Mua kuyisha mu bulongolodi ebu budi buenda anu bushintuluka
1 Malu adi mua kushintuluka lukasa be! Mu mupodi wa dîsu, tshipupu kampanda, lutatu lua malu a mpetu, dinyanguka dia malu a tshididi anyi malu makole adibu bamanyisha mu ngumu bidi mua kulua mayuki adi enda mukana mua bantu. Bantu badi mua kutuma ntema yabu ku malu makuabu ne lukasa. (Bien. 17:21; 1 Kol. 7:31) Mu bulongolodi ebu budi buenda bushintuluka anu kushintuluka, ntshinyi tshitudi mua kuenza bua kukoka ntema ya bantu bua kumona mua kubayisha mukenji wa Bukalenge?
2 Tukebayi bua kumanya malu adi atamba kutatshisha bantu: Mushindu umue wa kukoka ntema ya bantu ngua kuakula nabu bua mianda idi yenzeka idibu bamanye. Pavua Yezu ubela bantu bavua bamuteleja bua kuelabu meji bikole pa bivua bitangila ngikadilu wabu ku mêsu kua Nzambi, wakatela umue musangu njiwu ivua mienzeke tshikondo tshiabu atshi itshivuabu bavuluke. (Luka 13:1-5) Bia muomumue, patudi tuyisha lumu luimpe, nebikale bimpe bua tuetu kubueja mu diyukila dietu mianda idi ipitakana anyi bualu bua muaba utudi budi butangila bantu ba mu teritware wetu. Kadi patudi tuakula bua malu au bidi bikengela tuikale ne budimu bua katulu kutua ku tshia bena tshididi anyi ku tshia bantu kampanda nansha.—Yone 17:16.
3 Mmunyi mutudi mua kumanya malu a matuku etu aa adi bantu batamba kuelela meji? Pamuapa mushindu mutambe buimpe ngua kuela anu lukonko patupu ne pashishe kuteleja. (Mat. 12:34) Kudifila kudi bantu nekutufikishe ku dimanya mmuenenu wa bakuabu ne kukonka malu makuabu ne budimu. Muntu udi mua kuamba bualu mu mpukapuka budi mua kuleja tshidi dijinga dia bantu ba bungi ba muaba udiye budi mua kupetesha mushindu wa kuyisha.
4 Tudilongololayi mua kutuadija diyuki ne bantu: Patudi tudilongolola bua mudimu wa buambi mu bulongolodi ebu budi buenda anu bushintuluka, tudi mua kuangata mukanda wa Comment raisonner. Mu mukanda eu mudi ngenyi mimpe ya mushindu wa kubueja mu miyiki yetu malu adi enzeka, ne ngenyi eyi idi mu dibeji dia 9 muinshi mua ka-tshiena-bualu ka “Actualité” ne mu dibeji dia 11 muinshi mua ka-tshiena-bualu ka “Crime/Sécurité.” (Anyi kakanda ka Mua kutuadija ne kutungunuka ne mayuki pa Bible mu dibeji 4, ka-tshiena-bualu ka “Dibunda bibawu/Dikubibua,” ne mu dibeji 5, ka-tshiena-bualu ka “Mianda idi yenzeka”) Tudi mua kupeta kabidi malu a nunku mu Mudimu wetu wa Bukalenge wa Kabitende 2000, dibeji dia 8. Paudi ulongolola diyuki diebe ne bantu, wangate mvese udi mudikumbanyine.
5 Patudi tutabalela malu adi enda ashintuluka adi mu ngenyi ya bantu ba mu teritware wetu, nebikengele bua tuetu kuenza muetu muonso bua kuyisha bantu lumu luimpe bienda pamue ne mine malu au. Mushindu au ke utuakula ne bantu malu adi mabimane pa mutshima. Nanku netuambuluishe bantu ba bungi bua bamanye Eu udi ngikadilu yende ne mêyi ende kabiyi bishintuluka.—Yak. 1:17.