Munateli Kushinda Yitoñojoka Yatama Yinakuyakamisha niKuyineñesha

1-2. Kapostolu Pawulu mpinji jikwawu watiyileña ñahi, nawa kukalanyi kwamweneñayi kutwamonaña ninetu? (ARoma 7:​21-24)

YUMANYI yenzaña muyitoñojoka yenu neyi mutoñojoka hadi kapostolu Pawulu? Komana mwatoñojokaña hadi mishonali wahamuka, ntañishi wakulukila, indi kwiji muntu wasonekeli nyikanda yayivulu yamuBayibolu? Yuma yejimiyi yinakumwekesha chadiñayi. Hela chochu, Pawulu wamweneña cheñi kukala kwamukabishileña muyitoñojoka chikupu. Mpinji jikwawu niyena wazeyeleña, kuneña indi kwiji kwakama, neyi chatumwekenaña etu amavulu.

² Tañenu ARoma 7:​21-24. Mumukanda windi wayisonekeleliyi aRoma, Pawulu washimwinimu kukala kwamweneñayi kutunakumona ninetu amavulu makonu. Hela chakwila wadiña mukaKristu washinshika, walwishileña mumuchima windi nakufwila kwakukeña kwila nkeñelu yaNzambi ninekakeja dakukeña kwila yuma yatama. Kubombela haniyi njita yalwishileñayi nayu mumuchima, Pawulu mpinji jikwawu walwishileña nayitoñojoka yatama yamuneñesheleña kutalisha hayuma yakoñeliyi kunyima nihakukala kwamweneñayi kwabulileña kumana.

3. Yumanyi yitukuhanjekahu muchinu chibaaba? (Talenu nitumazu twaheshina.)

³ Hela chakwila walwishileña naniyi njita mumuchima windi, Pawulu hetejeli yitoñojoka yatamaa kuyuula yitoñojoka yindiku. Muchinu chibaaba tukuhanjeka hamalwihu analondelihu: Yumanyi yamuletesheli Pawulu mpinji jikwawu kudimona nindi ‘hinshona’? Yumanyi yeliliyi hakwila akañeshi yitoñojoka yatama? Nawa tunateli kushinda ñahi yitoñojoka yatama?

YUMA YAMULETESHELEÑA PAWULU KWIKALA NAYITOÑOJOKA YATAMA

4. Yumanyi yamuletesheli Pawulu kuditoñesha?

⁴ Yuma yakoñeliyi kunyima. Henohu kanda ekali mukaKristu, Pawulu, elukiliwu kunyima nawu Sawulu, welili yuma yaditoñesheliyi mukuhita kwampinji. Chakutalilahu, Pawulu wadiñahu hampinji yamujahileñawu Stefwanu, iyala washinshika nawa wetejeli chumichi. (Yilw. 7:58; 8:1) Cheñi, Sawulu diyi watwaminineña antu akabishileña akaKristu.—Yilw. 8:3; 26:​9-11.

5. Pawulu watiyileña ñahi hayuma yakoñeliyi kunyima?

⁵ Chekaliliyi mukaKristu, kapostolu Pawulu mpinji jikwawu wadinkeleñamu nyiloña hayuma yakoñeleliyi kunyima. Muloña wakukabisha akaKristu kunyima hadi mpinji yayilehi, chumichi chatela chamuneñesheli nankashi nihanyima yayaaka yayivulu. Chakutalilahu, hampinji yayisonekeleliyi aKorinda mukanda windi watachi hadaha mu 55 C.E., wahosheli nindi: “Ami [hinnashikilimu] kuntena nawu kapostoluku, muloña nakabishili chipompelu chaNzambi.” (1 Kor. 15:9) Chimwahitili yaaka 5, mumukanda windi wayisonekeleliyi aEfwesesa, wadilumbulwili nindi diyi wadiña “wakehelamu nankashi hakachi kawakakujila ejima asweja kukeha.” (Efwe. 3:8) Hamusonekeleliyi Timotewu, Pawulu waditeneni yomweni nindi kunyima wadiña “mukakutukana, mukakukabishana nimukakasawuntu.” (1 Tim. 1:13) Fwikijenu chatiyileñayi Pawulu neyi endela yipompelu nawa yawana antu akabishiliyi indi kwiji antaña jawantu akabishiliyi.

6. Chumanyi chikwawu chamuneñesheleña nankashi Pawulu? (Talenu nitumazu twaheshina.)

⁶ Mwiña mumujimba. Pawulu wesekejeli chuma chamuneñesheleña nankashi “[namwiña] mumujimba.” (2 Kor. 12:7) Wateneni wanyi kukala kwakweni kwaletesheli atiyeña kuyeña nankashi, hadaha kudi chikatu chakatiliyi indi kwiji kudi kukala kukwawu kwamuletesheleña aswejeña kwakama.b

7. Yiluwa yakoñeliyi Pawulu yamukañesheleña kwila yumanyi? (ARoma 7: 18, 19)

⁷ Yiluwa yindi. Pawulu walwishileña nayiluwa yindi. (Tañenu ARoma 7:​18, 19.) Hela chakwila wakeñeleña kwila yuma yayiwahi, kubula kuwanina kwamukañesheleña kwila yuma yafwilileñayi. Wetejeli nindi walwishileña nakufwila kwakumujimba ninakufwila kwakwila yuma yaloña. Hela chochu, Pawulu wazatili nañovu chikupu hakwila ahimpi. (1 Kor. 9:27) Watela watiyileña kutama nankashi neyi yaaku yatama yadiñayi nayu kunyima yisefuka cheñi!

YUMA YELILIYI PAWULU HAKWILA YASHINDI YITOÑOJOKA YATAMA

8. Nyikanda yasonekeliyi Pawulu yamwekeshaña ñahi chelileñayi hakwila yakañeshi yiluwa yindi?

⁸ Neyi chasonekayi munyikanda yindi, Pawulu watoñojokeli yena niakwawu akakwitiya chatela kukañeshawu yaaku yatama nawukwashu waspiritu yaNzambi. (Rom. 8:13; Ñal. 5:​16, 17) Pawulu kakavulu watalishileña kuyaaku nikufwila kwatama kwatela kukañeshawu akaKristu. (Ñal. 5:​19-21, 26) Chakadi nikujina, Pawulu watoñojokeleña chikupu hakuzeyazeya kwindi, wakeñakeñeleña kufumba kwamuNsona nawa wawanineña yuma yikuma yikumukwasha kwimika mushindu yiluwa yindi. Tunateli kukuhwelela chikupu netu Pawulu wazatishileña kufumba kwalejeleñayi akwawu nindi ovwahileña.

9-10. Yumanyi yamukwashili Pawulu kukañesha yitoñojoka yatama? (AEfwesesa 1:7) (Talenu nimwevulu.)

⁹ Hela chakwila mpinji jikwawu Pawulu waneñeleña, mpinji jikwawu wazañaleleña. Chakutalilahu, wazañaleleña neyi yatiya malipoti amawahi afuminineña kuyipompelu yakwakulehi. (2 Kor. 7:​6, 7) Wazañaleleña muloña wakudikunda nawakwawu akakwitiya. (2 Tim. 1:4) Nawa welukili nindi amutiyileña kuwaha kudi Yehova. Mwamweni, Pawulu wazañaleleña muloña wamuzatilileña Yehova “nachinleji chamuchima chitooka.” (2 Tim. 1:3) Nihampinji yamukasiliwu mukaleya muRoma, Pawulu wayikonkomweneni akwawu akakwitiya “[nindi azañaleleña] mpinji yejima mudi Mwanta.” (Fwili. 4:4) Mazu ahosheliyi anakumwekesha nawu bayi neyi mpinji yejima watoñojokeleña hohu hakukala kwamweneñayi nihayiluwa yindiku. Chakadi nikujina, Pawulu neyi yatachika kutoñojoka hayuma yaheña, wazatileña nañovu kumanisha oyu yitoñojoka kulonda ekali cheñi namuzañalu.

¹⁰ Pawulu watwesheleña cheñi kushinda yitoñojoka yatama muloña wakuhweleleli nindi ifutu danyiloña hichawaana chahaniniwu kukoola yena. (Ñal. 2:20; tañenu AEfwesesa 1:7.) Chafuminimu, wakuhweleleli nindi Yehova wukumwanakena kuhitila mudi Yesu Kristu. (Rom. 7:​24, 25) Hela chakwila wakoñeli yiluwa yayivulu kunyima, Pawulu watwesheli ‘kumukalakela Nzambi mudimu wajila’ namuzañalu.—Heb. 9:​12-14.

11. Muloñadi kukala kwamweniyi Pawulu chikunateli kutukoleshela?

¹¹ Neyi chichadiña kudi Pawulu, tunateli kutiya neyi mukachi kamuchima wetu mudi yuma yiyedi yinakudizuñañesha mpinji yejima. Hadaha hiyuma yitwatoñojokaña, yitwelaña, indi kwiji yitwahoshaña. Hadaha ninetu tukukeña hohu kuhosha netu, ‘Yayo-o, ami nshona!’ Muhela wudi nayaaka yamuma 20 wejina daEliza,c wahosheli kutalisha hakukala kunakulwishayi naku nindi: “Chankoleshaña nankashi neyi nitoñojoka hayuma yahitilimu Pawulu. Muchima wami wawundaña hakwiluka nami hiyami hohu wunakutiya muniyi njilaku. Ichi dichuma chikwawu chañanukishaña nawu Yehova weluka kukala kwahitañamu antu jindi.” Kufwana Pawulu, yumanyi yitunateli kwila hakwila twiikali nachinleji chamuchima chitooka nikwikala namuzañalu hela chakwila tunakulwisha nayitoñojoka yatama?

YUMA YITWATELA KWILA HAKWILA TUSHINDI YITOÑOJOKA YATAMA

12. Yumanyi yitwatela kwilaña mpinji yejima hakwila tukañesheña yitoñojoka yatama?

¹² Twalekenuhu kwikala nantanjikilu yayiwahi yakwila yuma yakuspiritu. Neyi twikalaña nantanjikilu yayiwahi yakwila yuma yakuspiritu, tukushaña nankashi maana hayuma yayiwahi. Tunateli kwesekeja kwila yumiyi nakutwalekahu kwila yuma yatukwashaña kwikala akola kumujimba. Neyi tukudaña yakuda yayiwahi, kwolojolaña mujimba mpinji yejima nawa twikalaña nampinji yeneni yakukaama, mujimba wukwikalaña kukasunuka. Munjila yoyimu, wejima wetu tweluka chitwatiyaña chiwahi neyi tutañaña Izu daNzambi mpinji yejima; kuloñesha kupompa, kuya nakupompa nikwakulahu hakupompa nawa neyi tuzataku mumudimu wakushimwina. Kwila yumiyi kwatukwashaña kukañesha yitoñojoka yatama.—Rom. 12:​11, 12.

13-14. Kukakela kuntanjikilu yayiwahi yakwila yuma yakuspiritu kunakwashi ñahi akaKristu ashinshika amakwawu?

¹³ Talenu chuma chamumwekeneni John awaniniwu nakansa yafwana hadiñayi nayaaka 39. Hakusambila, watiyili woma nankashi nikwakama. Wadihwili nindi, ‘Nateli kukata ñahi chikatu chamuchidi iwu henohu nichidi kansi?’ Haniyi mpinji, mwanindi wadiña hohu nayaaka yisatu. Yumanyi yamukwashili John kuleka kutiya muniyi njila? Wahosheli nindi: “Hela chakwila natiyileña kuzeya chikupu kumujimba, nakwashileña chisaka chami kutwalekahu kwila yuma yakuspiritu. Twayileña kukupompa kwejima, twashimwinineña mulungu-himulungu nawa twekalileña nakudifukula kwachisaka mpinji yejima hela chakwila chatupeleleleña wanyi kwila yumiyi.” Wahosheli cheñi nindi: “Neyi kudi kukala kweneni kunatumwekeni hadaha tunateli kushikena kuhayama, ilaña hakushimbula wanyi tukutachika kumona Yehova chinakutukoleshayi nichinakutumwekeshelayi kukeña. Yehova nateli kuyikolesha neyi chankolesheliyi ami.”

¹⁴ Eliza itwahanjekahu dehi wahosheli nindi: “Mpinji yejima yinayaña nakupompa nihampinji yakudiza nkawami, nanukaña nami Yehova wantiyaña nawa wankeña chikupu. Chumichi chanzañaleshaña.” Nolan, nkoñi wañinza muAfrica, wahosheli kutalisha hadi yomwenindi niñodindi Diane, nindi: “Twatwalekañahu kwila yuma yakuspiritu kwesekeja nachitwatanjika hela chakwila tunaneñi. Yehova mpinji yejima watukwashaña kumona yuma munjila yayiwahi. Twazataña nañovu kudanukisha netu Yehova wakatukwasha nikutukiswila. Tweluka wanyi chakelayi mwenimu, ilaña tweluka netu wakelamu.”

15. Yumanyi yitunateli kwila hakwila tukañeshi yitoñojoka yatama? Shimunenu chakutalilahu.

¹⁵ Kubombela hayuma yitwatachikilañahu kudiza yamuBayibolu, kudi yuma yikwawu yitwatela kwila hakwila tushindi yitoñojoka yatama. Chakutalilahu, fwikijenu munakukata nyima. Hakwila mukoli, kudi yuma yikwawu yimwatela kwila bayi kwenda hohu hefuku-hefukuku. Hakwila mwiluki chuma chinakuletesha nyima kukata, munateli kusandujolahu nikuhanjeka nandotolu. Munjila yoyimu, ninetu tunateli kusandujola muBayibolu, munyikanda yetu nikuhanjeka namukaKristu wapama kulonda twiluki chitunateli kukañesha yitoñojoka yatama yinatwalekihu kusefuka. Tuhanjekenu hayuma yikwawu yinateli kutukwasha.

16. Yumanyi yinateli kuyikwasha kwiluka chuma chinakuyiletesha kwikala nayitoñojoka yatama? (Isamu 139:​1-4, 23, 24)

¹⁶ Lombenu kulonda mwiluki yuma yinakuyikabisha. Mwanta Davidi welukili nindi amwilukili chachiwahi kudi Yehova. Dichi Davidi wamulombeli Yehova nindi yamukwashi kwiluka yuma yaletesheleña yekaleña ‘nayitoñojoka yakwakama.’ (Tañenu Isamu 139:​1-4, 23, 24.) Ninenu munateli kumulomba Yehova kulonda ayikwashi kwiluka yuma yinakuletesha mwikaleña nayitoñojoka yakwakama nikwiluka chimunateli kuyikañesha. Munateli kudihula nimalwihu chidi neyi: ‘Chumanyi chinakuletesha nikaleña nayitoñojoka yakwakama? Kudihu chuma chansañumunaña kutachika kwikala nayitoñojoka yatama? Komana natwalekañahu kutoñojoka hayuma yatama chatela nileki kutoñojokahu?’

17. Nyitu yamuchidinyi yimwatela kudizahu yikuyikwasha kutoñojoka hayuma yayiwahi? (Talenu nimwevulu.)

¹⁷ Dizenu nsañu yinateli kuyikwasha nakukala kumukweti. Mumpinji-mumpinji, chinateli kuyikwasha neyi mudizaña hayilwilu yikwawu yaYehova. Chakutalilahu, kutoñojoka hefutu danyiloña nihachanakenañayi Yehova, kwamukwashili nankashi kapostolu Pawulu. Ninenu dichimunateli kwila. Zatishenu Chitwa Chakukwasha aYinsahu jaYehova haKusandujola Nsañu hela nyikanda yikwawu yakudizamu yashindamena haBayibolu yidi mwidimi denu kulonda musandujoli hanyitu chidi neyi luwi lwaNzambi, chanakenañayi nikukeña kwindi kwakashinshi. Chimwawana yibaaba yikuyikwasha, yisonekenu nakuyisha hamu. Yishenu haswayi kumona nawa dizenuña munoyu yibaaba yimunasoneki neyi mutachika kuneña. Fwilenu kuyizatisha kwesekeja nachidi yuma muchihandilu chenu.—Fwili. 4:8.

18. Nyitu yamuchidinyi yafuukulañahu akaKristu amakwawu kudiza?

¹⁸ Eliza, itwahanjekahu dehi, wafuukwilihu nindi atachiki kudiza hadi muntu wejina Yoba ashimunawu muBayibolu hakudiza kwankawindi. Wahosheli nindi: “Nahitili mukukala kwakuvulu hampinji yoyimu neyi Yoba. Wamweni kukala kwashiyashana mukulondashana. Hela chochu, hampinji yamuzeñesheli kukala chikupu, Yoba walekeli wanyi kumushindamena Yehova hela chakwila welukila wanyi chuma chacheni chaletesheli iku kukala kumumwekeneña.” (Yoba 42:​1-6) Diane ashimunawu hakusambila wahosheli nindi: “Ami nanfumwami tunakudiza hayilwilu yaYehova munyikanda yetu. Twasakililaña muloña Yehova watuwumbaña neyi kañemi chawumbañayi ndambu. Neyi tunaneñi muloña wayiluwa yitunakoñi, twanukaña netu Yehova nakutudizisha nawa nakutukwasha kwikala antu akweti yilwilu yayiwahi. Chumichi chatukwashaña kwikala nawubwambu wakola nayena.”—Isa. 64:8.

TALILENUÑA YUMA YAYIWAHI YITWACHIÑEJAÑA

19. Chumanyi chitwatela kukuhwelela kumwekana?

¹⁹ Hela chakwila tukweti ntanjikilu yayiwahi yakwila yuma yakuspiritu niprogilamu yayiwahi yakudiza nkawetu kwesekeja nakukala kutunakuhitamu, mpinji jikwawu chineñi hela yitoñojoka yatama yinateli kusefuka cheñi. Mafuku amakwawu tunateli nikuneña nankashi! Hela chochu, nawukwashu waYehova, tunateli kukañesha yitoñojoka yinakutuneñesha neyi yitachika kusefuka. Twatela kukuhwelela chikupu netu hamafuku amavulu tukwikalaña nachinleji chitooka nawa tukuzañalalaña muchihandilu chetu nihampinji yitunakumukalakela Yehova.

20. Chumanyi chimukufwilaña kwila?

²⁰ Dichi tufwileña kuzata nañovu kubula kwiteja kukala kutunakumona, yuma yitwelili kunyima hela yiluwa yetu kulonda yitukañeshi kwikala namuzañalu muchihandilu chetu. Nawukwashu waYehova, tunateli kukañesha yitoñojoka yakwakama. (Mas. 143:10) Tunakutalila mpinji yitwakatoñojokaña hohu hayuma yakatuzañaleshaña. Hayina mpinji, ntetemena-hintetemena twakahindukaña chakadi yitoñojoka yakwakama, ilaña twakamukalakelaña namuzañalu Nzambi yetu wakukeña Yehova!