“Londelenu muMahaji aKristu!” Kupompa kwaNkambi kwawaYinsahu jaYehova Kwamu 2007
1, 2. (a) Indi Mosi wayikolesheli ñahi aIsarela kuhetelamu mukupompa hamu? (b) Yumanyi yitunateli kutachika kudiloñesha chakatataka?
1 Mosi waheni nshimbi kudi aIsarela ejima nikudi enyi yakupompaña hamu mpinji yejima muyaaka yitanu nayiyedi nakuyitañila Nshimbi. Muloñadi? ‘Kulonda kutiya, nikudiza.’ (Kuhit. 31:10-12) Yehova wadiñi nankeñelu yakupompesha antu jindi mumazanvu amaneni. Katataka antu jaYehova keña apompeña cheñi Kupompa kwaNkambi kwamafuku asatu kunakwila nawu “Londelenu muMahaji aKristu!”
2 Komana munatachiki dehi kudiloñesha? Komana munakukeña kulomba mafuku akunooka kudi ayiñija mudimu? Komana kwila mukwashaku kadizi wenu waBayibolu nehi hela antaña abula kwitiya kulonda mukapompi nawu? Kudihu amakwawu muchipompelu anakukeña wukwashu hakwila akawanikiku? Komana munakufuukula kupompela kwiluña dacheñi kwabulaña kupompela chipompelu chenu? Komana mukakeña mwakukaama? Nsañu yinalondelihu yikuyikwashaku kudiloñesha.
3. (a) Indi Isaya 25:6 yinakushikijewa ñahi makonu? (b) Chumanyi chinelukewi kutalisha hakuvula kwefuku datachi dakupompa, nawa chumanyi chitwatela kwila halwetu?
3 Wanikenuku Mafuku Ejima Asatu: Yehova wahanaña yakudya yayivulu yakuspiritu kudi antu jindi. (Isa. 25:6) Ichi chinabombelumu chawija chakuspiritu chekalañaku hakupompa kwetu kwahachaaka. Chinelukewi neyi kuvula kwawantu hefuku datachi kwekalaña mwishina nankashi kubadika mafuku amakwawu. Imikenu chikonkwanyi chakudiluñisha mafuku ejima asatu akuzañalesha akupompa kunatuloñesheli kuloñesha kwaYehova! Neyi munakukeña kulomba mafuku akunooka kumudimu wenu, chishenu mukulomba. Cheñi nawa ‘bayi mutiya woma’ wakuhosha namuntu wayiñija mudimu mukunyakala chiyabidikawu mafuku yimwakapompañaku. (1 Tesa. 2:2; Nehe. 2:4, 5) Chinateli kuyikwasha neyi mumulumbulwila nenu kupompa kwahachaaka himbadi yakudifukula kwenu. Neyi mwila mwenimu mumafuku atachi chikumukwashaku wayiñija mudimu kuhimpa hakwila yeteji kulomba kwenu.
4. Tunateli kulejaku ñahi atudizi etu aBayibolu niantaña abula kwitiya hansañu yakupompa?
4 Lejenuku Atudizi enu aBayibolu niChisaka: Chikasweja kuwaha kwikala hamu nakadizi wenu waBayibolu hakupompa, kulonda yakadimweni mesu kapu kukeña kwawumana kwetu kwawiniKristu “muchipompelu cheneni”! (Mas. 22:25) Yilejelenu chadimu kulonda atweshi kwambulaku mpinji yakuwanikaku. Yilejenu yuma yimwadiluñishaña hakuwanika kukupompa. Munateli kuleja atudizi kuhitila mukuyitalisha mavidiyo akweti yibalu yakupompa kwakunyima, sweje-e vidiyo yaUnited by Divine Teaching. Lejenuku antaña abula kwitiya niwena eluki kufuukula kwenu. Hadaha anateli kudiloñesha kulonda kutala chimwenu hela kuwanikaku hohu ifuku dimu dakupompa.
5, 6. Indi ntanjikilu yakukeheshaku yakudya yikutukwasha ñahi, nawa mudimwinyi wahalwetu wutwatela kuzata?
5 Hayaaka yinahituhu, ntanjikilu yakupompa anayipeleshuku. Atuleja kukeheshaku yiteli nikusenda yakudya yantesha heluña dakupompela. Tuneluki netu ‘yuma yantesha hohu . . . yikuwanina,’ hakwila tudiluñishi kupompa. (Luka 10:42) Kukeheshaku yakudya niyuma yitwasendaña heluña dakupompela kwakeheshañaku kuvula kwanswadi nikubula kunatola yuma heluña dakupompela. Hela chakwila wonsu wetu twatela kushaku ñovu yakuwahisha heluña hitunashakami henohu kanda tufumihu hakumana kwefuku, twatela kuhemba iluña dawunyonji nawa dadiwahi ifuku dejima.
6 Yesu hampinji yaloñesheliyi yakudya yawantu akubadika ha 5,000 yuma yendeli mukuloña nawa chelili anadyi dehi atachikili mudimu wakuwahisha. (Luka 9:14, 15; Yow. 6:10-13) Munshimbi jamwinkeluwu Mosi, amayala ashikahu ayitondeleña kutala mudimu wawunyonji mumatala akudyilamu hatembeli. (1 Kushi. 9:26) Komana tunateli kwiluka chuma chakeñañayi Yehova kudi etu? Chachiwahi kubula kunatola yipapilu hakuvuñila yakudya, nswadi, jinchupa niyifwiku, hela yindundu heluña ditunashakami. Komiti yakupompa yinatuloñesheli iluña dadiwahi kutwatela kunatila nswadi, dichi twatela kuzatisha yumiyi.
7. Chumanyi chikayikwashaku akulumpi nianyana kudiluñisha chiwahi hampinji yakunooka hachayili?
7 Mpinji yakudya hakupompa diyi mpinji yatela kuzatishawu anvwali kuhosha nawanyanawu hayikuma yamaneni yamukupompa nikuyisakilila hakushaku kashinshi kakutiyilila. (Esekejenuku fy–CW kap. 1 para. 2.) Hela chakwila anatukoleshi kwendujola nakuhanjeka kulonda ‘kudikolesha wumu namukwawu’ hampinji yakunooka, bayi mwiteja atwansi kukidimwoka hela ‘kuyileka,’ nakudiñija mukuhema kwakuleta ipumbaku.—Rom. 1:11, 12; Yish. 29:15.
8, 9. (a) Tunateli kumwekesha ñahi spiritu yakuhana yinashimunuwu ha 1 Timotewu 6:18? (b) Yumanyi yinaloñeshiwu hakukwashaku ana anakukeña wukwashu wakwakukama?
8 Kukwashaku Ana kwenu niAhela: Kapostolu Pawulu walejeli eniKristu adiña namaheta akumujimba kulonda ‘kwila chachiwahi, nakusweja kwila nyidimu yayiwahi kulonda kumona yakukwasha nachu akwawu, nakwikala nanyichima yakuhana.’ (1 Tim. 6:17, 18) Tunateli kumwekesha spiritu yakuhana yakonkomweneni Pawulu neyi tushinshika hakukala kukwetuwu atushinakaji, akata, ninana adi mumudimu wampinji yejima, yisaka yawantu ajiki, hadaha niamakwawu muchipompelu anakukeña wukwashu hakwila akawaniki kukupompa. Kukwasha antu amuchidiwu kwatela kwikala hadi antaña jetu adi muchalala, ilaña aeluda niamakwawu akuzatisha kashinshi nikukwasha nankashi anakukeña wukwashu.—Ŋal. 6:10; 1 Tim. 5:4.
9 Neyi mana kwetu muchipompelu nakukeña wukwashu wakuwana kwakukama, Komiti yaMudimu yaChipompelu yatela kufuukulahu neyi mukwakushimwina nashikuhu kuhana fomu yaKulombelahu Kapeka. Henohu kanda muyihani kuDipatimenti yatalaña Hatupeka twahakupompa, mwatela kutala nshimbi jidi hafomu.
10. Njilanyi jitwatela kulondela neyi hitukuloñesha mwakwendela?
10 Yipompelu yikwawu yafwetelaña motoka yakuyitwala kumaluña akupompela. Motoka yejima yikuzatishawu hakutwala antu anakuya kukupompa chiña yetejewa kwenda hamukwakwa nawa yakola. Bayi musweja kwinzesha motokaku. Chikuwaha neyi mana kwetu wapama akumwinka mudimu wakwikala ntwamina wakutala jañendelu. Wukaleja izanvu dejima kutalisha hantanjikilu, mpinji nikwakukandamina antu. Kakavulu kukala kwejima kukumwekana hezanvu akukwitwala kudi yeniwu mana kwetu wukuyileja mwakwilila. Muyuma yejimiyi mwakeñekaña wukwashu, kufumba, hela kumanisha kukala, amana kwetu asoñama nawa akweti kashinshi atela kwila mwenimu.
11. Wunlombolinyi wunahanuwu neyi tunakukeña kupompela kwacheñi kwabulaña kuya chipompelu chetu?
11 Kupompela Kwacheñi: Hakwila nawu kukekali yitwamu yashikila, nyikanda, tupeka mwakukama niyuma yikwawu, anayikoleshi kupompela kwapompelaña chipompelu chenu. Neyi kudi kukala kunakukeñeka nawu mukapompeli kwacheñi, dichi munakukeña kwakukama, mwani temeshenu fomu yaKulombelahu Kapeka kukupompa kumwakaya. (Talenu ndandanda yamafuku yidi hefu 5 yakupompa kwamuZambia kwachinu chaaka.) Neyi mumusumba mudi kupompa kwakuvulu, shimunenu muchidi nimafuku akupompa kwiluña kumwakapompela.
12. Chumanyi chinaleteshi kwikala nakubalumuna mumuchidi wawatumama hamaluña ayedi hohu?
12 Muchidi waWatumama: Neyi chimukumona hachikasha chinakumwekesha mafuku akupompa nimaluña muZambia, kubalumuna kwamuchidi wawatumama kukekalaku hakupompa KUYEDI HOHU, Lusaka-Engilishi niNdola-Engilishi. KWOSI kupompa kukwawu KWAKALOÑESHAWU mumuchidi wawatumamaku. Iyi nloñeshelu yaleñelaña kwikali kubalumuna kwakuwahi nawa atumama avulaña kulonda adiluñishi nikudikolesha. Aeluda niakwakubalumuna muchidi wawatumama atela kuleja atumama amuchipompelu chawu nikuyikwasha kulonda adiloñeshi hakwila akawaniki kukupompa kumu kwakabalumunañawu maprogiramu mwidimi dawatumama. Aeluda atela kudimona nakamama wamuchipompelu chawu kulonda eluki neyi nakukeña wukwashu.
13, 14. (a) Yumanyi yinatuloñesheluwu henohu kanda tushiki heluña dakupompela? (b) Tunateli kumwekesha ñahi kusakilila hanyidimu yejima yinatuzatiluwu? (Tañenu Aheberu 13:17.)
13 Zatilenu Hamu naNloñeshelu: Chitwashika heluña dakupompela, chikumwekana chikupu nawu anazati mudimu weneni wakutuloñeshela hakushikena. Ana kwetu akweti kukeña anakukalakala neyi atulama akutwimusha, nakutwinka maprogiramu, nikutuleja hakushakama. Ana kwetu niahela anawahishi iluña dejima nawa analoñeshi chinañamu. Cheñi anazati mudimu weneni wakadi kumona wakuloñesha jimpanji, nikwakamena yuma yikwawu yayivulu.
14 Hakupompa kudi kwejima, antu amavulu azataña hadi tukweji twatuvulu hakwila aloñeshi yuma yinakukeñeka, nawa yisaka yawu niyena yayikwashaña kuhitila mukuyinkaku mpinji yakwakamena yuma yalema yamuchidiwu. Komana hitwatela kusakilila hakudihana kwawu kuyamwekeshaña kulonda tudiluñishi halwetuku? Twatela kumwekesha kusakilila kuhitila mukulondela nshimbi jidi muchinu chibaba niwunlomboli wukwawu wutwatela katambwila henohu kupompa kanda. (Heb. 13:17) Antu ejima neyi akuzatila hamu mukudikeñela chikuletesha yuma yejima ‘kuyila mukutelela nawa mukuloña.’—1 Kor. 14:40.
15. (a) Muloñadi kupompa kwawantu jaYehova chikunekalili kwalema nankashi mumafuku etu? (b) Chumanyi chitwatela kwila wejima wetu hayinu mpinji?
15 ‘Chitunakumona ifuku hidikuswila kwakwihi,’ kupompa kwawantu jaNzambi kwalema nankashi. (Heb. 10:25) Hakupompa kwetu kwawiniKristu, izaza danduñu wamaana nikashinshi dahanaña nsañu yakutukwasha ‘kushaku muchima wakwila mazu ejima’ anakukeña Yehova nindi twilimu. (Kuhit. 31:12) Tachikenu kudiloñesha yoyinu mpinji kulonda mwakapompi mafuku ejima asatu aKupompa kwaNkambi kwawaYinsahu jaYehova kunakwila nawu, “Londelenu muMahaji aKristu!” nawa mwakahetelimu munshimbi yejima yakuspiritu nikudikunda kwakuwahi!
[Chikasha chidi hefu 3]
Mpinji yaKupompa
Ifuku datachi nidaMuchiyedi
8:20 hrs. - 16:15 hrs
Ifuku damuchisatu
8:20 hrs. - 15:35 hrs.