Kakweji kaAugust Kakekala Kalema muMudimu Wetu!
Tukahanaña Tilakiti Yayiha Mukaayi Kejima
1. Kampeninyi yadimena yikekalaku mukaayi kejima chitunakuswila kwakwihi nakwanakana yaaka 100 yakuyuula kwaWanta?
1 Mpinji yakwanakana yaaka 100 yinayuuli Wanta waNzambi yinakuswila kwakwihi. Dichi himpinji yayiwahi yitwatela kumulemesha Yehova kuhitila mukuzataku kampeni yadimena. Tukahanaña tilakiti yayiha yinakwila nawu “Kudihi Kutunateli Kuwana Ñakwilu yaMalwihu Atukabishaña Nankashi?” mukakweji kaAugust mukaayi kejima. Iyi tilakiti yikukwashaña antañi kutaña Bayibolu kulonda awani ñakwilu nawa yinakulumbulula Webusayiti ya jw.org chiyinateli kuyikwasha.
2. Tunateli kuzata ñahi kulonda ‘tukasweji kudikuwa hakumuhameka Yehova’ mukakweji kaAugust?
2 Kudikuwa Kwasweja Kwakuhameka: Analoñeshi njila yadimena yakukwasha akwakushimwina anakukeña kuzata chikupu mumudimu wakushimwina neyi apayiniya akukwasha mukakweji kaAugust. Munaka kakweji, akwakushimwina akayiteja kuzata wupayiniya wakukwasha wamaora 30. Chineli kakweji kaAugust mudi mafuku aChitanu atanu, jiMposu jitanu nimafuku aMulungu atanu, akwakushimwina amavulu azataña nyidimu yakumujimba mukachi kamulungu anateli kuzata wupayiniya wakukwasha. Nawa cheñi, atwansi anateli kuzatisha mafuku akunooka kushikola muAugust kulonda azati wupayiniya wakukwasha. Neyi mudi nakadizi waBayibolu hela mwana wunateli kwikala mukwakushimwina, hoshenu nanloñeshi wezanvu dawaeluda yoyinu mpinji. Chikusweja kuwaha neyi ekala akwakushimwina munonu kakweji walema. Hela chakwila apayiniya ampinji yejima anookaña mukakweji kaAugust hanyima yakuwanisha maora akeñekaña hachaaka, chikuwaha neyi ahimpa ndandanda yawu kulonda akazati chikupu muniyi kampeni kadimena. Yinu diyi mpinji yatela kuhanjekahu yisaka kulonda eluki ‘chakaswejawu kudikuwa hakumuhameka Yehova’ mukakweji kaAugust.—Ezera 3:11; Yish. 15:22.
3. Yumanyi yitunakukuhwelela haniyi kampeni yadimena?
3 Hela chakwila twazatahu dehi kampeni kamuchidiwu, tunakuhweleli netu aka kampeni kakekala kalema. Komana akwakushimwina apapatishewa, apayiniya akwakukwasha, nimaora akavulilaku mukakweji kaAugust? Chitunakushika kumakumishilu achaaka chamudimu cha 2014, tunakulomba netu Yehova yakiswili antu jindi mukaayi kejima hampinji yakazatañawu mudimu weneni wakushimwina muAugust.—Mat. 24:14.