Kupompa kwaNkambi Kwawa Yinsahu jaYehova Kwamu 2008 Kunakwila Nawu “Itejenu Spiritu yaNzambi Yiyilomboleña”
1. (a) Muloñadi kufumba kwaPawulu kwafumbiliyi akwaKristu aHeberu chikunekali kwalema chikupu makonu? (Tañenu Aheberu 10:24, 25.) (b) Kukoolekanyi kudi hambidi kukatwileñela kuzatisha kufumba kwaPawulu?
1 Kapostolu Pawulu wakonkomweneni akwaKristu aHeberu kupompa nakudikolesha wumu namukwawu ‘chasweja nankashi’ chamwenuwu ifuku hidikwinza nakuswila kwakwihi. (Heb. 10:24, 25) Kudi wunsahu wunakumwekesha nawu “ifuku” dateneniyi Pawulu didi kwakwihi chikupu. Dichi dinu, tunakutalila mpinji yitwakapompa nawamana kwetu niahela kulonda tukatambwili nshimbi yakuspiritu yatela kutulombola munanu ‘mafuku akukuminina’ anasweji kutama. (2 Tim. 3:1) Tukekala nakukooleka kweniku hakupompa kwaNkambi kudi hambidi kwamu 2008.
2. (a) Muloñadi chichalemena kupompa mafuku ejima asatu? (b) Tunateli kutachika kudiloñesha ñahi kulonda tukawanikuku?
2 Wanikenuku Mafuku Ejima Asatu: Tunayikoleshi kupompa mafuku ejima asatu. Neyi ‘tubula kuleka kupompa,’ dikwila nawu tukashalahu wanyi yakudya yakuspiritu yalema. (Heb. 10:25) Tachikenu kudiloñesha chakubula kumba mpinji. Mwatela kulejela chadimu ayiñija mudimu kulonda eluki mwakwilila. Neyi anyanenu akayaña kushikola hampinji yakupompa kwankambi, yilejenu antañishi jawu chidi ndandanda yenu. Yilejenu eluki nawu kupompa kwankambi himbadi yakudifukula kwenu kwampinji yejima. Kuhwelelenu nenu Yehova wukukiswila ñovu yenu yakutwamijaku Wanta.—Mat. 6:33.
3. Indi antu amakwawu anadihani ñahi hakwila nawu awaniki kukupompa kwankambi?
3 Antu jaYehova hiyesekejaña kukooleka kwekala mukuwanika kukupompa kwankambi namaluku. Talenu yakutalilahu yawantu afukwiluhu kuwanika kukupompa kwawaYinsahu jaYehova kwamuKaayi Kejima kwamu 1958 kwadiña muMusumba waNew York (Divine Will International Assembly). Mana kwetu wumu washinkili kampani kindi kamudimu wakutuña hadi nyilungu yiyedi kulonda yayi nakuzataku mudimu wakudikeñela nikuwanika kukupompa. Mana kwetu wahaYitutu yaVirgin walandishili mpata yajiekita jitanu kulonda amuchisaka chindi ejima 6 akawaniki kukupompa. Adisumbula achidi atwansi alandishili watu wekina kulonda asendi anyanawu ejima asatu kukupompa, kutachikila namwana watukweji tuyedi kushika nikuwayaaka 7. Antu asatu evumu dimu akuCalifornia ayilejeli nawu neyi ashiya nyidimu nakuya kukupompa, chakafuntawu akayihaña nyidimu. Hela chochu, chumichi hichayikañesheli kubula kuya kukupompa kwabadika kuwahaku.
4. Munjilanyi mutwatela kukwashila amakwawu?
4 Kwashenuku Amakwawu Kuwanikaku: Pawulu wayikonkwomweneni cheñi amana kwindi ‘kuditoñojoka muntu himuntu.’ (Heb. 10:24) Komana amana kwetu niahela amwizanvu denu daKudiza kwaMukanda haChipompelu anakukeña wukwashu hakwila nawu akawaniki kukupompa kwankambi? Komana kwila mukwashaku atudizi enu aBayibolu kulonda mwakapompi nawu hela atela kuwanikaku ifuku dimu hohu nehi? Neyi muleja antaña jenu abula kwikala aYinsahu haprogiramu yenu yakupompa, yilenu mwakendeli hamu. Munateli kutambwila nkisu yayivulu muloña wakuzata nañovu.
5. (a) Tunateli kuwana ñahi nsañu kutalisha hamafuku niluña dakupompela kupompa kwankambi? (b) Chumanyi chitwatela kwila neyi tunakukeña nsañu yakupompa kwankambi kwacheñi chatela kupompela kwapompelaña chipompelu chetu?
5 Kwakuwana Nsañu: Kasanji kamutayi katambwilaña jinshiña jajivulu chaaka nichaaka kudi ana kwetu ehulaña mafuku akupompa kwankambi niiluña dakupompela. Kakavulu atemeshaña nshiña wowu amana kwetu niahela atambwila dehi iyi nsañu. Henohu kanda mutemeshi nshiña kukasanji kamutayi, sambilenu kutala muMudimu Wetu waWanta waMarch 2008. Ndandanda yamafuku akupompa kwamuZambia yidi hefu 5 muwunu Mudimu Wetu waWanta. Neyi munakukeña nsañu yidi yejima kutalisha hakupompa kwankambi kwacheñi chatela kupompela kwapompelaña chipompelu chenu, mwatela kusonekela oku kupompa kwankambi. Neyi mumusumba mwakekala kupompa kwankambi kwakuvulu, shimunenu idimi nimafuku akapompañawu kwiluña kumwakawanika.
6. Yanukishu yamuchidinyi yinatenuwu kutalisha hafomu yaKulombelahu Kapeka?
6 Kukankila Kwadimena: Neyi mukwakushimwina nakukeña wukwashu wakuwana kwakukama, Komiti yaMudimu yaChipompelu yatela kufuukulahu neyi mukwakushimwina nashikuhu kuhana fomu yaKulombelahu Kapeka. Henohu nsoneki wamuchipompelu kanda ahani fomu kuDipatimenti yatalaña Hatupeka twahakupompa, mwatela kutala nshimbi jidi hafomu.
7. Chumanyi chinaleteshi kwikala nakubalumuna mumuchidi wawatumama hamaluña ayedi hohu akupompela?
7 Muchidi wawaTumama: Neyi chimukumona hachikasha chinakumwekesha mafuku akupompa nimaluña muZambia, kubalumuna kwamuchidi wawatumama kukekalaku hakupompa KUYEDI HOHU, Lusaka-English niNdola-English. KWOSI kupompa kukwawu KWAKALOÑESHAWU mumuchidi wawatumamaku. Iyi nloñeshelu yaleñelaña kwikali kubalumuna kwakuwahi nawa atumama avulaña kulonda adiluñishi nikudikolesha. Aeluda niakwakubalumuna muchidi wawatumama atela kuleja atumama amuchipompelu chawu nikuyikwasha kulonda adiloñeshi hakwila akawaniki kukupompa kumu kwakabalumunañawu maprogiramu mwidimi dawatumama. Aeluda atela kuhosha cheñi nawatumama ejima amuchipompelu chawu kulonda eluki neyi anakukeña wukwashu.
8. Njilanyi jitwatela kulondela neyi hitukuloñesha mwakwendela?
8 Kuloñesha Mwakwendela: Yipompelu yikwawu yafwetelaña motoka yakuyitwala kumaluña akupompela. Motoka yejima yikuzatishawu hakutwala antu anakuya kukupompa chiña yetejawu kwenda hamukwakwa nawa yakola. Bayi musweja kwinzesha motokaku. Chikuwaha neyi mana kwetu wapama akumwinka mudimu wakwikala ntwamina wakutala jañendelu. Wukaleja izanvu kutalisha hantanjikilu, mpinji nikwakukandamina antu. Neyi kumwekana kukala kudi kwejima hezanvu atela kumwihula iwu mana kwetu nawa wukuyileja mwakwilila. Neyi chakwila kumwekana kukala kunakukeñeka wukwashu, kufumba, hela kumanisha kukala, amana kwetu asoñama nawa akweti kashinshi atela kwila mwenimu.
9. Munjilanyi mutwatela kumulemeshela Yehova hampinji yitudi hakupompa kwankambi?
9 Nyidimu Yayiwahi: Kwovwahila nshimbi yaYehova yakupompa nakudifukula ‘kwatuheteshaña.’ Chuma chabadika kulema, kupompa kwatwinkaña kukooleka kwakulemesha ijina daYehova. (Isa. 48:17) ‘Nyidimu yetu yayiwahi yamwekanaña hatooka,’ kudi antu amavulu hakupompa kwankambi, nawa amakwawu ashimunaña yitoñojoka yawu. (1 Tim. 5:25) Yililu yetu yayiwahi yamuzañaleshaña Nzambi yetu, Yehova!
10. Indi mukanda waMatewu 4:4 wunakonkomweni ñahi kulema kwakutiyilila nakanañachima kumpanji yejima hakupompa?
10 Yesu wahosheli nindi wumi wetu wejima washindamena hakutiyilila ‘kumazu ejima afumaña mukanwa kaYehova.’ (Mat. 4:4) Hakupompa kwetu kwankambi kwahachaaka hachaaka, Yehova watwinkaña ‘yakudya yakuspiritu hampinji yatelela,’ yaloñeshañawu kudi ‘nduñu wamaana nikashinshi.’ (Mat. 24:45) Mudimu weneni wunazatewi hakwila nawu aloñeshi nikuhana ichi chawija chakuspiritu. Komana tumwekeshenu kusakilila hakukeña kwaYehova kwakuwahi kuhitila mukuwanika kukupompa nikutiyilila nakanañachima kumpanji yejima hakupompa.
[Chikasha chidi hefu 3]
Mpinji yaKupompa:
Ifuku daTachi nidaMuchiyedi
8:20 hrs. - 15:55 hrs.
Ifuku daMuchisatu
8:20 hrs. - 15:00 hrs.