Progiramu Yayiha Yefuku daKupompa Kwadimena

Chayikolesheluwu naspiritu yajila, eniKristu akusambila adiheni chikupu kulonda kushimwina nsañu yayiwahi nakutandisha chikupu. (Yil. 1:8; Kol. 1:23.) Progiramu yefuku dakupompa kwadimena yachaaka chamudimu cha 2007 yinakuhosha nawu: “Swejenu kuzatisha Izu,” yikatukwashaku kwimbujola chakutalilahu chawu chachiwahi.—Yil. 18:5.

Kuhosha hezu daNzambi, Mwanta Davidi nindi: ‘Yuma yashimunañayi Yehova yakashinshi, yaleteshaña muntu wakadi maana kuheta maana.’ (Mas. 19:7) Progiramu yinaloñeshuwu chiwahi yakupompa kwefuku dadimena ya 2007 yikakonkomwena hakulema kwaNsona ‘chiyololaña yuma mwaloña,’ nawa yikatukwashaku kuzatisha Izu daNzambi hakushimwina nikutañisha nayitoñojoka yakunyakashana. (2 Tim. 3:16, 17) Progiramu yayiha yikamwekesha chitwatela kutondolwela nyihetu nichitwatela kuhetelamu kuhitila mukuzatisha nshimbi jamuBayibolu muchihandilu. Yikatukwashaku cheñi kuzatisha Izu daNzambi nakukwashaku atwansi niamaha kulonda akuliluku lwakuspiritu.

Chiña mwakekaluku hakutachika kwaprogiramu, nawa mwakashuku kashinshi chikupu. Sonekenu yikuma yimwatela kuzatisha halwenu. Mwekeshenu kusakilila hakufumba nihayuma yimunatambwili, nawa toñojokenu hanjila yimunakufwila kuzatisha yuma yimunadizi.

Progiramu yefuku dakupompa kwadimena yikatukwasha kusweja kuhameka Izu daNzambi, yikatwanukisha kutwalekahu kushimwina nsañu yayiwahi yaWanta chikupu, nawa yikatuleja chakukwashaku amakwawu kwilamu. Dichi fwilenu kubula kushalahu wunlomboli wejima wakuspiritu nikufumba kwaYehova kunaloñeshiyi!—Isa. 30:20b, 21.