Programe wa dîku bua dikonkonona dia mvese wa ku dituku
1 Baledi badi banange bana babu batu benza muabu muonso dituku dionso edi bua kubapesha biakudia. Kadi kubapesha biakudia bia mu nyuma bidi bifuma mu Dîyi dia Nzambi kudi kuoku ne mushinga wa bungi menemene. (Mat. 4:4) Kulongolola dîba dituku dionso bua kukonkonona mvese wa dituku ne mumvuija ende pamue ne bena mu dîku ng’umue wa ku mishindu inudi mua kuambuluisha bana benu bua kujingabu biakudia bia mu nyuma ne ‘kudiundabu too ne ku lupandu.’ (1 Pet. 2:2) Ndîba kayi dinudi mua kuikala nukonkonona mvese wa dituku mu dîku?
2 Dîba dia biakudia: Kutuadija dituku ne dikonkonona dia mvese kudi mua kuambuluisha bena mu dîku dienu bua kuvuluka Yehowa dituku adi dijima. (Mus. 16:8) Mamu kampanda wakangata dipangadika dia kuikala ubala mvese wa dituku ne mumvuija ende ne kusambila pamue ne muanende wa balume dîba divuaye unua tshiayi kumpala kua kuyaye mu kalasa. Malu aa akambuluisha muana eu bikole bua kubenga kubuelakana mu malu a buena ditunga, kumuambuluishawu bua kubenga kuenda masandi nansha muvuabu bamulobesha ne kupetaye dikima dia kuyisha balongi nende ne balongeshi. Nansha muvuaye nkayende Ntemu mu tshilongelu atshi, kavua muanji kudiumvua nkayende nansha.
3 Bikalaku kakuyi mushindu wa kukonkonona mvese wa dituku mu dinda, nudi mua kumukonkonona ne bena mu dîku ku ndekelu kua dituku pamuapa dilolo dîba dia kudia. Bamue batu bayukidilangana kabidi dîba adi amue malu adi asankisha avuabu bapete mu buambi anyi mu dibala diabu dia Bible. Ba bungi batu bamba ne: bikondo bitubu badia pamue ne bena mu mêku abu bitu bia disanka divule.
4 Butuku: Bua amue mêku tshikondo tshimpe tshia kukonkonona mvese wa dituku mbutuku kumpala kua kulala. Ntshikondo tshimpe kabidi bua kusambila pamue. Padi bana benu banumvua nuakula bua Yehowa ne nusambila dituku dionso edi, Yehowa udi ulua muntu mulelela ku mêsu kuabu.
5 Yehowa abeneshe bionso binudi nuenza bua kubueja bulelela munda mua bana benu panudi nuenza mudimu bimpe ne kakanda ketu ka Tukonkononayi Mifundu dituku dionso.