‘Tonenuña!’ Kupompa kwaNkambi kwawaYinsahu jaYehova Kwamu 2009
1. (a) Nkiswinyi yitukadiluñisha kuhitila mukupompa mafuku ejima asatu akupompa kwankambi? (b) Yumanyi yitwatela kutachika kuloñesha?
1 Wejima wetu tunakutalila Kupompa kwaNkambi kwamu 2009 nikukooleka kwakuhumañana hamu nawakwetu akwakumuhameka Yehova “atuzweñi muspiritu.” (Mat. 5:3) Chineli ifuku daYehova dinakunyakala kuswila kwakwihi, tunayikoleshi wejima wenu kupompa mafuku ejima asatu kulonda mwakahetelumu chikupu muwulunda wawuwahi wawakwaKristu nikudikolesha kuspiritu nikukolesha chikuhwelelu. (Zef. 1:14) Yilejenu antañishi niayiñija nyidimu eluki nawu kupompa kwankambi hichuma chalema mukudifukula kwenu. Tachikenu kudiloñesha chadimu nawa mulombenu Yehova, wukuyikwasha.—Isa. 50:10.
2. Muloñadi chitukabulila kuwanika kukupompa kwanyunza neyi anatutondi wanyi?
2 Kupompa kwaNyunza: Chineli iku kupompa kwakekala mumatuña antesha ninyisumba, antu anatonduwu hohu diwu atela kuwanikaku. Neyi tutiyilila iyi nshimbi hikwakekala kudichinyaku.—1 Kor. 14:40; Heb. 13:17.
3. Tunateli kumwekesha ñahi kukeña kwawakwaKristu kudi antu amakwawu muchipompelu chetu?
3 Kwashenuku Amakwawu Kuwanikaku: Komana muchipompelu chenu mudi antu anakukeña wukwashu hakwila nawu akawaniki kukupompa kwankambi? Neyi mukwasha amakwawu kuwanikaku, dikwila nawu ‘himunakutoñojoka nsañu yenu hohuku, ilaña ninsañu yawakwenu nawa.’—Fwi. 2:4.
4. Indi antu amakwawu adihanini ñahi hakwila nawu awaniki kukupompa kwankambi?
4 Antu jaYehova hiyesekejaña kukooleka kwakuwanika kukupompa kwankambi namaluku. Talenu yakutalilahu yawantu afuukwiluhu kuwanika kukupompa kwawaYinsahu jaYehova kwamuKaayi Kejima kwamu 1958 kwadiña muMusumba waNew York (Divine Will International Assembly). Mana kwetu wumu washinkili kampani kindi kamudimu wakutuña hadi nyilungu yiyedi kulonda yayi nakuzataku mudimu wakudikeñela nikuwanika kukupompa. Mana kwetu wahaYitutu yaVirgin walandishili mpata yajiekita jitanu kulonda amuchisaka chindi ejima 6 awaniki kukupompa. Adisumbula achidi atwansi alandishili watu wekina kulonda asendi anyanawu ejima asatu kukupompa, kutachikila namwana watukweji tuyedi kushika nikuwayaaka 7. Antu asatu evumu dimu akuCalifornia ayilejeli nawu neyi ashiya nyidimu nakuya kukupompa, chakafuntawu akayihaña nyidimu. Hela chochu, chumichi hichayikañesheli kubula kuya kukupompa kwabadika kuwahaku.
5. Neyi munakukeña kuwanika kukupompa kwankambi kwiluña dacheñi, mwatela kwiladi?
5 Kukankila Kwadimena: Neyi mukwakushimwina nakukeña wukwashu wakuwana kwakukama, Komiti yaMudimu yaChipompelu yatela kufuukulahu neyi mukwakushimwina nashikuhu kuhana fomu yaKulombelahu Kapeka. Henohu nsoneki wachipompelu kanda yahani fomu kuDipatimenti yatalaña Hatupeka twahakupompa, atela kuhituluka munshimbi jidi hafomu.
6. Chumanyi chinaleteshi kwikala namaluña ayedi hohu akubalumuna mumuchidi wawatumama hakupompa kwankambi?
6 Muchidi wawaTumama: Neyi chimukumona hachikasha chinakumwekesha mafuku akupompa nimaluña muZambia, kubalumuna kwamuchidi wawatumama kukekalaku hakupompa KUYEDI HOHU, kuLusaka nikuNdola. KWOSI kupompa kukwawu KWAKALOÑESHAWU mumuchidi wawatumamaku. Iyi nloñeshelu yaleñelaña kwikali kubalumuna kwakuwahi nawa atumama avulaña kulonda adiluñishi nikudikolesha. Aeluda niakwakubalumuna muchidi wawatumama atela kuleja atumama amuchipompelu chawu nikuyikwasha kulonda adiloñeshi hakwila akawaniki kukupompa kumu kwakabalumunañawu maprogiramu mwidimi dawatumama. Aeluda atela kuhosha cheñi nawatumama ejima amuchipompelu chawu kulonda eluki neyi anakukeña wukwashu.
7. Nshimbinyi jitwatela kulondela neyi hitukuloñesha mwakwendela?
7 Kuloñesha Mwakwendela: Yipompelu yikwawu yafwetelaña motoka kulonda kuyitwala kumaluña akupompela. Motoka yejima yikuzatishawu hakutwala antu anakuya kukupompa chiña yetejawu kwenda hamukwakwa nawa yakola. Bayi musweja kwinzesha motokaku. Chikuwaha neyi mana kwetu wapama akumwinka mudimu wakwikala ntwamina wakutala jañendelu. Wukaleja izanvu kutalisha hantanjikilu, mpinji niiluña dakuyisendela. Neyi kumwekana kukala kudi kwejima hezanvu, atela kumwihula iwu mana kwetu nawa wukuyileja mwakwilila. Neyi chakwila kumwekana kukala kunakukeñeka wukwashu, kufumba, hela kumanisha kukala, amana kwetu asoñama nawa akweti kashinshi atela kwila mwenimu.
8. Chumanyi chitwatela kushaku muchima chikupu hampinji yitunakudiloñesha kuwanika kukupompa kwankambi kwamu 2009?
8 Nyidimu Yamulemeshaña Nzambi: Neyi tumwekesha mukabu waspiritu muyuma yejima yitwelaña, munhoshelu nimuyililu yetu, tunakutwala hambidi ijina dadiwahi dawantu jaYehova nikutondolwela kudimbwisha antu amakwawu. (1 Kor. 10:31; 2 Kor. 6:3, 4) Chimukapompa, yililu yenu yikamulemeshi Nzambi muniji njila haKupompa kwaNkambi kwamu 2009.—1 Pet. 2:12.
[Chikasha chidi hefu 5]
Mpinji yaKupompa:
Ifuku daTachi nidamuChiyedi
8:20 hrs. - 15:55 hrs.
Ifuku damuChisatu
8:20 hrs. - 15:30 hrs.