantu bavuabu ne bua kuluisha bapita kumpala kua bantu binunu ne binunu bavua balue kubatangila bangabanga ne kubashipabu ne tshikisu tshikole. Mushindu wa muomumue, babandidi bapite bungi; bantu ne banjelu; bakamona muvuabu bakengesha bena Kristo ba mu bidimu lukama bia kumpala bualu bavua bamba lumu lua Bukalenge. (Eb. 10:32, 33) Lulamatu luabu luakakemesha bikole bantu ba bungi bavua babatangila, anu bu mudi lelu’eu ditantamana dietu dikemesha kabidi ba bungi badi benza anu bu badi batubandila mu tshipalu. Tudi mu tshialu kumpala kua nganyi?
3 Tudi kumpala kua ba pa buloba: Imue misangu bamuangalaji ba ngumu ku tudiomba ne mu bikandakanda batu bamanyisha malu adi atangila mudimu wa Bantu ba Yehowa. Patudi eku bikale tusanka bua mushindu udi bantu batutapila katshi anyi bua mêyi mimpe adibu bamba bua mudimu wetu, tudi kabidi batekemene bua kumvua lumu lubi ludi baluishi betu mua kuikala batumuangalajila ku tshikondo ne ku tshikondo. Nansha nanku, tutungunukayi anu ne kudimanyisha bu bena mudimu ba Nzambi “ku lumu lubi ne ku lumu luimpe.” (2 Kol. 6:4, 8) Kadi kudi bantu ba muoyo muimpe badi batumanye, biakamueneka patoke ne: tudi bayidi balelela ba Yezu Kristo.
4 Kumpala kua banjelu: Banjelu badi pabu batubandila. Diabolo ne bademon bende badi batutangila; kadi ne ‘tshiji tshikole’ badi bakeba mua kulekesha mudimu wa ‘bumanyishi bua Yezu.’ (Buak. 12:9, 12, 17) Kadi banjelu ba lulamatu ba Nzambi buobu batu batangila ne basanka padibu bamona muenji wa mpekatu nansha umue unyingalala ne ulekela malu mabi. (Luka 15:10) Bidi bitukankamija patudi tumanya ne: banjelu badi bangata mudimu wetu bu mudimu wa kuenza ne lukasa, mudimu udi wambuluisha ne udi wenzeka pa buloba lelu.—Buak. 14:6, 7.
5 Padibu banuluisha peshi panudi nuela meji ne: mudimu wenu kawena upatula bipeta, mbimpe nuvuluke ne: mêsu a bantu ne a banjelu adi anu kunudi. Panudi nutantamana ne lulamatu, bidi bileja patoke ne: nudi bantu ba muoyo mutoke. Ndekelu wa bionso, ‘mvita yenu mimpe ya ditabuja’ neyinuambuluishe bua ‘kulamata ku muoyo wa tshiendelele.’—1 Tim. 6:12.