Muloñadi waKutañila Bayibolu?
BAYIBOLU hiyidi neyi mukanda wudi wejimaku—yikweti nshimbi jajiwahi kufuma kudi Nzambi. (1 Atesalonika 2:13) Neyi wukuzatisha yuma yatañishaña Bayibolu, wukuhetelamu chikupu. Kukeña kweyi kuwamukeña Nzambi kukuswejelaku nawa wukuswila kwakwihi nindi, Mukwakuhana ‘yuma yayiwahi yejima, niyamukunkulu yalala yejima.’ (Yakoba 1:17) Wukwiluka chakulomba kudi Nzambi. Neyi wudi nakukala wunateli kumona wukwashu waNzambi. Neyi wesekeja chihandilu cheyi nanshimbi yekala muBayibolu, Nzambi wukakwinka wumi wahaya nyaka.—Aroma 6:23.
Bayibolu yikweti walala wahanaña maana. Antu adizaña kwiluka kwamuBayibolu ayilubulaña kunsañu jamakudi jayulaña yihandilu yawantu amavulu. Chakutalilahu, kwiluka walala hachazatikaña neyi tunafwi kwatwilubulaña kuwoma wakwila nawu afu atela kutwikatisha hela nawu antaña jetu nimabwambu jetu afwa dehi ayandaña. (Ezekeli 18:4) Ntañishilu yamuBayibolu yakusañuka yahanaña kukundeja kudi antu afwisha ayawu akeñawu. (Yowanu 11:25) Kwiluka walala kutalisha hadi añelu atama kwatwisoñamishaña kukukala kwafumaña mukupanda nawa kwatukwashaña kutiyishisha muloña wunaswejeli kuvula makabi hamaseki.
Nshimbi yahanayi Nzambi muBayibolu yatwilejaña chakushakama mujila yayiwahi yaletaña kukooleka kwakumujimba. Chakutalilahu, kwikala “wawundisha mumesu” chaleteshaña kwikala wakola lwakumujimba. (1 Timotewu 3:2) Kuhitila ‘mukuditookesha kutama kwamujimba nikwaspiritu,’ twatondolwelaña kukisañana mujimba wetu. (2 Akorinda 7:1) Cheñi nawa, kuzatisha kufumba kwaNzambi kwekala muBayibolu kwaletaña muzañalu nikalemesha mumaluwi.—1 Akorinda 6:18.
Neyi wuzatisha Izu daNzambi, wukazañalala chikupu. Kwiluka kwamuBayibolu kwatukwashañaku kwikala awunda muyitoñojoka nikuzañalala nayuma yitukweti nawa kwahanaña kuchiñeja. Kwatukwashaña kwikala nayililu yayiwahi yidi neyi luwi, kukeña, muzañalu, kuwunda, wushona, nichikuhwelelu. (Aŋalija 5:22, 23; Aefwesesa 4:24, 32) Yililu yamuchidiwu yatwileñelaña kwikala iyala hela mumbanda wamuwahi, tata yawantu hela mama yawantu wamuwahi, mwana weyala hela wamumbanda wamuwahi.
Mwatoñojokahu dehi hayuma yidi kumbidi? Wuprofwetu wamuBayibolu watwilejaña nawu tunakushakama mumpinji yakala yamunsañu yawantu. Iwu wuprofwetu bayi neyi washimunaña hohu hachihandilu chamukaayi kamakonuku, ilaña washimunaña cheñi nawu Nzambi keña yabalumuni iseki kwikala paradisa.—Chimwekeshu 21:3, 4.
Wukwashu Hakutiyishisha Bayibolu
Hekwawu wesekahu dehi kutaña Bayibolu ilaña wayiwanaña kwikala yakala kutiyishisha. Hekwawu hiweluka kwakutala muBayibolu kulonda wuwani ñakwilu kumalwihu eyuku. Bayi neyi iyeyi hohu wabula kwiluka kwakuwana ñakwilu muBayiboluku. Wejima wetu twakeñaña wukwashu hakutiyishisha Izu daNzambi. A Yinsahu jaYehova, mumatuña 235 adizishaña nshimbi jamuBayibolu chawana kudi antu amavulu. Akutiya kuwaha kukukwasha nineyi nawa.
Kakavulu chekala chachiwahi kudiza Bayibolu chovu-chovu, kutachika nantañishilu yapela. (Aheberu 6:1) Chiwatwalekahu, wukutwesha kudiza chiwahi “kudya kwakola”—walala wakunama. (Aheberu 5:14) Nsañu yekala muBayibolu yalala. Nyikanda yashindamena haBayibolu yidi neyi mukanda waChumanyi Chacheni Chatañishaña Bayibolu?, wukukwashaku kutiyishisha nyikanda yamuNsona hanyitu yansañu yashiyashana.
Komana Mwatela Kwikalahu naMpinji yaKudiza Bayibolu Mulungu niMulungu?
Kudiza kwaBayibolu kakavulu akwiloñeshaña hampinji niluña dinakuteleli. Amavulu adizilaña kwakankawawu mumatalawu. Amakwawu adizilaña hanshiña. Progiramu yakudiza bayi neyi hishikola yawantu amavuluku, ilaña hikuloñesha kwadimena kwesekana nanshakaminu yeyi, nikwesekeja nachipimu chakwiluka nikudiza kweyi. Hikwekala kwesekaku, nawa hiyakukutiyisha nsonyuku. Malwihu eyi amuBayibolu akuyakula nawa wukudiza chiwatela kukundama kwakwihi naNzambi.
Hiwatela kufweta hakudiza kwaBayibolu kwamuchidiwuku. (Matewu 10:8) Akwidizishaña chawaana kudi antu amunsakililu yidi yejima niantu abula kwikala munsakililu ilaña anakukeña kwilukilahu Izu daNzambi chikupu.
Anyi atela kuwanikahu hampinji yakudiza? Chisaka cheyi chejima. Amabwambu jeyi adi ejima yiwatela kutonda kuyitambika atela kuwanikahu. Hela neyi wunakeñi, watela kudiza hohu nkaweyi.
Antu amavulu ambulañahu ora yimu mumulungu nimulungu kulonda kudiza Bayibolu. Neyi wunatweshi kuzatisha mpinji yeneni hela wukwikalaku nakapinji kantesha mumulungu nimulungu, aYinsahu atela kwinza nakukwasha.
Tunayitambiki Kulonda Mudizi
Tunayileji kulonda kuhanjeka nawaYinsahu jaYehova. Njila yimu yimwatela kwila mwenimu hikuhitila mukuyisonekela hakeyala yidi heshina. Akuloñesha kulonda muntu wumu ayilomboleña kudiza kwaBayibolu kwahetala chawaana.
□ Ntemeshelenu mukanda waChumanyi Chacheni Chatañishaña Bayibolu?
□ Mwani nkeñenu kutalisha hakudiza kwaBayibolu kwahetala chawaana.
Nsona jitunazatishi jinafumi muBayibolu yaLunda yamu 1962. Ilaña neyi mukuwana tunazatishi NW yinalondeli hansona, dikwila nawu nsonoyu yinafumi muBayibolu yawundeli yaNew World Translation of the Holy Scriptures.