Twalekenuhu Kwila Yuma Yikuyikwasha ‘Kumwiluka Nzambi’ Chikupu

1. Yehova weluka nindi twakeñaña yumanyi muchihandilu chetu? (Matewu 5:3)

YEHOVA weluka yuma yejima yakeñañawu antu hakwila ahandi. Chakutalilahu, hakwila tuhandi chiwahi, twatela kwikala nayakuda, yakuvwala nihakukama. Neyi tukweti yumiyi wanyi nihakapinji kantesha hohu, tunateli kufwa hela chihandilu chinateli kutukalila nankashi. Yehova weluka nindi kudi chuma chikwawu chitwatela kwikala nachu muchihandilu chetu. Watuleñeli namuchima wakufwila kudiza kulonda tumwiluki nikushindamena hawunlomboli windi. (Tañenu Matewu 5:3.) Neyi tunakukeña kwikala namuzañalu walala, twatela kudizaña kulonda tumwiluki nikutwalekahu kwila mwenimu.

2. Chihandilu chetu chidi ñahi neyi chaniwu mukakulombalomba?

² Mazu akwila nawu ‘tweluka netu twatela kudiza kulonda tumwiluki Nzambi’ atalisha mudihi? Iwu mukuku wamazu awulumbulula cheñi nawu antu eluka nawu hiyatuzweñi kuspiritu. Fwikijenu kudi iwu muntu kazweñi chikupu. Navwali yakuvwala yataboka nawa nashakami kunsa yanjila nakulombalomba. Wukweti yakuda wanyi, washakamaña hohu munkanza, nawa nawufuku hakweti nikakudibutaku. Antu amutondolwelaña. Dichi nafwi chinzeya nawa hadi namuzañaluku. Iwu mukakulombalomba neluki nindi hakwila yatwalekihu kuhanda nikwikala nañovu, watela kutwalekahu nakulomba wukwashu. Munjila yoyimu, antu eluka nawu atela kudiza kulonda amwiluki Nzambi, atela kulomba wukwashu windi muchihandilu chawu. Dichi azataña nañovu hakwila ovwahili wunlomboli waYehova wenkañayi antu amukeña.

3. Yumanyi yitukuhanjekahu muchinu chibaaba?

³ Muchinu chibaaba, tukusambila kuhanjeka hayuma yitunateli kudizila kudi mumbanda mwini Fwenisiya walembeli kudi Yesu nindi yamukwashi. Iyi nsañu yahosha hadi iwu mumbanda, yashimuna yilwilu yisatu yatela kwikala nawantu eluka nawu atela kudiza kulonda amwiluki Nzambi. Kuhiñahu, tukuhanjeka hayuma yayiwahi yitwatela kwimbujola yeliliyi kapostolu Petulu nikapostolu Pawulu kushilahu niyeliliyi Mwanta Davidi, amayala adiña apama kuspiritu.

MUNTU WAMWEKESHELI KUDIZOZA, NYIKOYI NICHIKUHWELELU

4. Chumanyi chakeñeleñayi mumbanda mwini Fwenisiya nindi amwilili kudi Yesu?

⁴ Mpinji yimu, mumbanda mwini Fwenisiya wenjili kudi Yesu. Mwanindi wamumbanda “[wakabakeni] nankashi nandemoni.” (Mat. 15:​21-28) Iwu mumbanda wafukamini nakulemba kudi Yesu nindi yamukwashi. Hampinji yenjiliyi kudi Yesu, wamwekesheli yilwilu yayiwahi yitwatela kwimbujola. Tuhanjekenu hayilwilu yimu yamwekesheliyi.

5. Yilwilwinyi yamwekesheliyi iwu mumbanda, nawa chumanyi cheliliyi Yesu? (Talenu nimwevulu.)

⁵ Mumbanda mwini Fwenisiya wamwekesheli kudizoza kwakweni. Tunahoshelidi muniyi njila? Muloña wahilili wanyi hampinji yazatishiliyi Yesu chakutalilahu chamwekeneña neyi kwiji wamwesekejeleña iwu mumbanda namwana kakawa, hadaha namutapu wakanyama kahembeleñawu mumatala awakaNyuza. Mwadi kwila ñahi neyi iyenu alejeliwu awa mazu kudi Yesu? Komana mwadi kutoñojoka nenu nayihoshi kasawuntu nawa muleka nikulomba wukwashu kudi yena? Dicheliliyi wanyi. Bayi neyi wamwekesheli kudizoza hohuku, ilaña wadiña ninanyikoyu. Chumichi chamwekeni nanochu chatwalekelihu kulemba kudi Yesu nindi yamukwashi. Chumanyi chamuletesheli kwila mwenimu? Muloña wamukuhweleleli Yesu. Kafwampi, chikuhwelelu chamwekesheliyi iwu mumbanda chamuletesheli Yesu kwila chuma chakuhayamisha. Hela chakwila wahosheli nindi amutemesheli nakukwasha hohu “anyikoku ajimbala amwitala daIsarela,” Yesu wafumishili spiritu wazonda mudi mwana kaniwu mumbanda wakuNyuza.

6. Yumanyi yitunakudizila kunsañu yahosha hadi mumbanda mwini Fwenisiya?

⁶ Hakwila tumwiluki chikupu Nzambi, ninetu twatela kwikala nayilwilu yoyimu. Twatela kwikala adizoza, kwikala nanyikoyu, ninachikuhwelelu chakola. Muntu wadizoza hohu diyi wunateli kutwalekahu kulemba kudi Nzambi nindi amukwashi. Twatela cheñi kumukuhwelela chikupu Kristu Yesu niantu anakuzatishayi kulombola atumbanji twindi. (Mat. 24:​45-47) Yehova niMwanindi atiyaña kuwaha kuyikwasha kuspiritu antu amwekeshaña iyi yilwilu. (Esekejenu Yakoba 1:​5-7.) Ichi tuhanjekenu kulonda tumoni chatuloñeshelañayi Yehova yakuda yakuspiritu, chakuvwala chakuspiritu nichiswamu chakuspiritu. Tukudiza chitwatela kwila hakwila twiikali nayumiyi hampinji yitukuhanjekaña hayuma yayiwahi yeliliyi kapostolu Petulu nikapostolu Pawulu, kushilahu niMwanta Davidi.

NEYI CHELILEÑAYI PETULU, TWALEKENUHU KUDA YAKUDA YAKUSPIRITU

7. Mudimwinyi watambwililiyi Petulu, ilaña wateleleli cheñi kwila chumanyi? Lumbululenu. (AHeberu 5:14–6:1)

⁷ Talenu yuma yamumwekeneni kapostolu Petulu. Wadiña hakachi kawaYudeya asambilili kwiluka nawu Yesu wadiña Mesiya. Welukili nindi Yehova wazatishileña Yesu kuleja antu Jindi “mazu awumi wahaya nyaaka.” (Yow. 6:​66-68) Henohu Yesu kanda amusañuli nakuya mwiwulu, wamwinkeli Petulu iwu mudimu nakumuleja nindi: “Diishaña anyikoku ami anyanya.” (Yow. 21:17) Petulu wazatili iwu mudimu nakashinshi, nawa Yehova wamuzatishili cheñi kusoneka nyikanda yiyedi hanyikanda yamuBayibolu. Ilaña Petulu wateleleli cheñi kudidiisha yomweni yakuda yakuspiritu. Chakutalilahu, wadizileña munyikanda yonenewa yadiña yasonekawu dehi kudi kapostolu Pawulu. Petulu welukili nindi yuma yikwawu yasonekeliwu kudi Pawulu yadiña “yakala kutiyishisha.” (2 Pet. 3:​15, 16) Ilaña chinamwekani neyi Petulu watwalekelihu kukuhwelela nindi Yehova wukumukwasha kutiyishisha nikuzatisha “yakuda yakola” yamwoneneniwu Pawulu kusoneka munyikanda yindi.—Tañenu AHeberu 5:14–6:1.

8. Petulu welili ñahi chelili yatambwili wunlomboli wawuha kufuma kudi Yehova?

⁸ Petulu wamwekesheli hatooka nindi wamukuhweleleli Yehova nanochu chovwahililiyi wunlomboli watambwililiyi. Chakutalilahu, hampinji yadiñayi mumusumba waYopa kwashikeneneña jimbopolu, Petulu wamweni chimwenu mwamulejeliwu kudi ñimeni yaNzambi nawu yajahi anyama nawa ayidii, anyama amweneñawu nawu amajilu kwesekeja naNshimbi jaMosi. Petulu, wadiña kaYudeya kufuma tuhu kuwansi, welukili nindi kwila chuma chamulejeliwu kudi kañelu chaluwa. Hakusambila, Petulu waakwili nindi: “Inehi Mwanta, muloña kanda nideñahu dehi yuma yatama nawa yamajilu.” Kuhiñahu amulejeli nawu: “Lekaku kutena yuma yinatookeshiyi Nzambi neyi yatama.” (Yilw. 10:​9-15) Petulu wovwahilili nawa wahimpili yitoñojoka yindi. Tuneluki ñahi chumichi? Hashimbwili wanyi kufuma hamweniyi chimwenu, kwenjili amayala asatu atemesheliwu kudi Konelisu wakuNyuza nawa amulejeli Petulu nawu anamutambiki kudi nkaaka yawu nawu yayi nakuhanjeka nindi. Kafwampi, Petulu hadi kwiteja kuya nakwiñila mwitala damuntu wakuNyuzaku. AYudeya amweneña antu akuNyuza nawu amajilu. (Yilw. 10:​28, 29) Ilaña Petulu washikeneni kwiteja chejeji chachiha chamutooñekeleliwu kudi Yehova. (Yish. 4:18) Wamushimwinini Konelisu niamwitala dindi nawa wazañaleli hakumona chatambwililiwu chalala, spiritu yajila nichapapatisheweliwu.—Yilw. 10:​44-48.

9. Munjilanyi jiyedi mwatukwashilaña kwikala nachipepa cheneni chayakuda yakola yakuspiritu?

⁹ Kufwana Petulu, mpinji yejima twatela kunwaña mayeli, hela chalala chitwatachikilañahu kudiza, chaMwizu daNzambi. Twatela cheñi kwikala nachipepa chayakuda yakola yakuspiritu, dikwila nawu, chalala chinateli kumwekana neyi chakala nankashi kuchitiyisha. Dichi twikaleña nampinji yeneni yakudiza nikuzata nañovu kulonda tutiyishisheña yuma yakunama yaMwizu daNzambi, nawa chalema kwila mwenimu. Muloñadi? Muloña kwila mwenimu kwatukwashaña munjila jiyedi: Yatachi, kwatukwashaña kwiluka yuma yahosha hadi Yehova yatuleteshaña kumukeña nikumulemesha chikupu; nawa yamuchiyedi, kwatusañumunaña nankashi kulejaku antu nsañu yahosha hadi Tata yetu wamwiwulu wakutiyisha woma chikupu. (Rom. 11:33; Chim. 4:11) Yuma yeliliyi Petulu yatudizishaña chuma chikwawu chalema: Neyi tutambwila kuhimpika kwantiyishishilu yetu yachalala chaMwizu daNzambi, twatela kunyakala kuhimpa yitoñojoka niyilwilu yetu. Chitwela mwenimu, Yehova wukutwalekahu kutulombola nawa tukumukalakelaña nakashinshi.

NEYI CHELILEÑAYI PAWULU, TWALEKENUHU KUVWALA CHAKUVWALA CHAKUSPIRITU

10. Yumanyi yinabombeli mukuvwala chiwahi kuspiritu? (AKolosi 3:​8-10)

¹⁰ Hakwila tumutiyishi Nzambi kuwaha, twatela kwila chuma chikwawu chatwinkañayi Yehova: kuvwala chakuvwala chakuspiritu. Tunatalishi mudihi hakuhosha muniyi njila? Kapostolu Pawulu wasonekeli nindi twatela ‘kuvuula wuntu wetu wawukulu nakuvwala wuntu wawuha.’ (Tañenu AKolosi 3:​8-10.) Hela chochu, hanateli kuhita mpinji yeneni nawa twatela kuzata nañovu hakwila twiikali nayilwilu yamutiyishaña Nzambi kuwaha. Talenu chuma chamumwekeneni Pawulu. Kufuma tuhu kuwansi, wazatileña nañovu kulonda amutiyeña kuwaha kudi Nzambi. (Ñal. 1:14; Fwili. 3:​4, 5) Ilaña hatiyishishili mwatalisha kudifukula kudi Nzambi munjila yakeñañayiku. Muloña wakubula kwiluka ntañishilu yaKristu kushilahu nikwikala wadivwimba, kwamuletesheli kwikala ‘nakasawuntu’ nawa wekalili nayilwilu yatama yabulileña kumutiyisha Nzambi kuwaha.—1 Tim. 1:13.

11. Kukalanyi kwadiña naPawulu kwazatileñayi nañovu kulonda yakumanishi? Lumbululenu.

¹¹ Henohu kanda yekali mukaKristu, Pawulu washimbwileña wanyi nakuhila. Nsañu yekala mumukanda waYilwilu yahosha nawu Pawulu wayiheleli nankashi atumbanji twaYesu chakwila wadiña “nandulu [yakuyikabisha]. . . nawa wayitiyishileña woma nindi wakayijilumuna.” (Yilw. 9:1) Chekaliliyi mukaKristu, Pawulu wazatili nañovu kuvuula iwu wuntu windi wawukulu. (Efwe. 4:​22, 31) Hela chochu, aPawulu naBaranaba chambokelelimu, chumichi chaletesheli atachiki “kutaadeka chikupu.” (Yilw. 15:​37-39) Iku dikukala kwadiña naPawulu, ilaña walekeli wanyi kuzata nañovu kulonda yakumanishi. ‘Weteleña mujimba windi,’ dikwila nawu wazatileña nañovu hakwila akañeshi yiluwa yindi, kulonda amutiyeña kuwaha kudi Yehova.—1 Kor. 9:27.

12. Yumanyi yamukwashili Pawulu kuleka yilwilu yatama yadiñayi nayu?

¹² Pawulu watwesheli kuleka yilwilu yatama yadiñayi nayu nawa wavwalili wuntu wawuha muloña washindameneni hañovu jindi wanyi. (Fwili. 4:13) Neyi cheliliyi Petulu, Pawulu niyena washindameneni “hañovu jahanañayi Nzambi.” (1 Pet. 4:11) Hela chochu, mpinji jikwawu Pawulu wadimweneña neyi wamukunkulwayi. Ilaña neyi yaneña, watoñojokeleña hayuma yayiwahi yamwililiwu kudi Tata yindi wamwiwulu, nawa chumichi chamukwashileña kutwalekahu kuzata nañovu kwila yuma yayiwahi.—Rom. 7:​21-25.

13. Tunateli kumwimbujola ñahi Pawulu?

¹³ Tunateli kumwimbujola Pawulu neyi twanukaña netu hichikweti muloña nayaaka yitunamukalakeli Yehovaku, twatela kutwalekahu kuvuula wuntu wawukulu nakuvwala wuntu wawuha, dikwila nawu chakuvwala chakuspiritu chahanañayi Nzambi. Neyi kudi kukala kunakutukabisha, chidi neyi kuhila swayi indi kwiji kuhoshela akwetu mazu akuyineñesha, bayi tutoñojoka netu tukutwesha wanyi kumutiyisha Yehova kuwaha. Ilaña twatela kutwalekahu kuzata nañovu kulonda tubalumuki nakuhimpa yitoñojoka yetu niyilwilu yetu. (Rom. 12:​1, 2; Efwe. 4:24) Hela chochu, hampinji yitunakwila mwenimu, twanukeña ichi chikuma chalema: Kwambukaku nayakuvwala yakumujimba yatoheshañawu hela yakeheshañawu hakwila tushikimu, chakuvwala chakuspiritu chahanañayi Yehova, iyetu twatela kuhimpa hakwila tushikimu. Twatela kuhimpa chitwekala kulonda twileña yuma kwesekeja nachakeñañayi Nzambi.

NEYI CHELILEÑAYI DAVIDI, TWALEKENUHU KUSWAMA MUCHISWAMU CHAKUSPIRITU

14-15. Munjilanyi Yehova mwakiñilañayi antu jindi kuspiritu? (Isamu 27:5) (Talenu nimwevulu.)

¹⁴ Hakwila twiikali namuzañalu walala, kudi chuma chikwawu chitwatela kwila kubombela hayakuda yakuspiritu nichakuvwala chakuspiritu. Twakeñekaña cheñi kwikala nachiswamu chakuspiritu. Hichumanyi chenichi, nawa yumanyi yitwatela kwila hakwila nawu chitukiñeña?

¹⁵ Mwanta Davidi wahosheli hachiswamu chakuspiritu chahanañayi Yehova. (Tañenu Isamu 7:5.) Yehova wakiñaña antu jindi kuchuma chidi chejima chinateli kuyikañesha kumukuhwelela chikupu. Yehova wakiñaña ñahi ambuñindi kuyuma yinateli kuyitiyisha woma? Washiika nindi kwosi chitwa chanjita chakachilawu nawu ayikatishi nachu chakazatika hela hantiku. (Mas. 34:7; Isa. 54:17) Hela chakwila Satana ninowu azatañayi nawu akweti ñovu, hiyanateli kutukatisha haya nyaakaku. Hela chakwila akutujaha, Yehova wakatusañula. (1 Kor. 15:​55-57; Chim. 21:​3, 4) Yehova watukwashaña cheñi kuumika hampinji yitunakwakama kulonda tubuli kuleka kumukalakela. (Yish. 12:25; Mat. 6:​27-29) Nawa Tata yetu wukweti kukeña watwinka chisaka chakuspiritu chawamanakwetu niahela atukwashaña niakulumpi atubiñaña. (Isa. 32:​1, 2) Neyi tunenzi hamu nakupompa, kakavulu atwanukishaña yuma yitwatela kwila hakwila Yehova atukiñeña.—Heb. 10:​24, 25.

16. Yehova wamukiñili ñahi Davidi?

¹⁶ Davidi chamwovwahililiyi Yehova, amukiñili kuyuma yatama yayimwekenaña antu avulumunaña mumushikila. (Esekejenu Yishimu 5:​1, 2.) Hela chochu, Davidi chadikañiliyi nanshimbi jaNzambi, Yehova hamukiñili kuyuma yatama yafumini muyuma yeliliyiku. (2 Sam. 12:​9, 10) Davidi welili ñahi hampinji yamukabishileñawu kudi antu hakadi muloña? Wahuñunwinini muchima windi wejima kudi Yehova mukulomba, nawa Yehova wamukwashili Davidi kuleka kusweja kwakama kuhitila mukumuleja nindi wamukeña chikupu nawa wukumwakamenaña.—Mas. 23:​1-6.

17. Tunateli kumwimbujola ñahi Davidi?

¹⁷ Tunateli kumwimbujola Davidi neyi tumulombaña Yehova netu yatukwashi hampinji yitunakufuukula. Tweluka cheñi netu mpinji jikwawu twamona makabi, bayi neyi muloña Yehova nakañanyi kutukiñaku, ilaña muloña wakwila tunafuukuli chatama. (Ñal. 6:​7, 8) Nawa neyi tumona makabi hakadi muloña wudi wejima wutunakoñi, twamulejaña Yehova mukulomba yuma yejima yidi kumuchima wetu, nakukuhwelela netu wukuhemba nyichima yetu niyitoñojoka yetu.—Fwili. 4:​6, 7. 

TWALEKENUHU KWILA YUMA YIKUYIKWASHA KUMWILUKA NZAMBI CHIKUPU

18. Kukalanyi kutwamonaña, nawa yumanyi yitwatela kutwalekahu kwila kulonda tumwiluki Nzambi chikupu? (Talenu ninyevulu.)

¹⁸ Nsona yetu yachaaka cha 2026 yinakuhosha nawu: “Adi namuzañalu wowu eluka nawu atela kudiza kulonda amwiluki Nzambi.” Chalema nankashi kwila mwenimu, sweje-e makonu. Muloñadi? Muloña tunakushakama nawantu abula kwikala namuzañalu nawa akaanaña kudiza kulonda amwiluki Nzambi, indi kwiji atoñojokaña nawu anateli kwikala naniwu muzañalu kuhitila mukuya mukudifukula kwakutwamba hela kukuhwelela maana awantu. Bayi twiteja yilwilu yawu kutuluwañeshaku. Yumanyi yinateli kutukwasha? Twatela kudaña yakuda yakuspiritu yatuloñeshelañayi Yehova, kuvwala chakuvwala chawuntu wawuha nikwovwahila wunlomboli waYehova watukiñaña wudi neyi chiswamu.