Tumbisha Yehowa mu disangisha dinene

1, 2. Mpungilu yetu ya distrike itu itupetesha tshinyi ne mishindu kayi itudi mua kukumbaja bualu ebu?

¹ Mpungilu yetu ya distrike ya tshidimu tshionso itu itupetesha mushindu muimpe wa dikema wa kutumbisha Yehowa. Tudi ne meji a muomumue ne a Davidi, wakamba ne: “Nenkusakidile mu disangisha dinene dia bantu; nenkutumbishe munkatshi mua tshisumbu tshinene tshia bakole.” (Mus. 35:18) Mmunyi mutudi mua kuleja ne: buobumue buetu budi butumbisha Yehowa mu Mpungilu wetu wa Distrike wa “Tutumikilayi Nzambi” ukadi pabuipi?

² Umue mushindu utudi mua kuenza nunku nku ngikadilu yetu. Batangidi bakuabu ba muaba kampanda wakenzekela mpungilu wetu bakamba ne: “Patuakatangila mpungilu yenu, tuakambila bena bitendelelu bikuabu bavua basue kulua kudisangishila muaba eu bua balue kumona mudi Bantemu ba Yehowa balongolola mpungilu yabu mu mushindu muimpe mutambe.” Ku tshimuenekelu tshietu, ku buobumue buetu, ku ngikadilu yetu ne ku ngakuilu wetu wa disanka, muntu yonso wa munkatshi muetu enze muende muonso bua kupesha Nzambi butumbi budiye muakanyine.​—1 Pet. 2:12.

3, 4. Mmunyi muatuambuluisha budipuekeshi bua kuvuala mu mushindu udi muakanyine ba-ministre bena Kristo mu mpungilu ne kunyima kua ndongamu wa dituku dionso?

³ Tshimuenekelu tshietu: Ku mvuadilu wetu ne ku ndengejilu wetu wa mubidi tuleja ne: tudi tutumbisha Yehowa udi utulomba budipuekeshi. (1 Tim. 2:9) Mukanda wa Kalasa ka mudimu mu dibeji dia 132, udi wamba ne: “Muntu udi ne bupuekele kêna unyingalajangana kapayi bualu anyi ukeba ne: bantu bamumone anu yeye nansha.” Mu matunga a bungi, mvuadilu ya budiambi idi kayiyi miakanyine mmitule mipuwe. Kadi, Yehowa udi wanyisha mushindu utudi tuditatshisha bua kuenza malu adi aleja ne: tudi baleji-mpala bende bimpe. (Bien. 15:14) Nansha mpungilu mua kuenzekela mu muaba wa manaya anyi mu muaba wa dijikijila lutetuku, dikala dietu pamue ndilue “disangisha dinene” mu matuku onso asatu a mpungilu aa. Bu mutudi tudisangisha kumpala kua Yehowa, tudi ne bua kuikala ne mvuadilu wa kanemu kadi kakanyine Mfumu Mutambe bunene wa diulu ne buloba.​—1 Kul. 29:11.

⁴ Tudi ne bua kutabalela kabidi tshimuenekelu tshietu kunyima kua ndongamu wa dituku dionso. Nansha tuetu basue kuvuala bilamba bia munyi patudi basue kuya kajikija lutetuku anyi kuya mu restoran kampanda, tshidibi mvuadilu wetu ne ndengejilu wetu wa nsuki udi ne bua kuikale wa bantu badi ‘bamba ne: badi batshina Nzambi.’ (1 Tim. 2:10) Mvuadilu muimpe ki ngeu udi mutampakane kudi bantu bonso nansha. (1 Yone 2:16, 17) Mu mikanda yetu mudi bimfuanyi bidi bileja mvuadilu mimpe ya budipuekeshi ya kulonda ya balume ne bakaji mu bikondo bishilangane. Kuvuala kamanyinu ka mpungilu mu tshimenga mudi mpungilu wenzekela kudi kutuvuluija ne: tudi ba-ministre bena Kristo dîba dionso.​—2 Kol. 6:3, 4.

5, 6. Mmunyi mutudi mua kuleja kanemu bua mesa a mu nyuma a Yehowa?

⁵ Kanemu bua mesa a Yehowa: Mukalenge Mutambe bunene wa diulu ne buloba mmutulongoluele didia dinene. (Yesh. 25:6; 1 Kol. 10:21) Tuetu bikale tuangata ne mushinga wa bungi muaba utudi nau ku mesa a mu nyuma a Yehowa, tshipatshila tshietu netshikale tshia kubuela mu mpungilu matuku onso asatu. Ukadiku mudilongolole bua muaba wa kulala, bua makuta a njila ne bua kulomba dikisha ku mudimu anyi? Udiku ne dîba dikumbane bua kudilongolola ne kumona mua kuenza luendu bua kufika muaba udi mpungilu wenzekela kumpala kua dîba ne kupeta muaba wa kusomba, bua kumona mua kudisangisha ne bana benu bua kutumbisha Yehowa padibu batuadija ne musambu ne benza disambila dia ntuadijilu anyi?​—Mus. 147:1.

⁶ Kanemu katudi naku bua mesa a Yehowa nekatusake bua kuteya ntema ku programe mujima ne kubenga kuenza mutoyi, kubenga kudia anyi kutua eku ne eku padi ndongamu wenda wenzeka. Ku diambuluisha dia kasumbu ka mupika wa lulamatu ne wa budimu, Yehowa mmulongolole biakudia bia mu nyuma bitudi nabi dijinga mpindieu. (Mat. 24:45, NW) Katuena ne bua kupangila tshitupa nansha tshimue tshia programe eu. Baledi badi ne bua kusomba pamue ne bana babu bua bamone mua kulonda programe bimpe.​—Dut. 31:12.

7. Ntshinyi tshidibu batulombe bua kuenza bua biakudia bia mu midi ne mbua tshinyi?

⁷ Mbilombibue bua tuetu kulua ne biakudia bia kudia mu tshikondo tshia dikisha dia mu midi pamutu pa kulua kubikebela muaba udi mpungilu wenzekela. Badi bela bawetu ba bungi bavua balonde mubelu eu tshidimu tshishale kalumbandi. Ki mbimpe bua bantu bonso batumikila kabidi mubelu eu tshidimu etshi anyi? (Eb. 13:17) Mushindu udibu balongolola malu eu udi utupetesha mushindu muimpe wa kualabaja malanda ne bana betu ne kuikala mu buobumue ne mu ditalala bua kutumbisha Yehowa.​—Mus. 133:1.

8, 9. Mmushindu kayi wa kutumbisha Yehowa utudi mua kupeta mu mpungilu?

⁸ Diyisha padi mpunga umueneka: Patudi tuya anyi tualukila mu mpungilu, tudi ne mpunga ya bungi ya kutumbisha Yehowa ne mishiku yetu. (Eb. 13:15) Patudi tudia mu restoran kampanda peshi tuyukila ne muntu mu nzubu wa tshiala benyi, tudi mua kukeba mushindu wa tuetu kuyisha. Meji etu ne mitshima yetu nebikale anu ku malu a mu nyuma atudi bapete mu mpungilu. Tuambilayi bantu batudi tupetangana nabu mu mpukampuka malu mimpe aa.​—1 Pet. 3:15.

⁹ Tudi bindile ne mioyo kulukulu bua kutumbisha Yehowa mushindu’eu mu ‘masangisha a bantu bande.’ (Mus. 26:12) Tutumbishayi Yehowa mu buobumue mu Mpungilu wetu wa Distrike wa “Tutumikilayi Nzambi.”

[Kazubu mu dibeji 5]

Malu a kuvuluka bua Mpungilu wa Distrike

▪ Mêba a programe: Programe neatuadije pa dîba 9:30 mu dinda matuku onso asatu. Nebunzulule biibi pa dîba 8:00 mu dinda. Minite mikese kumpala kua ndongamu kutuadijaye, mulombodi wa tshitupa etshi neasombe ku tshiakuidi padi mijiki ya Bukalenge yenda idila. Tuetu buonso tudi ne bua kusomba pa miaba yetu bua programe kutuadijaye bimpe. Programe neajike pa dîba 5:05 wa dilolo mu Ditanu ne mu Disambombo, kadi mu Dia lumingu neajike pa dîba 4:10 wa dilolo.

▪ Mapa: Mfranga mivule mmituke bua kulongolola mpungilu wa distrike. Tudi mua kuleja dianyisha dietu pa kufila mapa a budisuile bua mudimu wa dibaka dia Nzubu ya Bukalenge udi wenzeka pa buloba bujima anyi bua mpungilu.

▪ Biakudia bia mu midi: Mbimpe kutuala biakudia bidi kabiyi bia bujitu, tshilejilu bu mudi: mampa (mikate), bimuma (bibote), tumbele, bitumbula anyi kato. Biakunua bu mudi mâyi, kafe, anyi tshiayi nudi mua kulua nabi biela mu bintu bidi kabiyi mua kutayika bua kuepuka njiwu. Ki mbimpe kulua ne maluvu bua kunua mu mpungilu to. Tuetu badiluile ne bietu biakudia ne biakunua mu mpungilu, katuakujinga bua kubisumba kudi bapanyishi ba bintu to. (Suaku umanye ne: Ki mbanyishe nansha kakese bua bapanyi ba biakudia babuele muaba udi mpungilu wenzekela.​—Yone 2:13-17.) Aba badi balambila biakudia pa muaba wa mpungilu badi ne bua kuanji kupeta dianyisha kudi bana betu badi batangila malu a mpungilu bua babaleje muaba udibu mua kulambila. Tuikalayi ne budimu bua kuepuka njiwu.​—Luka 10:38-42.

▪ Mankenda: Bidi bimueneka ne: bawetu batu baya kusumba biakudia kudi bapanyi ba bintu batu bimansha bintu tshianana tshianana panshi. Ke muaba wa mpungilu ulua kuula tente ne mabeji, tubudimbu, bikopokopo ne bikuabu binudi bamanye. Biasua muntu kusumba biakudia ebi kudi bapanyi ba bintu (tshilejilu: mbombo, bisikwi, tuto, makopo a misangi anyi bintu bikuabu), udi ne bua kuimansha bizubu mu tshintu tshidibu balongolole bua kuelela butshiafu kadi ki mpanshi to. Kadi bituamona ne: muntu kampanda mmuimanshe mabeji panshi anyi muimanshe tubudimbu mu mashinde, tudi ne bua kumbusha bintu ebi ne kubiela mu tshintu tshia kuelela butshiafu. Tuenzayi muetu muonso bana betu bua kulama muaba wa mpungilu ne mankenda. Mankenda mbualu bua muntu yonso. Muntu yonso yeye muikala uditashisha bua mankenda ku ndekelu kua dituku, muaba wa mpungilu neushale ne mankenda. Tudi basue kuleja ngikadilu ya Nzambi wa tshijila utudi tutendelela.​—1 Pet. 1:15, 16; Ekes. 19:10; Dut. 23:14.

▪ Baledi ne bana: Bantu bavua bakema bikole pa kumona bana basombe balonda programe ne ntema yonso ne bikale bafunda amue malu ne balonda dibala dia mvese mu Bible yabu. Kanuena ne bua kulekela bana nkayabu to. Padibu basue kuya ku nkumba muledi umue anyi muntu mukole mukuabu udi ne bua kuya kubafila. Mbimpe tuikale kabidi ne etu mâyi a kunua bua kuepuka dijuka bua kukeba mâyi padi programe wenda wenzeka. Mu tshikondo tshia dikisha, tudi ne bua kutabalela bana betu bua kabikadi babanda bapueka banyemakana mbilu bifuane bakuluka anyi bakuluisha bakuabu. Kuikala bena tshimvundu kudi mua kulela tunyinganyinga ne kupendesha dîna dia Yehowa. Ngikadilu yetu mimpe idi itumbisha Yehowa Nzambi wa bulongame.​—1 Kol. 14:40.

▪ Dikuata mêyi ne bindidimbi: Kanuena mua kuasa tshiamu tshia mushindu kayi wonso ku nshinga ya nzembu ya biamu bidibu benza nabi mudimu muaba wa mpungilu to. Bintu ebi bia dikuata nabi mêyi anyi bindidimbi nudi mua kuenza nabi mudimu mu mushindu wa kubenga kufila ditanaji kudi bakuabu.

▪ Telefone ya ku bianza: Telefone ya ku bianza kayena ne bua kufila ditanaji nansha.

▪ Miaba ya kutudila: (1) Ki mbimpe bua bantu ba bungi kusombabu ku nzubu umue anyi kulalaku kabiyi ku dianyisha dia udi mubakidile to. (2) Paudi usua kushipa dilomba diuvua muenze dia muaba wa kulala, suaku umanyishe bualu ebu kumpala kua dîba. (3) Kumpala kua wewe kulamba, lomba dianyisha kudi muena nzubu anyi kudi bana betu badibu bomekela bujitu bua kutangila malu a miaba ya kulala ku Nzubu wa Bukalenge bu bikalabu balongolole malu mushindu’eu. (4) Ki mbimpe kunyangakaja biakudia bilongolola bua benyi to. Ikala ne nkatshinkatshi mu ngenzelu webe wa malu. (5) Mankenda mmuanabu ne dilamata Nzambi. Misangu yonso, komba muaba webe uudi uladila ne uushiye ne mankenda. Muanda eu udi utangila kabidi Nzubu wa Bukalenge bikalabu balongolole bua bana betu badi bafuma mu bisumbu bia kule kutudilabu muaba eu. (6) Leja mamuma a nyuma muimpe mu malanda ebe ne bakuabu, aleje kudi udi mukuakidile, kudi bena Kristo nebe bakuabu ne aba banudi nabu muaba umue.​—Gal. 5:22, 23.