“Bamanyishi ba Bukalenge ba tshisumi”: Mpungilu wa Distrike wa Bantemu ba Yehowa bua tshidimu tshia 2002
1 ‘Ndisanka kayi, dingakumvua pavuabu bangambile ne: Tuye mu nzubu wa [Yehowa].’ (Mus. 122:1, MMV) Patudi tukonkonona mêyi a mufundi wa Misambu aa, tudi tumanya (1) Mushindu wakadiumvuaye pakamubikilabu bua kulua kutendelela Yehowa, (2) balunda bimpe bavuaye nabu, bavua pabu banange bikole ntendelelu mulelela, ne (3) bivua bikengela kuenza amue malu bua kubikila bantu ba bungi, bua kusangila pamue ne bua kuya kuendakana ku nzubu wa Nzambi.
2 Mêyi aa a mufundi wa Misambu kaenaku aleja mututu tudiumvua patudi tumvua ne: badi benda balongolola malu bua mpungilu wetu utualua kuenza anyi? Mioyo ya munda itu ishala kulu kulu tujinga bua kufika lukasa dituku adi nangananga patudi tuvuluka masanka a mu mpungilu yetu mikuabu ikadi mipite ne tutekemena kabidi bua kudisangisha ne bawetu bakuabu badi banange pabu Yehowa. Bua tshidimu tshia 2002, mbalongolole bua Mpungilu ya Distrike ya matuku asatu ya “Bamanyishi ba Bukalenge ba tshisumi” yenzeke mu teritware idi filiale wa mu Congo-Kinshasa ulombola mudimu. Tutuadijayi kudilongolola bua kumona mua kubuela mu difesto dia mu nyuma didi dituindile edi ne kupetamu diambuluisha divule.
3 “Mupika wa lulamatu ne wa budimu” ukadi mutuadije kulongolola biakudia bia mu nyuma bialuaye kupesha bantu mu mpungilu au. (Luka 12:42, NW) Tshisumbu ne tshisumbu tshionso ntshimanye mpungilu wabuelatshi bua bantu kabafimpakanyi muaba wenzekela mpungilu au to. Kabidi, bana betu ba bungi bakadi batuadije kulongolola bibambalu bishilashilangane bia mpungilu au bua ‘bionso kuenzekabi anu mu buakane ne mu bulongame.’ (1 Kol. 14:40, Mukanda wa Mvidi Mukulu [Katolike, MMM]) Bu mukadiku malu a bungi nunku adi mua kutuambuluisha bua tuikale bimpe mu nyuma, kadi tuetu ntshinyi tshitudi mua kuenza bua kudilongolola bua mpungilu?
4 Tutuadijayi kudilongolola bua kuikalaku matuku onso asatu: Udi musue bua kulomba dikisha kudi mfumuebe wa mudimu bua umone mua kubuela mu mpungilu matuku onso asatu au anyi? Yehowa mmumanye se: bamue bamfumu ba mudimu badi ne “malu makole.” (1 Pet. 2:18, MMM) Kadi bu mudi mpungilu wetu ne mushinga wa bungi, nunku tudi basue kuenza muetu muonso bua kuikalamu matuku onso asatu. Sambila Yehowa bua malu aa, ukebe buludiki buende bua bakuanyishile wangata dikisha.—Neh. 2:4.
5 Miaba ya kulala: Pa tshibidilu, bana betu batu bafila miaba idi bakuabu mua kulala. Nunku mbimpe tuikale ne dianyisha kudi bana betu badi bitaba bua kutupesha miaba ya kulala. Kabidi, nansha buobu mua kutuakidila mushindu’eu, katujingi bua kushala ku mabu eku matuku a bungi kumpala ta kunyima kua mpungilu to. Bana betu badi bafila miaba ya kulala anu bua matuku asatu a mpungilu aa. Padibu batupesha miaba eyi, tudi ne bua kunemeka bintu bia bende bia muena nzubu, katunyangi kantu nansha kamue, katuena ne bua kubuela tshibuelabuela miaba idibu kabayi batupeshe bukenji bua kubuela to. Mbimpe kabidi bua tuikale ne dîsu dikole bua bana batudi nabu benze pabu bia muomumue. Bikala bena nzubu ne lutatu kampanda pa bualu ebu, badi ne bua kumanyisha diakamue tshibambalu tshia miaba ya kulala ne tshiotshi netshibambuluishe. Bua malu adi atangila tshibambalu etshi kuendawu bimpe, tuetu bonso tudi ne dibanza dia kueleshangana nabu maboko. (Eb. 13:17) Bavua batumanyishe ne: bamue bana betu batu babenga ku bukole miaba idibu babapesha bua kutudila, baya pamu’apa kua mulunda wabu peshi mumanyangana nabu kampanda. Ngenzelu eu udi ukondakaja mudimu wa aba badibu buomekele bujitu bua Tshibambalu tshia miaba ya kulala. Tudi tunulomba bonso bua nutumikile bionso bidi tshibambalu etshi tshilongolole.
6 Kakuyi mpata, Yehowa udi ubenesha bionso bitudi tuenza bua mpungilu yetu ya ku tshidimu ku tshidimu eyi. Bu mudi bana betu ba bungi batu bumbukila kule bua kubuela mu mpungilu wa distrike bikale dijinga ne kua kutudila, Yehowa kakubalekela to, neabambuluishe. Bu mudi ntendelelu mulelela muikale ulomba malu aa, tudi ne bua kulonda ne disanka mêyi adibu bafile aa. Tulejayi ne: tudi bena lulamatu nansha mu tu-malu tua tukese tukese; nenku netupete masanka a bungi adi Yehowa mulaye bantu badiye munange.—Luka 16:10.
7 Tangila mu tshisumbu tshienu: Tuetu bamanye ne: muanetu kampanda udi ne lutatu kansanga (bulema anyi dipangila dia tshinga tshintu) ludi mua kumupangisha mua kulua mu mpungilu, katuenaku mua ‘kunzulula mioyo yetu,’ kumuleja dinanga ne kumuambuluishaku anyi? (2 Kol. 6:12, 13; Dut. 15:7) Ke lungenyi luvua Paulo mukankamije bantu mu mukanda wa 2 Kolinto 8:14 bua kuikalabu nalu. Bua tshinyi kubengaku kulomba bantu badi ne ntatu ya nunku bua nuenze nabu luendu pamue bua kuya ku mpungilu? Buobu bikale bampanda-njila, pamu’apa badi ne malu malenga a bungi akadibu bamone adibu mua kunulondela panuikale mu njila. Bikalabu bantu bakadi bakulakaje ba mu tshisumbu, badi mua kuikala ne diyuki dilenga dia malu a mu bulongolodi diutu bumue kuyi muanji kumvua. Kuenaku umona se: kudia malanda ne bana betu abu kudi mua kuikala diambuluisha buebe wewe ne bua dîku diebe anyi? Nebanyishe muoyo webe muimpe wa kalolo ne Yehowa pende neakubeneshe.—Nsu. 28:27; Mat. 10:42.
8 Nansha mudi dikumbaja majinga a nunku mua kuikala nangananga pa makaya a balela babu bena Kristo, bakulu ne bena mu tshisumbu bakuabu badi bamanye ntatu ayi badi mua kubambuluisha ne dinanga dionso. (1 Tim. 5:4) Padi bantu bafundila komite wa mudimu wa tshisumbu mikanda balomba miaba idibu mua kuya kutudila, bena komite eu badi ne bua kukonkonona ngikadilu ya muntu eu bangabanga ne kutumina bena tshibambalu tshia miaba ya kulala mikanda eyi.
9 Tudifilayi mu mudimu wa budisuile: Dîba didi mpungilu wenzeka, bena budisuile nkama mivule batu bambuluisha mu midimu ya bungi kabayi bikisha. Bakididianganyi ne basadidi badi ku miaba ya dimanyikila mashinyi ta makalu badi balombola bantu pa miaba ya kusomba ne babatangidila mashinyi anyi makalu abu muaba udibu bayimanyikile. Tshibambalu tshia mankenda tshidi tshienza bua lumu ludi lutuendele lua ne tudi bantu bena mankenda luya kule, benza muabu muonso bua muaba wetu utudi tuenzela ntendelelu bua matuku makese eu ushale ne mankenda kupita mutuvua bausangane. Tudiku mua kuambuluisha tshibambalu etshi ta bikuabu bidi mua kuikala netu dijinga anyi? Neudifileku ku budisuile bua kuenza mudimu “mu buobumue” pamue ne bana betu bakuabu anyi?—Sef. 3:9, MMM.
10 Bantu badiku bamona tshitudi tuenza anyi? Mu mpungilu wa distrike wa muaba kampanda uvua muenzeke tshidimu tshishale, muntu mukuabu ukavua mulekele kulonga Bible ne Bantemu ba Yehowa kukadi kupite bidimu 20 uvua wenza mudimu mu nzubu wa tshilala benyi. Wakambila bamue Bantemu ne: uvua mpindieu wela meji a kubangulula dilonga diende dia Bible ne diya mu bisangilu. Bua tshinyi? Bua dinanga divua Bantemu ba Yehowa bamuleje mu matuku avuabu ku nzubu wa tshilala benyi au.
11 Musumbishi wa bintu mukuabu wa ku nzubu wa tshilala benyi wakamba bua bana betu ba balume ne: “Ku bantu badi balue mu nzubu wetu wa tshilala benyi, kasumbu kenu ke kadi katambe buimpe. Bana benu badi ne lutulu ne kanemu ka bungi.” Bidi bisankisha bikole Tatu wetu wa mu diulu padiye utumona tulonda mubelu wa Yezu eu: ‘Butoke buenu butokeshe ku mêsu a bantu bonso, bua bamone malu enu mimpe, batumbishe Tatu wenu udi mu diulu.’—Mat. 5:16, MMM.
12 Tuikalayi ne lungenyi bu lua Mukalenge Davidi, wakadianjila kuikala ne disanka dia kuya mu nzubu wa ntendelelu wa Yehowa. Mpungilu yetu ya distrike ke mpokolo wa muoyo wa biakudia bietu bia mu nyuma ne mushindu wa pa buawu utudi mua kulejangana dinanga dia buena-muntu. Bua nanku, tudi tunulomba bituadije ku mpindieu bua nutuadije kudilongolola bua numone mua kubuela mu bitupa bionso bia matuku onso asatu a mpungilu wetu wa distrike wa tshidimu etshi wa “Bamanyishi ba Bukalenge ba tshisumi”!
[Kazubu mu dibeji 3]
Ndongamu
Ditanu ne Disambombo
9:30 wa dinda – 5:00 mu mapingaja
Dia lumingu
9:30 wa dinda – 4:00 mu mapingaja.
[Kazubu mu dibeji 4]
Mua kudilongolola bua kubuela mu mpungilu ya distrike ya “Bamanyishi ba Bukalenge ba tshisumi”
1. Biwikala ne bua kuenza luendu lule bua kubuela mu mpungilu, utuadije kulama makuta a biakudia ne a njila bua dîku diebe.
2. Uvuluke kabidi mapa a budisuile a kufila bua dilongolola dia mpungilu. ‘Kumueneki ku mêsu kua Yehowa bianza bitupu to,’ kadi ‘umutumbishe ne biuma biebe.’—Dut. 16:16; Nsu. 3:9.
3. Netuikale mua kutumbisha dîna dia Yehowa bituikala ne bienzedi bimpe ne mvuadilu mulenga wa mankenda dîba dia mpungilu.—1 Kol. 10:31.
4. Udilongolole bua kulonda tshidi bana betu badi benza mudimu wa diakidilangana bakulomba. Kulami miaba ya disomba tshianana tshianana to. Kadi udi mua kuyilamina anu bena dîku diebe anyi bantu baudi muende nabu.
5. Mêba a dikisha, kanudi biakudia bia bujitu to bua kabilu kunupangisha bua kuteleja bilenga ndongamu wa mu mapingaja. Nuamanya, diukuta ditu difila tulu.—Luka 8:18.
6. Mankenda atu apa Yehowa lumu. Ku ndekelu kua tshitupa tshionso, muntu yonso neangule mabeji ne bintu bikuabu bia bukoya ne kubiela mu miaba mibilongoluela, bua muaba wa mpungilu kushalawu ne mankenda.—1 Pet. 1:15, 16.