Tupeshayi Yehowa tshidi tshitambe buimpe
1 Mikenji ya Yehowa kudi bena Isalele ivua ilomba ne: nyama uvuabu ne bua kumulambula ikale ‘kayi ne tshilema.’ Kabavua banyisha nyama uvua ne tshilema to. (Lew. 22:18-20; Mal. 1:6-9) Pavuabu bafila mulambu, bitupa bia nyama bidi bidisha mubidi, mmumue ne: mafuta onso, bavua babilambula Yehowa. (Lew. 3:14-16) Bu muvua Yehowa muikale Tatu wa bena Isalele ne Mfumu Munene, uvua muakanyine bintu bimpe.
2 Anu bu mu bikondo bia kale, lelu’eu Nzambi udi kabidi utangila bulenga bua milambu yetu itudi tufila. Mudimu wetu udi ne bua kuleja kanemu katudi naku kudi Yehowa. Nansha nanku, nsombelu itu ishilangana bilondeshile muntu ne muntu. Kadi, tudi ne mushindu wa tuetu kuditangila ni tudi tumupesha tshidi tshitambe buimpe.—Ef. 5:10.
3 Mudimu muenza ne muoyo mujima: Bua mudimu wetu wa buambi kutumbishawu Yehowa ne kulengawu mitshima ya badi batuteleja, kawena ne bua kuikala wa tshidingishilu to. Mutshima muwule tente ne dianyisha ke udi ne bua kupatula mêyi bua Nzambi wetu ne bua malu ende manene adiye mulongolole. (Mus. 145:7) Malu aa adi aleja mudibi bia mushinga wa bungi bua kumona mua kulama programe wetu muimpe wa dibala ne dilonga Bible.—Nsu. 15:28.
4 Kupesha Yehowa tshidi tshitambe buimpe kudi kumvuija kabidi kuikala ne dinanga bu didiye nadi bua bantu. (Ef. 5:1, 2) Dinanga dia bantu neditusake bua kuenza muetu muonso bua kubamanyisha mukenji wa bulelela udi ufila muoyo. (Mâko 6:34) Neditusake bua kuleja mutudi tuditatshisha bua bantu batudi tuambila bulelela ebu. Neditusake bua kushala babavuluke kunyima kua bamane kuyukila nabu musangu wa kumpala ne bua kubapinganyina ne lukasa luonso. Neditusake bua kuenza muetu muonso bua kubambuluisha bua baye kumpala mu malu a mu nyuma.—Bien. 20:24; 26:28, 29.
5 ‘Mulambu wa kumutumbisha nawu’: Mushindu mukuabu wa tuetu kupesha Yehowa tshidi tshitambe buimpe ndidifila dietu ne lukunukunu mu mudimu wa buambi. Tuetu badilongolole bimpe ne bikale ne muoyo ku mudimu wetu wa buambi, tudi mua kuenza mudimu mulenga mu bikondo bitudi mua kupeta dîba. (1 Tim. 4:10) Didilongolola bimpe didi mua kutuambuluisha bua kuakula bipepele ne kutuishisha bantu, pamu’apa bafika ku dianyisha bitudi tuamba. (Nsu. 16:21) Patudi tumanyisha lumu luimpe ne bakuabu, mêyi atudi tuamba ne muoyo mujima, tudi mua kuabikila ne bululame buonso ne: ‘mulambu wa kumutumbisha nawu.’—Eb. 13:15.