Kampeni Kakutiyakesha Chanukishu Kakatachika haMarch 17
1. Kampeni kamuchidinyi kakatachika haMarch 17?
1 Chaaka nichaaka chidika chaChanukishu chatukwashaña kutiyakesha kufwa kwaYesu. (1 Kor. 11:26) Dichi tunakukeña netu antu amakwawu akapompi nanetu kulonda akatiyi nsañu yahosha hachawaana chaYehova chachiwahi chefutu danyiloña. (Yow. 3:16) Chinu chaaka kampani kakutambika antu kuChanukishu kakatachika haMposu March 17. Komana munakudiloñesha kulonda mwakazati chikupu?
2. Tunateli kuhosha netudi hakuhana chipapilu chakutambika nachu antu?
2 Yuma Yitwatela Kuhosha: Chachiwahi kuhosha hohu mazu antesha. Tunateli kuhosha netu: “Ankoleshi mwani. Tunenzi nakwinka chisaka chenu ichi chipapilu kulonda mwakenzi kuchidika chalema chitwanakanaña hachaaka hachaaka chakekalaku mukaayi kejima haApril 5. Kwakekala mpanji yaBayibolu yakahanawu chakadi kufwetesha yikalumbulula yuma yashikijewa hamuloña wakufwa kwaYesu nimudimu wunakuzatayi makonu. Ichi chipapilu chinakushimuna mpinji niluña kwakekalila chanukishu mwiluña detu.” Hampinji yitunakuhana yipapilu yakutambika nachu antu kuchanukishu kunsa yamulungu, tunateli kuhana nimagazini neyi chinatwesheki.
3. Tunateli kutambika ñahi antu amavulu chikupu?
3 Tambikenu Antu Amavulu Chikupu: Tukweti chikonkwanyi chakutambika antu amavulu chikupu. Zatenu nañovu kulonda mukatambiki atudizi enu aBayibolu, antu imwafuntilañaku, antaña jenu, akwenu imwazataña nawu, akwenu akashikola, antuñi nenu niamabwambu amakwawu. Aeluda amuchipompelu chenu akashimuna chakuzata mwiluña denu dakushimwina. Kampeni kitwekalaña naku hachaaka hachaaka kakutambika antu kuChanukishu kasoñaña nyikabu. Chelili mumbanda wumu yeñili mwitala dakupompela chaaka chinamani, kalama wamulejeli nindi nateli kumukwasha kulonda awani mukwakushimwina wamutambikili. Ilaña ona mumbanda wahosheli nindi kwosi muntu welukayi, watambwilili handibilu kudi muntu wadiña nakushimwina kwitala nikwitala ifuku denidi.
4. Chumanyi chikutuletesha kuzata neyena hampinji yakampeni?
4 Hadaha muntu wakenza nakupompa kuChanukishu wukenza hamuloña wachipapilu chimwakamwinka. Chili muntu wuketeja hela nehi, mukashimuna wunsahu hamuloña wakuzata nañovu. Yipapilu yimwakahanaña yikashimuna nawu makonu Yesu hiMwanta wukweti ñovu. Chimwakazata neyena chikamwekesha kudi antu ejima amwiluña denu dakushimwina, akwenu akwakushimwina, sweje-e kudi Yehova nenu mwalemesha chikupu chawaana chefutu danyiloña.—Kol. 3:15.