Komana Munadiloñeshi Neyi Kumwekana Yikatu Yakukasumwisha?
Yikatu yakukasumwisha yinateli kumwekana kala mpinji nawa chakadi kukuhwelela. (Yak. 4:14) Dichi muntu wadihoñeshaña mumuchima nateli kudiloñesha chikupu. (Yish. 22:3) Komana mwafuukulahu chikupu kutalisha hanjila jakuukilamu jimwatela kwiteja nikusoneka njila jeniji? Vidiyo yaTransfusion-Alternative Health Care—Meeting Patient Needs and Rights chibalu chamuchiyedi chaDVD yinakwila nawu Transfusion-Alternatives—Documentary Series, anayiloñeshi kulonda yiyikwashi. Chimukutalaña, ilukenu neyi munateli kwakula malwihu analondeluhu. Hamuloña wakwila iyi vidiyo yikweti yibalu yayihi yakuladika, anvwali atela kufuukulahu neyi atela kutala iyi vidiyo nawanyana anyanya hela nehi.
(1) Muloñadi andotolu niankoñi amuyipatela chiyanakushinshikilawu chikupu hakuuka kwakusha mashi mumujimba? (2) Hanenu yakutalilahu yisatu yakuladika kwakala kwaladikiluwu chakubula kusha mashi mumujimba. (3) Muloñadi andotolu amavulu niakwakuladika mukaayi kejima chiyanakukeñelawu kuuka ayeji nikuyiladika chakubula kuyinka mashi mumujimba? (4) Indi kudiza kwakatataka hansañu jachipatela kunamwekeshidi kutalisha hakuzatisha mashi? (5) Wubanjinyi wafumaña mukuuka kwakusha mashi mumujimba? (6) Indi andotolu amavulu ahosha nawudi kutalisha hakuwaha kwakuzatisha njila jikwawu jakuukilamu chakubula kusha mashi mumujimba? (7) Chumanyi chaleñelaña kukeha mashi mumujimba, nawa chumanyi chatela kwilawu hakuuka muyeji wunakehi mashi mumujimba? (8) Indi masewuzi achinana ekala mumashi atela kuyivulisha ñahi mumujimba wamuyeji? (9) Njilanyi jazatishañawu kulonda kukehesha mashi apwekaña hampinji yakuladika? (10) Komana njila jakuuka chakadi mashi jinateli kuzatika kudi atwansi hela antu adi nayikatu yamaneni? (11) Nshimbinyi yalemeshawu nawu diyakuukilamu chachiwahi?
Chineli kwiteja kuukewa munjila jikwawu jamwekeshawu muvidiyo hichuma chatela kufuukulahu muntu yamweni kwesekeja nachinleji chindi, bayi muhembelela sampu kumwekana yikatu yakukasumwisha mwaka dinu mufuukuluhu njila yimukwiteja niyimukukaanaku. Kapetulu 7 kamukanda wunakwila nawu “Kukeña kwaNzambi” ninyikanda yikwawu kushilahu nichamukachi chaMudimu Wetu waWanta waNovember 2006 yikuyikwasha kufuukulahu chiwahi. Kufumahu neyi mwapapatishewa sonekenu yuma yimunafuukuluhu hakaadi yenu yaDPA nawa mwenda musenda kaadi yenu mpinji yejima.
[Mazu ekoku adi hefu 3]
Komana mwafuukulahu chikupu kutalisha hanjila jakuukilamu jimwatela kwiteja nikusoneka njila jeniji?