Fuukulenu Katataka Mukazati Chikupu muMudimu Wakushimwina
1. Indi mpinji yaChanukishu yalemenadi, nawa tunateli kudiloñesha ñahi?
1 Mpinji yejima yaChanukishu yatwinkaña kukooleka ‘kwakumusakilila Yehova chacheni.’ (Mas. 109:30) Komana mwakazata chikupu mumudimu wakushimwina mukakweji kaMarch kulonda mwakamwekeshi nenu mwamusakililaña Nzambi waheni ifutu danyiloña? Yinu diyi mpinji yimwatela kutachika kufukulahu.—Yish. 21:5.
2. Indenu niakwenu mwatiyili ñahi chelili akeheshuku maora akeñekaña hakuzata wupayiniya wakukwasha?
2 Wupayiniya Wakukwasha: Chaaka chinamani yipompelu yazañaleli chelukiluwu nawu maora akeñekaña hakuzata wupayiniya wakukwasha ayikehesheli muApril. Mana kwetu wumu wasonekeli nindi: “Nichidi kushikola yakusekondali nawa chankalilaña kuzataku wupayiniya wampinji yejima. Ilaña nukusonekesha kuzataku maora 30 dichi nikushamu katwa kulonda nakashikiji maora 50 mukakweji kaApril.” Muhela wumu wazataña mudimu wakumujimba mpinji yejima wasonekeli nindi: “Maora makumi asatu aswayi kuwanisha!” Chabidikiluwu iyi nsañu muhela wumu wazatileña wupayiniya kunyima wudi nayaaka yamuma 80 wahosheli nindi: “Ichi dichuma chinadiña nakuhembelela. Yehova weluka nindi muchihandilu chami nalemesha mudimu wawupayiniya.” Antu amakwawu akañenyi kuzataku wupayiniya wakukwasha emikili chikonkwanyi chakuzata chikupu mumudimu wakushimwina.
3. Chumanyi chikutuletesha kufwila kuzata wupayiniya wakukwasha muMarch, April niMay?
3 Kakweji kaMarch hikakweji kakawahi kakuzata wupayiniya wakukwasha muloña tukekala cheñi nakukooleka kwakuzata maora 30 hela 50 akeñekaña. Cheñi nawa, kutachika haMposu March 17, tukekala nakampeni kakutambika antu kwinza nakupompa nanetu haChanukishu chakekalaku haApril 5. Amavulu akatiya kuwaha muloña akeñaña kuzata chikupu mumudimu wakushimwina chakwila akakeña kuzata wupayiniya wakukwasha muApril niMay hadi maora 50 akeñekaña.
4. Tunateli kuzata ñahi chikupu mumudimu wakushimwina, nawa chumanyi chikafumamu?
4 Hampinji yaKudifukula kwaChisaka kwamelela kukalondelahu, kwila muhanjekahu wejima wenu muchisaka chimwatela kuzata chikupu mumudimu wakushimwina muchilaaka chaChanukishu nehi? (Yish. 15:22) Mulombenu Yehova kulonda yayikiswili. (1 Yow. 3:22) Neyi muzata chikupu mumudimu wakushimwina, bayi neyi mukusweja hohu kumuhameka Yehovaku, ilaña mukuzañalala chikupu.—2 Kor. 9:6.