Dilongesha 5

Balunda ba Nzambi nebasombe mu mparadizu

Mparadizu kakuikala mudi buloba butudi basombe ebu to. Nzambi kavua musue nansha kakese bua ntatu, tunyinganyinga ne makenga bikale pa buloba to. Mu matuku atshilualua, Nzambi neavuije buloba mparadizu. Kadi mmalu kayi ikala mu Mparadizu? Tuanji kumonayi tshidi Bible wamba:

Bantu bimpe. Mparadizu neikale muaba wasomba balunda ba Nzambi. Nebenzelangane malu mimpe. Nebalonde njila miakane ya Nzambi.—Nsumuinu 2:21.

Biakudia bipite bungi. Mu Mparadizu kamuakuikala nzala to. Bible udi wamba ne: “Biakudia nebivule pa buloba.”—Musambu 72:16, Mukenji Mulenga.

Nzubu milenga ne mudimu muimpe. Pa buloba bukudimuna Mparadizu, dîku dionso nedikale ne wadi nzubu. Muntu yonso neenze mudimu wamusankisha bikole.—Yeshaya 65:21-23.

Ditalala pa buloba bujima. Bantu kabakuluangana mvita to; nanku kabakufua kabidi ku mvita to. Dîyi dia Nzambi didi diamba ne: ‘[Nzambi] udi ulekesha mvita bua ijike.’—Musambu 46:8, 9.

Bukole bua mubidi. Bible udi ulaya ne: “Muena musoko [mu Mparadizu] kena wamba ne, Ndi ne disama.” (Yeshaya 33:24) Kabidi, muntu nansha umue kakuikala mulema anyi mufofo peshi muena mapapa ta kamama to.—Yeshaya 35:5, 6.

Ndekelu wa makenga ne tunyinganyinga ne lufu. Dîyi dia Nzambi didi diamba ne: ‘Lufu kaluena luikalaku kabidi, madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’—Buakabuluibua 21:4.

Bantu babi kabakuikalaku kabidi to. Yehowa udi ulaya ne: ‘Nebajimije bantu babi pa buloba, nebumushepu bena tshitungu.’—Nsumuinu 2:22.

Bantu nebanangangane, nebanemekangane kabidi. Kansungasunga, dikengeshangana, lukuka ne lukinu kabiakuikalaku kabidi to. Bantu nebikale mu buobumue ne nebalonde njila miakane ya Nzambi.—Yeshaya 26:9.