Idikija Mulongeshi Munene paudi ulongesha ne mukanda wa Bible ulongesha
1. Mmunyi muvua Yezu ulongesha?
1 Yezu mmulongeshi munene uvua umvuija bantu malu bimpe mu mushindu mupepele. Bua kuelesha bantu meji, uvua imue misangu wanji ubakonka muvuabu pabu bela meji (Mat. 17:24-27), ubambila malu a mu Mukanda wa Nzambi (Mat. 26:31; Mâko 7:6), utshintshika, kayi ulongesha bayidi bende malu mapite bungi musangu umue to, bualu uvua mumanye ne: nebatungunuke anu ne kualonga. (Yone 16:12) Yezu uvua kabidi uditatshisha bua kumanya bayidi bende ni bavua bumvua bimpe bivuaye ubalongesha ne babitaba. (Mat. 13:51) Mbenze mukanda wa Bible ulongesha bua tuetu kumona mua kulongesha petu mushindu au.
2. Mmushindu kayi utudi mua kulongesha ne nkonko idi ku ntuadijilu kua nshapita yonso?
2 Nkonko idi ku ntuadijilu: Panudi nutuadija kulonga nshapita kampanda ne muntu, mbimpe kuanji kuela nkonko idi muinshi mua tshiena-bualu. Udi mua kuela nkonko ayi kuyi ukeba bua muntu au kuyandamunayi to, uyela anu bua kumujula nyota tshianana. Anyi, udi mua kumulomba bua kuyandamuna mu mêyi makese patupu. Kukokianganyi nende pa bidiye wamba anyi kujinga bua kumuleja diandamuna dimpe padiye wandamuna bibi to. Muela anu tuasakidila bua mandamuna ende ne tuadijayi diakamue kukonkonona nshapita au. Mandamuna ende a nkonko eyi neakuambuluishe bua kumanya ni kudi miaba iudi mua kuimanyina bikole mu nshapita au.
3. Ntshinyi tshitudi ne bua kuenza bua dilonga kuikaladi dipepele?
3 Mvese: Dilonga didi ne bua kuimanyina pa Bible. (Eb. 4:12) Kadi kabiena ne mushinga bua kubala mvese yonso idi mu bikoso to. Nubale anu idi ishindika malongesha manene a mu Bible. Mvese idibu bafile anu bua kumvuija amue malu patupu kayena anu ne bualu bua nuenu kuyibala to. Mukanda wa Bible ulongesha udi uleja malu mu mushindu mupepele menemene. Enza bua dilonga dikale dipepele. Imanyina anu pa malu manene, kuakudi bikole pa tumalu tukese anyi kusakidila malu makuabu adi kaayi ne mushinga mu dilonga to.
4. Ndîba kayi ditudi mua kubala anyi kubenga kubala malu adi mu tshisakidila?
4 Tshisakidila: Tshisakidila tshidi ne biena-bualu 14 bidi biumvuija malu a mu imue nshapita. Nudi mua kubilonga anyi kubenga kubilonga panudi nulonga nshapita ayi. Kudi bimue biena-bualu biudi mua kuambila mulongi bua kudibadilaye, nangananga bikalaye mumvue ne muitabe tshidibu bambe mu nshapita unudi nulonga. Tshilejilu, mulongi yeye witaba ne: Yezu udi Masiya, kabiena ne mushinga bua kukonkonona tshiena-bualu tshia “Yezu Kristo ke Masiya uvuabu balaye” panudi nulonga nshapita muinayi to. Kadi kudi imue misangu inudi mua kulonga tshiena-bualu tshijima tshia tshisakidila anyi tshitupa tshiatshi mu minite mikese panudi nulonga nshapita kampanda.
5. Padibi bikengela kukonkonona malu adi mu tshisakidila, mmunyi mutudi mua kuakonkonona?
5 Padibi bikengela kukonkonona malu adi mu tshisakidila, dianjila kulongolola nkonko ya kuelamu, ne nubale bikoso anu bu munutu nuenza bua dilonga. Anyi, bilondeshile majinga a mulongi, nudi mua kutshikonkonona nende mu minite mikese panudi nulonga bua wewe kumanya ni mmumvue bivuaye mudibadile.
6. Mmunyi mutudi mua kuambulula malu a mu kazubu kadi ku ndekelu kua nshapita yonso?
6 Kazubu ka diambulula: Kazubu kadi ku ndekelu kua nshapita yonso kadi ne malu adi andamuna nkonko ya ku ntuadijilu kua nshapita. Mbimpe kubala malu adi mu kazubu aku bua kuambulula malu manene a mu nshapita au. Bana betu bakuabu batu babala tshiambilu tshionso tshidimu, pamuapa babala kabidi ne mvese udi ku ndekelu kuatshi. Pashishe balomba mulongi bua kumvuija mu mêyi makese mudi mvese au ujadika tshidibu bambe mu tshiambilu atshi. Bualu ebu budi buambuluisha mulongeshi bua kumanya bikala mulongi mumvue malu manene a mu nshapita au ne ni mmumone kabidi mushindu udi Bible ujadika malu aa. Budi kabidi bulongesha mulongi mushindu wa kuikalaye ulongesha bakuabu ne Bible.
7. Mmunyi mutudi mua kulongesha ne mukanda wa Bible ulongesha bua kukumbaja mudimu wetu?
7 Mushindu muimpe utudi mua kukumbaja mudimu udibu batupeshe wa kulongesha bantu ne kubavuija bayidi, ngua kuidikija mishindu ivua Yezu ulongesha. (Mat. 28:19, 20) Mukanda wa Bible ulongesha udi mua kutuambuluisha bua kulongesha bu Yezu. Longesha nawu bantu Bible mu mushindu mutokesha bimpe, mupepele udi usankisha.