Chakuzatisha Nsañu Yayiwahi Yinafumi Kudi Nzambi
Buloshuwa Yayiha Yikutukwashaña Hakufuntila Kudi Antu niKutachika Atudizi aBayibolu
1. Buloshuwanyi yayiha yedikili haKupompa kwaNkambi kwadiña nakwila nawu, ‘Hembaku Muchima Weyi!’ yikutukwashaña hakufuntila kudi antu nikutachika atudizi aBayibolu?
1 Hakupompa kwaNkambi kwadiña namutu wunakwila nawu ‘Hembaku Muchima Weyi!’ twazañaleli hakutambwila buloshuwa yayiha yikutukwashaña hakufuntila kudi antu nikutachika atudizi aBayibolu. Buloshuwa yaNsañu Yayiwahi Yinafumi Kudi Nzambi yadifwana nabuloshuwa yaChakeñañayi Nzambi yinasinsuwu muloña kudiza kudumu kwakwihi. Ichi chikutukwasha kuzatisha iyi buloshuwa chiwahi hakudiza Bayibolu nawatudizi hanzi. Hela chochu, buloshuwa yaChakeñañayi Nzambi yahosheleña hayuma yakeñekaña kudi akwaKristu, yinateli kukalila atudizi amaha kwiteja, ilaña iyi buloshuwa yayiha yinakuhosha hansañu yayiwahi yekala muBayibolu.—Yil. 15:35.
2. Muloñadi chasonekelawu buloshuwa yaNsañu Yayiwahi?
2 Ayisonekelelidi? Amana kwetu mukaayi kejima akeñeleña mukanda wapela wunateli kukokola antu kunsañu yalala, nakutachika kuyidizisha mumukanda waChatañishaña Bayibolu, chitwa chitwazatishaña hakudizisha antu Bayibolu. Antu achiinaña kudiza mumukanda kakavulu akeñaña kudiza Bayibolu kuzatisha buloshuwa. Kubombelahu, chapela kutuntulula buloshuwa mumadimi amavulu.
3. Indi iyi buloshuwa yambukaku ñahi nanyikanda yikwawu yakudizamu?
3 Chayisonekawu: Nyikanda yetu yayivulu yakudizamu ayisonekaña kulonda antu atañeñamu nikutiyishisha nsañu yalala hela chakubula wakuyikwasha. Iyi buloshuwa yambukaku. Ayisoneka kulonda ayizatisheña hakudiza Bayibolu nantañishi. Dichi neyi munakumwinka muntu, chikuwaha neyi muhanjeka nindi parakalafu yimu hela ayedi. Maparakalafu amehi, dichi munateli kuhanjeka namuntu hanzi hela kumudimu. Hela chakwila chachiwahi kutachikila mukudiza 1, tunateli kutachikila kudiza hadi hejima mubuloshuwa.
4. Indi iyi buloshuwa yatukwashaña ñahi kudizisha antu kuzatisha Bayibolu?
4 Munyikanda yetu yayivulu, tunateli kuwana ñakwilu yamalwihu asonekawu mumaparakalafu. Ilaña muniyi buloshuwa ñakwilu yavula kwikala muBayibolu. Antu amavulu akeñaña kudiza Bayibolu kubadika nyikanda yetu. Dichi nsona yayivulu yinatenuwu, mazu ekalahu anayisoneki wanyi. Atela kutañewa muBayibolu. Chumichi chikuyikwasha atudizi kwiluka nawu yuma yinakudizawu yafuma kudi Nzambi.—Isa. 54:13.
5. Chalemenadi neyi ntañishi wukuloñesha chiwahi ifuku dejima dinakuyayi nakudizisha?
5 Buloshuwa yalumbulula wanyi nsona jejima. Muloñadi? Ayisoneka munjila yakukolesha kadizi kwihula malwihu kulonda ntañishi yatweshi kuzatisha wuswa windi wakutañisha. Dichi chalema kuloñesha chachiwahi ifuku dejima dimunakuya nakudiza. Mazu akusoñamisha: Bayi musweja kuhoshaku. Twatiyaña kuwaha kulumbulula Nsona. Ilaña chikusweja kuwaha neyi tumwila kadizi kulonda yalumbululi munatalishi nsona kwesekeja nachinakutoñojokayi. Neyi tuzatisha malwihu chachiwahi, tunateli kumukwasha kulumbulula mwaya nsona yejima.—Yil. 17:2.
6. Tunateli kuzatisha ñahi buloshuwa (a) mumaluña mwajinokañawu antu hadi Nzambi niBayibolu? (b) hakushimwina kwitala nikwitala? (c) kutachika kudizisha antu Bayibolu kuhitila mukuyihula neyi anakukeña kudiza? (d) hakufuntila kudi antu?
6 Kufwana nyikanda yikwawu yitwazatishaña hakudizisha, tunateli kuhana iyi buloshuwa kala mpinji hela chakwila tunakuhana mukanda wacheñi munowu ñondu. Amavulu akutiyaña kuwaha kuzatisha iyi buloshuwa hakwihula antu neyi anakukeña kudiza Bayibolu kulonda atachiki kuyidizisha hanzi. Kubombelahu, neyi chashimwinuwu hakupompa kwankambi, kuzatisha iyi buloshuwa hakufuntila kudi antu amwekesheli mpwila “kukutukwasha nankashi mumudimu wetu wakufuntila!”—Talenu yikasha yidi hamafu 5-7.
7. Munateli kulombola ñahi kadizi waBayibolu kuzatisha iyi buloshuwa?
7 Chakulombola Kudiza: Tunateli kutachika kuhanjeka kuhitila mukutaña lwihu ludi nanaambala lwasonekawu munsona jatamuka. Kuhiñahu, tañenu parakalafu ninsona jakukamika. Ihulenu malwihu amawahi kulonda mumukwashi mwiniitala kutiyishisha mwatalisha nsona. Henohu kanda muyi muchibalu chikwawu, mwihulenu mwiniitala kulonda yaakuli lwihu lunasonekuwu munsona yatamuka kulonda mwiluki chikupu neyi natiyishishi. Chikuwaha neyi mukuhanjekaña halwihu lumu hohu lwasonekawu munsona jatamuka hanjila jantesha jakusambila. Neyi munahiti dehi mpinji, tunateli kuhanjeka kudiza kwejima.
8. Neyi tunakukeña kutaña nsona, tunateli kuhosha netudi nawa muloñadi?
8 Nsona jinatenuwu jinatachiki nezu dakwila nawu “tañenu” dijinakuli chikupu lwihu lunasonekuwu munsona yatamuka. Neyi himukukeña kutaña nsona, bayi muhosha nenu, “Kapostolu Pawulu wasonekeli nindi” hela nenu, “Talenu chashimwineñahu dehi Yeremiya.” Mwiniitala nateli kutoñojoka nindi tunakutaña mazu awantu hohu. Chikuwaha neyi muhosha nenu, “Izu daNzambi dahosha nawu” hela nenu, “Talenu chashimwineñahu dehi Bayibolu.”
9. Komana twatela kutaña nsona jejima jinatenuwu hakudiza?
9 Komana twatela kutaña nsona jejima jinatenuwu ntahindi jinasonekuwu hohu nawu “tañenu”? Chumichi chikushindamena hadi kadizi. Nsona jejima jinatenuwu jikweti nkeñelu, jamwekeshaña hitwatela kuwana chikuma muBayibolu. Jejima jikweti nsañu yalema yitwatela kuhanjeka. Ilaña mpinji yikwawu, neyi kadizi wudana mpinji, mpwila, hela heluka kutaña chiwahuku chumichi chikuyileñela kutaña nsona jinatenuwu hohu nawu “tañenu.”
10. Mpinjinyi yitwatela kutachika kudiza mumukanda waChatañishaña Bayibolu?
10 Mpinji Yimwatela Kutachika Kudiza muMukanda waChatañishaña Bayibolu: Hanyima yakuhanjeka kakavulu nawa neyi twadizaña mpinji yejima, tunateli kutachika kudiza mumukanda waChatañishaña Bayibolu hela kutwalekahu mubuloshuwa yaNsañu Yayiwahi sampu tunayimanishi. Akwakushimwina anateli kufuukulahu kulonda eluki mpinji yatela kutachikawu kudiza mumukanda waChatañishaña Bayibolu. Neyi tunatachiki dehi kudiza mumukanda waChatañishaña Bayibolu, komana twatela kutachikila kumatachikilu? Hikwekala nshimbi yatanjikawu haniyi nsañuku. Muntu wudi wejima wambukaku. Hela chochu, atudizi amavulu akuhetelamu neyi mudiza nsañu yoyimu yalumbululawu chikupu mumukanda waChatañishaña Bayibolu.
11. Muloñadi wutwatela kuzatishila chachiwahi iyi buloshuwa yayiha?
11 Mukaayi mwabulañawu kushimwina chikupu nsañu yayiwahi, tukweti kukooleka kwabadika kwakushimwina nsañu yayiwahi yakwila nawu Wanta waNzambi wunakuyuula nawa keña wuleti ituña dadiha mukekala kuloña. (Mat. 24:14; 2 Pet. 3:13) Tunakuhweleli netu antu amavulu akutiyaña iyi nsañu akwiteja awa mazu onenawu akwila nawu: “O chiyasweja lubanji hamapidi nyendu yamuntu wukuleta nsañu yayiwahi, wukutiyakesha jakuwunda, wukuleta nsañu yayiwahi yayuma yayiwahi, wukushimuna wamwinu, wukumwila Ziyona nindi, Nzambi yeyi diyi Mwanta!” (Isa. 52:7) Tuzatishenu iyi buloshuwa yayiha hakutwala nsañu yayiwahi yakufuma kudi Nzambi kudi antu akweti mpwila mwiluña detu dakushimwina.
[Chikasha chidi hefu 5]
Mumaluña Mwajinokañawu Antu Hadi Nzambi niBayibolu:
● Mumaluña amakwawu, akwakushimwina awana neyi mazu akwila nawu “Nzambi” hela “Bayibolu” aleñelaña antu kukaana kuhanjeka nawu. Neyi dichekala antu mwiluña denu, chikuwaha neyi halwendu lwatachi muhanjeka hayuma yinakwakamenawu yidi neyi, nfulumendi yayiwahi, kwakuwana nsañu yayiwahi yatela kukwasha yisaka, niyuma yikamwekana kumbidi. Hadaha tunateli kuyileja buloshuwa yaNsañu Yayiwahi neyi tunahanjeki dehi nawu kakavulu kulonda tuyileji chitweluka netu Nzambi wekala kwoku nichitwatela kukuhwelela Bayibolu.
[Chikasha chidi hefu 6]
Neyi Tunakushimwina Kwitala niKwitala:
● “Nayendeli kulonda niyileji chimunateli kwiluka swayi chuma chafuukwilayi Nzambi antu kumbidi. Mwadihulahu dehi nenu Nzambi wamba kafumishahu makabi itwamonaña? [Mulekenu yaakuli.] Iyi buloshuwa yinakushimuna kumwatela kuwana ñakwilu yanilu lwihu muBayibolu. [Mwinkenu buloshuwa, nawa tañenu parakalafu yatachi mukudiza 1 hamu niYeremiya 29:11.] Komana munatoñojoki nenu chumichi chinakumwekesha nawu Nzambi wakeñaña nindi tukekali nachihandilu chachiwahi kumbidi? [Mulekenu yaakuli.] Neyi munakeñi, munateli kuhemba iyi buloshuwa. Ifuku dikwawu, twakahanjeka parakalafu yamuchiyedi kulonda twakawani ñakwilu yamuBayibolu yanilu lwihu, “Indi Nzambi wakafumishahu ñahi yuma yakabishaña antu?” Neyi chakwila mwiniitala wudi nampinji yeneni halwendu lwatachi, munateli kutaña nikuhanjeka parakalafu yamuchiyedi ninsona jisatu jamuBayibolu jidumu. Loñeshenu kulonda mwakafunti nakuhanjeka lwihu lwamuchiyedi muniku kudiza.
● “Antu amavulu akeña kulomba, sweje-e neyi akweti kukala. Komana mwalombaña mpinji yikwawu? [Mulekenu yaakuli.] Munakutoñojoka nenu Nzambi watiyaña kulomba kwawantu ejima tahindi kulomba kwawantu amakwawu kwamuneñeshaña? [Mulekenu yaakuli.] Nikweti buloshuwa yinakumwekesha chakuwana ñakwilu yamuBayibolu yanawa malwihu. [Mwinkenu buloshuwa nawa hanjekenu hamu parakalafu yatachi hakudiza 12 ninsona yineluwu nawu “tañenu.”] Komana twatiyaña kuwaha wanyi hakwiluka netu Nzambi watiyaña kulomba kwetu? Hakwila nawu tuheteli chikupu mukulomba twatela kwiluka Nzambi chachiwahi. [Yenu hakudiza 2 nawa hanjekenu hatunyitu twanyanya.] Neyi munakeñi nateli kuyishila iyi buloshuwa, ifuku dikwawu twakawana ñakwilu yamuBayibolu yanawa malwihu amawahi.”
● “Nenzi muloña antu anakwakamena yuma yikamwekana mukanu kaayi. Munakutoñojoka nenu yuma yamba kawaha? [Mulekenu yaakuli.] Antu amavulu ahayamaña hakudiza nawu muBayibolu mwekala nsañu yayiwahi yinateli kutuleñela kwikala nakuchiñeja. Awa diwu malwihu amakwawu akulawu muBayibolu.” Mwinkenu buloshuwa nawa mwilenu yatondi lwihu ludi hachipapilu chakunyima lunakeñiyi nankashi. Yenu hakudiza nawa mulejenu chitwadizaña. Mushiikenu nenu mwakafuntilaku nakuhanjeka lwihu lunalondeluhu muniku kudiza.
[Chikasha chidi hefu 7]
Esekenu Kuyihula Antu Neyi Anakukeña Kudiza Bayibolu:
● “Nayendeli hakapinji kantesha nami niyileja chitwa chachiha chakuzatisha hakudiza Bayibolu. Iyi buloshuwa yikweti kudiza 15 kunakumwekesha himwatela kuwana ñakwilu yamalwihu alema muBayibolu yenu. [Mulejenu chipapilu chahewulu nichipapilu chakunyima.] Mwesekahu dehi kutaña Bayibolu nenu muyitiyishishi? [Meulekenu yaakuli.] Taniyileji kudiza kudumu chikwapela. [Tañilenu hamu nsañu yidi muparakalafu yatachi yalwihu 3 mukudiza 3, nawa tañenu Chimwekeshu 21:4, 5. Neyi chinatwesheki hanjekenu parakalafu yinalondeluhu ninsona jinashimunuwu nawu “tañenu.”] Neyi munakeñi nateli kuyishila iyi buloshuwa. Tunayikoleshi netu mwakeseki kudiza Bayibolu hela ifuku dimu. Neyi munakeñi munateli kutwalekahu kudiza. Ifuku dikwawu twakahanjeka hakudiza kwatachi. Neyi chimunamoni iku kudiza kudi hohu hefu dimu.”
[Chikasha chidi hefu 7]
Yilejenu Antu Buloshuwa Yayiha Hakufuntilaku:
● Neyi tunakufuntila kudi muntu wamwekesheli mpwila, tunateli kuhosha netu: “Chinawahi chitunadiwani cheñi. Nayileteleña iyi buloshuwa yakulaña malwihu amavulu amawahi amuBayibolu. [Mwinkenu buloshuwa nawa mulejenu yatali hachipapilu chakunyima.] Nsañwinyi yimunatiyi kuwaha nankashi? [Mulekenu yaakuli. Kuhiñahu yenu hakudiza kunatondiyi.] Taniyileji chimwatela kuzatisha iyi buloshuwa hakuwana ñakwilu yamuBayibolu.” Mulejenu chitwadizaña kuhitila mukuhanjeka parakalafu yimu hela ayedi ninsona jinashimunuwu nawu “tañenu.” Munamoni chichapela kutachika kudizisha antu Bayibolu? Mwinkenu mwiniitala buloshuwa nawa loñeshenu kulonda mwakafuntiluku. Neyi munamanishi dehi kudiza, munateli kuhanjeka hakudiza kukwawu kunatondiyi mwiniitala hela kutachikila kumatachikilu abuloshuwa.