EZRA

1 E higa mokwongo mar loch Kuros+ ruodh Persia, mondo wach ma Jehova nokoro kotiyo gi Jeremia+ ochopi, Jehova nojiwo chuny Kuros ruodh Persia mondo ogo milome e pinyruodhe duto, kendo nondiko wechego+ kowacho niya:

2 “Ma e gima Kuros ruodh Persia owacho, ‘Jehova Nyasach polo osemiya pinjeruodhi duto mag piny,+ kendo osechika ni agerne ot e dala mar Jerusalem+ e piny Juda. 3 Ng’ato ang’ata e kindu ma en achiel kuom jo ma lame, Nyasache mondo obed kode, kendo ng’atno owuogi odhi Jerusalem e piny Juda mondo oger od Jehova Nyasach Israel—en e Nyasaye madier—ma ode ne ni Jerusalem.* 4 Ng’ato ang’ata modak but wendo moro amora+ mondo omiye fedha gi dhahabu, jamni kod gik mamoko, kaachiel gi chiwo mamoko ma ji ogolo kohero ne od Nyasaye madier+ ma ne ni Jerusalem.’”

5 Eka jodongo mag dhout Juda gi Benjamin, kod jodolo gi Jo-Lawi—ng’ato ang’ata ma Nyasaye nojiwo chunye—nochako ikore dhi gero od Jehova ma ne ni Jerusalem. 6 Kendo jo ma ne olworogi duto nomiyogi* sende mag fedha gi mag dhahabu, mwandu, jamni, kod gik mamoko ma nengogi tek, kaachiel gi chiwo ma ne gigolo ka gihero.

7 Ruoth Kuros bende nogolo oko gik ma ne itiyogo e od Jehova ma noyudo Nebukadnezar ogolo Jerusalem moketo e od nyasache.+ 8 Kuros ruodh Persia noketo Mithredath jakeno mondo ochung’ ne tij golo gigo kendo kwanogi ne Sheshbazar*+ jaduong’ Juda.

9 Koro magi e gik ma nokwan: okepni 30 mag dhahabu, okepni 1,000 mag fedha, kod okepni 29 mamoko, 10 bakunde matindo 30 mag dhahabu, bakunde matindo 410 mag fedha, kod sende mamoko 1,000. 11 Kwan mar gik moko duto mag dhahabu kod fedha ne en 5,400. Sheshbazar nobiro gi gigo duto ka ne jo ma otwe+ nowuok Babulon ka dhi Jerusalem.

2 To magi e jo pinyno ma noduogo Jerusalem kod Juda ka gia e tuech+ e piny Babulon, ka ma Nebukadnezar ruodh Babulon noterogie.+ Ng’ato ka ng’ato nodok e gweng’gi.+ 2 Ne giduogo kaachiel gi Zerubabel,+ Jeshua,+ Nehemia, Seraya, Reelaya, Mordekai, Bilshan, Mispar, Bigvai, Rehum, gi Baana.

Jo-Israel ma chwo ne gin:+ 3 yawuot Parosh, 2,172; 4 yawuot Shefatia, 372; 5 yawuot Ara,+ 775; 6 yawuot Pahath-moab,+ ma joka Jeshua gi Joab, 2,812; 7 yawuot Elam,+ 1,254; 8 yawuot Zatu,+ 945; 9 yawuot Zakai, 760; 10 yawuot Bani, 642; 11 yawuot Bebai, 623; 12 yawuot Azgad, 1,222; 13 yawuot Adonikam, 666; 14 yawuot Bigvai, 2,056; 15 yawuot Adin, 454; 16 yawuot Ater, ma joka Hezekia, 98; 17 yawuot Bezai, 323; 18 yawuot Jora, 112; 19 yawuot Hashum,+ 223; 20 yawuot Gibar, 95; 21 yawuot Bethlehem, 123; 22 chwo mag Netofa, 56; 23 chwo mag Anathoth,+ 128; 24 yawuot Azmaveth,* 42; 25 yawuot Kiriath-jearim, Kefira, gi Beeroth, 743; 26 yawuot Rama+ kod Geba+ 621; 27 chwo mag Mikmas, 122; 28 chwo mag Bethel kod Ai,+ 223; 29 yawuot Nebo,+ 52; 30 yawuot Magbish, 156; 31 yawuot Elam machielo, 1,254; 32 yawuot Harim, 320; 33 yawuot Lod, Hadid, gi Ono, 725; 34 yawuot Jeriko, 345; 35 yawuot Senaa 3,630.

36 Jodolo ne gin:+ yawuot Jedaya,+ ma joka Jeshua,+ 973; 37 yawuot Imer,+ 1,052; 38 yawuot Pashur,+ 1,247; 39 yawuot Harim,+ 1,017.

40 Jo-Lawi ne gin:+ yawuot Jeshua gi Kadmiel,+ ma joka Hodavia, 74. 41 Jower ne gin:+ yawuot Asaf,+ 128. 42 Yawuot jorit rangeye ne gin:+ yawuot Shalum, yawuot Ater, yawuot Talmon,+ yawuot Akub,+ yawuot Hatita, yawuot Shobai, giduto ne gin ji 139.

43 Jo ma ne tiyo e hekalu* ne gin:+ yawuot Ziha, yawuot Hasufa, yawuot Tabaoth, 44 yawuot Keros, yawuot Siaha, yawuot Padon, 45 yawuot Lebana, yawuot Hagaba, yawuot Akub, 46 yawuot Hagab, yawuot Salmai, yawuot Hanan, 47 yawuot Gidel, yawuot Gahar, yawuot Reaya, 48 yawuot Rezin, yawuot Nekoda, yawuot Gazam, 49 yawuot Uza, yawuot Pasea, yawuot Besai, 50 yawuot Asna, yawuot Meunim, yawuot Nefusim, 51 yawuot Bakbuk, yawuot Hakufa, yawuot Harhur, 52 yawuot Bazluth, yawuot Mehida, yawuot Harsha, 53 yawuot Barkos, yawuot Sisera, yawuot Tema, 54 yawuot Nezia, kod yawuot Hatifa.

55 Yawuot jotich Solomon ne gin: yawuot Sotai, yawuot Sofereth, yawuot Peruda,+ 56 yawuot Jaala, yawuot Darkon, yawuot Gidel, 57 yawuot Shefatia, yawuot Hatil, yawuot Pokereth-hazebaim, kod yawuot Ami.

58 Ji duto ma ne tiyo e hekalu* kod yawuot jotich Solomon ne gin ji 392.

59 Magi e jo ma ne owuok Tel-mela, Tel-harsha, Kerub, Adon, kod Imer, to ne ok ginyal chiwo gima nyiso ayanga dhoudi ma ne giaye, kata ka be anyuolagi ne en mar Israel:+ 60 yawuot Delaya, yawuot Tobia, yawuot Nekoda, 652. 61 To kuom yawuot jodolo ne gin: yawuot Habaya, yawuot Hakoz,+ yawuot Barzilai,+ ma nokendo achiel kuom nyi Barzilai Ja-Gilead, kendo noluongore gi nyinggi. 62 Jogi nomanyo nyingegi e buge ma nondikie nyinge anyuola, to ne ok giyudogi. Kuom mano, ne ogolgi e tij dolo.+ 63 Kendo gavana* ne onyisogi ni ok ginyal chamo gik maler moloyo+ nyaka jadolo bedie ma nyalo penjo wach kuom Urim gi Thumim.+

64 Oganda duto ma nochokore kanyakla ne romo ji 42,360,+ 65 ka ok okwan wasumbni ma chwo gi ma mon ma kwan-gi ne romo 7,337; bende, ne gin gi jower ma chwo gi ma mon ma romo 200. 66 Ne gin gi farese 736, nyumbu* 245, 67 ngamia 435, kod punde 6,720.

68 Ka ne gichopo e od Jehova man Jerusalem, moko kuom jodong dhoudi nogolo chiwo,+ mondo gigergo od Nyasaye madier ka ma ne entiere chon.+ 69 Kaluwore gi nyalogi ne gigolo dhahabu ma romo drakma* 61,000, fedha ma romo mina* 5,000,+ kod kendhe 100 mag jodolo. 70 Kendo jodolo, Jo-Lawi, jower, jorit rangeye, jo ma tiyo e hekalu* kaachiel gi jomamoko, nodak e miechgi. To Jo-Israel mamoko duto bende ne odak e miechgi.+

3 Ka ne dwe mar abiriyo+ ochopo, ka koro Jo-Israel ne odak e miechgi, giduto ne gichokore Jerusalem ka gin gi paro achiel. 2 Eka Jeshua+ wuod Jehozadak gi jodolo wetene kaachiel gi Zerubabel+ wuod Shealtiel+ gi owetene ne ochung’ mi gigero kendo mar misango ne Nyasach Israel, mondo gichak chiwo misengni miwang’o mana kaka nondik e Chik Musa,+ ng’at Nyasaye madier.

3 Omiyo, ne gigero kendo mar misango ka ma ne entie chon kata obedo ni ne giluoro pinje ma ne okiewo kodgi.+ Ne gichako chiwo ne Jehova misengni miwang’o okinyi godhiambo e wi kendono.+ 4 Ne gitimo Sap Kiche mana kaka ne ondiki,+ kendo odiechieng’ kodiechieng’ ne gichiwo misengni miwang’o ma ne dwarore pile ka pile.+ 5 Bang’ mano, ne gichiwo misango miwang’o pile+ kaachiel gi misengni mag dwe manyien+ kod sewni mamoko mowal+ ma ne itimo ne Jehova. Bende, ne gichiwo misengni ma ne ji ogolo ne Jehova kuom herogi.+ 6 E odiechieng’ mokwongo mar dwe mar abiriyo,+ ne gichako chiwo ne Jehova misengni miwang’o kata obedo ni ne pok oket mise mar hekalu mar Jehova.

7 Ne gichulo jo ma ne payo kite+ kod funde,+ kendo ne gimiyo Jo-Sidon gi Jo-Turo chiemo, gik mimadho kod mo, nikech ne gidhi Lebanon gi yie ma gikelo yiend sida nyaka Jopa.+ Kuros ruodh Persia e ma ne oyienegi timo kamano.+

8 E dwe mar ariyo, mar higa mar ariyo bang’ ka ne giseduogo Jerusalem e od Nyasaye madier, Zerubabel wuod Shealtiel, kod Jeshua wuod Jehozadak kaachiel gi owetegi, jodolo, kod Jo-Lawi, gi ji duto ma ne oa e tuech+ nochako tich. Ne giyiero Jo-Lawi ma hikgi 20 ka dhi nyime mondo ochung’ ne tije ma ne itiyo e od Jehova. 9 Omiyo, Jeshua, yawuote gi owetene, kod Kadmiel gi yawuote, ma yawuot Juda ne oriwore mondo gita jo ma tiyo e od Nyasaye madier, kaachiel gi yawuot Henadad,+ yawuotgi kod owetegi ma ne gin Jo-Lawi.

10 Ka ne jogedo oketo mise mar hekalu mar Jehova,+ jodolo ma norwako lepgi mag dolo nokawo turmbeta,+ kendo Jo-Lawi ma yawuot Asaf nokawo nyidwonge mi ne gichung’ ma gipako Jehova mana kaka Daudi ruodh Israel nochiko.+ 11 Ne gichako olo wer+ ka gipako Jehova kendo goyone erokamano, “nimar ober; hera moherogo Israel osiko nyaka chieng’.”+ Eka ji duto nopako Jehova gi dwol maduong’ nikech ne oseket mise mar od Jehova. 12 To thoth jodolo, gi Jo-Lawi, gi jodong dhoudi, tiende ni jo ma hikgi oniang’ ma ne oneno ot mokwongo,+ noywak gi dwol maduong’ ka ne gineno ka iketo mise mar odno. Ji mang’eny bende ne okok matek nikech mor ma ne gin-go.+ 13 Omiyo, ji ne ok nyal pogo ywak gi mor, nikech ji ne goyo koko kendo ne inyalo winjgi gi ku mabor ahinya.

4 Ka ne wasik Juda gi Benjamin+ owinjo ni jo ma ne oa e tuech+ gero ne Jehova Nyasach Israel hekalu, 2 ne gidhi mapiyo ir Zerubabel gi jodongo mag dhoudi mi giwachonegi niya: “Yienwauru waged kodu; nimar wan bende walamo* Nyasachu,+ kendo wasebedo ka wachiwone misango chakre ndalo ma Esarhadon+ ruodh Asuria nokelowa kae.”+ 3 Kata kamano, Zerubabel gi Jeshua kod jodongo mamoko mag dhout Israel nowachonegi niya: “Onge gima dimi ukonywa gero ne Nyasachwa ot,+ wan wawegi wabiro gero odno ne Jehova Nyasach Israel, mana kaka Kuros ruodh Persia osechikowa.”+

4 Omiyo, jopinyno nochako nyoso chuny Jo-Juda mondo giwe gedo.+ 5 Kuom ndalo duto ma ne Kuros ruodh Persia locho, ne gimiyo jong’ad rieko asoya mondo ochoch chenro+ mag Jo-Juda. Mano nodhi nyime nyaka ndalo loch mar Darius+ ruodh Persia. 6 Ka ne Ahasuerus ochako locho, ne gindiko barua mondo gidonjnego jo ma nodak Juda gi Jerusalem. 7 E ndalo ma Artashasta ne locho Persia, Bishlam, Mithredath, Tabeel, gi jowetene nondiko ne Ruoth Artashasta barua. Ne giloko baruano e dho Aram,+ kendo ne gindike gi nyukta mag dho Aram.*

8 * Rehum ma ne jatich sirkal maduong’ e pinyno kod Shimshai jandiko ne ondiko barua ne Ruoth Artashasta ka gidonjo ne jo ma ne odak Jerusalem. Ne gindiko niya: 9 (Baruano ne oa kuom Rehum jatich sirkal maduong’ e pinyno, Shimshai jandiko kod jowetegi, jong’ad bura gi jotelo mamoko, jogoro, Jo-Erek,+ Jo-Babulon, jo ma odak Susa,+ tiende ni, Jo-Elam,+ 10 gi ogendni mamoko ma Asenapar, ruoth ma rahuma kendo ma nomi luor, ne okawo motero e mier mag Samaria,+ kaachiel gi jo ma ne nie alwora man Loka Aora.* To koro, 11 ma e barua ma ne gindikone.)

“Ne Ruoth Artashasta. Wan wasumbni magi modak e alwora man Loka Aora: To koro 12 dwaher ni ruoth ong’e ni Jo-Yahudi ma ne oweyi mobiro irwa Jerusalem kae, osechopo. Gisechako gero dala mopong’ gi jo maricho kendo ma ng’anyo, kendo gichiegni tieko loso ohingage+ gi misene ma ne okethore. 13 To ruoth onego ong’e malong’o ni ka po ni gigero dalano mi gitieko ohingage, ok gibi chulo osuru, kata golo chiwo,+ kata chulo chudo moro amora, to mano biro miyo ruoth* olal pesa mang’eny. 14 To nikech wanang’o chumbi moa e od ruoth,* ok owinjore waling’ aling’a ka iketho mwandu ruoth, e momiyo waoro baruani mondo ruoth ong’e wachni, 15 kendo mondo onon kitepe mondikie weche kwerene.+ Kinono kitepego, ibiro yudo ni dalani en dala mopong’ gi jong’anyo ma osebedo ka chando ruodhi gi pinjegi. Bende, kochakore chon, jodalano osebedo ka kwedo loch, kendo mano e momiyo nokethe.+ 16 Wadwaro ni ruoth ong’e ni ka oger dalano mi ohingage orumo, onge alwora man Loka Aora ma nodong’ e bwo lochni.”+

17 Eka ruoth nooro wach ne Rehum jatich sirkal maduong’ e pinyno, gi Shimshai jandiko, kod jowetegi ma ne odak Samaria, kaachiel gi jo ma ne nie alwora man Loka Aora:

“Aoronu mos! Daher nyisou ni 18 barua ma ne uoronwa osesom* maler e nyima. 19 Omiyo, nagolo chik mondo otim nonro, kendo ne oyud ni chakre chon jo dalano osebedo ka ng’anyo ne ruodhi, gin jo ma wigi tek kendo jong’ayi.+ 20 Ne nitie ruodhi mag Jerusalem ma roteke ma ne locho e wi alwora man Loka Aora, kendo ne imiyogi osuru, chiwo, kod chudo duto. 21 Kuom mano, nyisuru jogo ni owe tijno, kendo dalano kik ger nyaka agol chik. 22 Neuru ni ok udeko timo kamano, mondo dwach ruoth kik dhi nyime kethore.”+

23 Koro ka ne osesom barup Ruoth Artashasta e nyim Rehum gi Shimshai jandiko kod jowetegi, ne gidhi Jerusalem mapiyo mi gichuno Jo-Yahudi mondo owe tich. 24 Chakre chieng’no, tij od Nyasaye man Jerusalem nochung’. Nochung’ kamano nyaka e higa mar ariyo mar loch Darius ruodh Persia.+

5 Eka janabi Hagai+ gi janabi Zekaria+ nyakwar Iddo+ ne okoro wach e nying Nyasach Israel ne Jo-Yahudi ma ne ni Juda gi Jerusalem. 2 Kamano Zerubabel+ wuod Shealtiel gi Jeshua+ wuod Jehozadak nochako gero od Nyasaye+ ma ne ni Jerusalem; kendo jonabi mag Nyasaye ne ni kodgi ka sirogi.+ 3 Eka Tatenai ma ne en gavana mar alwora man Loka Aora* gi Shethar-bozenai kod jowetene nodhi irgi mopenjogi niya: “Ng’a momiyou thuolo mar gero odni kendo tieko lose?” 4 Eka ne gipenjogi niya: “Ng’a gini ma gero odni?” 5 To wang’ Nyasaye ne ni kuom jodongo mag Jo-Yahudi.+ Omiyo, jogo ne ok nyal tamogi dhi nyime gi tich, mak mana ka gioro wachno ir Darius mi giyud barua moa kuome.

6 Ma e barua ma Tatenai ma ne en gavana mar alwora man Loka Aora, Shethar-bozenai kod jowetene, kaachiel gi jotelo mamoko mag alwora man Loka Aora ne ondiko ne Ruoth Darius; 7 ne giorone baruano, kendo mae e gima ne gindiko:

“Ne Ruoth Darius:

“Okuwe! 8 Ruoth mondo ong’e ni ne wadhi e piny Juda e od Nyasaye maduong’, mi wayudo ka igere gi kite madongo kendo iketo bepe e ohingage. Gitiyo tijno gi kinda, kendo tijno dhi maber. 9 Ne wapenjo jodonggi niya: ‘Ng’a momiyou thuolo mar gero odni kendo tieko lose?’+ 10 Bende, ne wapenjogi nyingegi mi wandikogi piny mondo ing’e jo ma otelonegi e tijno.

11 “Ne gidwokowa kama: ‘Wan jotich Nyasach polo gi piny, kendo wagero ot ma ne oger higni mang’eny mokalo, ot ma ruoth maduong’ mar Israel ne ogero motieko.+ 12 Kata kamano, nikech kwerewa ne owang’o i Nyasach polo,+ ne ochiwogi e lwet Nebukadnezar+ ruodh Babulon Ja-Kaldea, ma ne oketho odni+ mi otero ji e tuech Babulon.+ 13 To e higa mokwongo mar Ruoth Kuros mar Babulon, Ruoth Kuros nogolo chik mondo oger od Nyasaye kendo.+ 14 E wi mano, Ruoth Kuros nogolo oko gik dhahabu kod mag fedha mag od Nyasaye ma ne nie hekalu mar Babulon. Nebukadnezar e ma ne ogolo gigo e hekalu man Jerusalem moterogi e hekalu man Babulon.+ Ne oket gigo e lwet ng’at moro miluongo ni Sheshbazar*+ ma Kuros ne oketo mondo obed gavana.+ 15 Kuros nonyise niya: “Kaw gigi mondo idhi iketgi e hekalu man Jerusalem, kendo ine ni oger od Nyasaye ka ma ne entie chon.”+ 16 Omiyo, Sheshbazar nobiro Jerusalem, mi oketo mise mag od Nyasaye,+ man Jerusalem. Kendo chakre chieng’no nyaka kawuononi, gedo osebedo ka dhi nyime, to pok orumo.’+

17 “E momiyo, ka ruoth oneno ni ber, to oor wach mondo onon kitepe manie od kano mwandu mar ruoth man Babulon, mondo one ka be Ruoth Kuros nogolo chik mar gero od Nyasaye man Jerusalem;+ kendo ruoth mondo oornwa wach moseng’ado.”

6 E kindeno, Ruoth Darius nogolo chik, mi ne gimenyo e ot ma ne ikanoe kitepe, ka ma ne okanie gik mabeyo mag Babulon. 2 Kendo noyud buk moro modol e dala mochiel motegno* man Ekbatana e piny Media. Magi e weche ma ne ondik e bugno:

3 “E higa mokwongo mar loch Kuros, Ruoth Kuros nogolo chik kuom od Nyasaye man Jerusalem niya:+ ‘Geruru odno kendo mondo gichiwie misengni, keturu misene motegno; borne onego obed bede 60,* to lachne bende bede 60.+ 4 Mise mar odno onego obed gi kite madongo moluowore nyadidek to e wigi uket bepe;+ pesa migerego biro wuok e od ruoth.+ 5 Bende, onego oduok gik dhahabu kod mag fedha mag od Nyasaye ma Nebukadnezar nogolo e hekalu man Jerusalem mokelo Babulon.+ Onego oduok moro ka moro kare e od Nyasaye man Jerusalem.’+

6 “Omiyo, in Tatenai gavana mar alwora man Loka Aora,* gi Shethar-bozenai, kod joweteni, kaachiel gi jotelo mamoko mag alwora man Loka Aora+—kik udhi kuno. 7 Kik uchoch tij gero od Nyasaye. Gavana mar Jo-Yahudi kod jodongo mag Jo-Yahudi biro gero ne Nyasaye ot ka ma yande entie. 8 E wi mano, agolo chik kuom gima onego otim ne jodong Jo-Yahudi ma gero od Nyasaye. Onego omigi pesa mapiyo mondo kik tijno chung’.+ Pesago onego ogol e kar keno mar ruoth,+ kod e osuru mochok e alwora man Loka Aora. 9 Odiechieng’ kodiechieng’, onego omigi gimoro amora ma gidwaro—nyiruedhi,+ yimbe,+ kod nyirombe+ michiwo kaka misango miwang’o ne Nyasach polo, ngano,+ chumbi,+ divai,+ kod mo,+ mana kaka jodolo man Jerusalem owacho, 10 mondo kinde duto gichiw misengni ma moro Nyasach polo, kendo gilem mondo ruoth kod yawuote odag aming’a.+ 11 Bende, aseketo chik ni ng’ato ang’ata moketho chikni ibiro pudh siro mar ode mi gure e sirono, kendo odeno ibiro lok choo.* 12 Mad Nyasaye moseketo nyinge kanyo+ oriemb ruoth kata ng’at moro amora ma biro ting’o lwete ka dwaro loko chikni mondo oketh od Nyasaye man Jerusalem. An Darius, asegolo chik. Onego otime mapiyo.”

13 Eka Tatenai ma ne en gavana mar alwora man Loka Aora, Shethar-bozenai+ kod jowetegi, notimo gik moko duto ma Ruoth Darius nosechikogi mapiyo. 14 Kendo jodong Jo-Yahudi nodhi nyime gi gedo kendo weche ne dhinegi maber.+ Weche ma janabi Hagai+ kod ma janabi Zekaria+ nyakwar Iddo ne koro ne jiwogi ahinya. Ne gigedo ma gitieko mana kaka Nyasach Israel nochikogi,+ kendo kaka Kuros,+ gi Darius,+ gi Artashasta+ ruodh Persia nosechikogi. 15 Ne gitieko gero odno e odiechieng’ mar adek dwe mar Adar,* e higa mar auchiel mar loch Darius.

16 Eka Jo-Israel, jodolo, Jo-Lawi,+ kod jomamoko ma noa e tuech notimo nyasi mar walo ne Nyasaye odno gi mor. 17 Ka ne giwalo odno, ne gichiwo ruedhi 100, yimbe 200, kod nyirombe 400. Bende, ne gichiwo nyuogi 12 ma romre gi kwan mag dhout Israel, mondo otimgo misango mar richo ne Jo-Israel duto.+ 18 Ne giketo jodolo e grubegi, kod Jo-Lawi e migepegi mondo giti ne Nyasaye e Jerusalem,+ mana kaka ne ondik e bug Musa.+

19 Jo ma yande ne oter e tuech notimo Sap Pasaka e odiechieng’ mar 14 dwe mokwongo.+ 20 Noyudo ka jodolo kod Jo-Lawi duto osepwodhore,+ omiyo ne giler; ne giyang’o le mitimogo misango mar Pasaka ne jo ma ne oa e tuech, ne jodolo wetegi, kendo ne gin giwegi. 21 Eka Jo-Israel ma ne oa e tuech nochame. Ne gichame kaachiel gi ji duto ma ne oriwore kodgi, kendo ma ne osepwodhore kuom timbe ogendni, mobiro lamo* Jehova Nyasach Israel.+ 22 Bende, kuom ndalo abiriyo, ne gitimo Sap Makate ma Ok Oketie Thowi+ ka gimor, nimar Jehova ne osemiyogi mor kendo ne oseloko chuny ruodh Asuria. Ruodhno ne onyisogi ng’wono+ kendo ne oriwogi lwedo e tij gero od Nyasaye madier, Nyasach Israel.

7 Bang’ wechegi, Ezra* noduogo e kinde ma Artashasta+ ne en ruodh Persia. Ezra+ ne en wuod Seraya,+ wuod Azaria, wuod Hilkia,+ 2 wuod Shalum, wuod Zadok, wuod Ahitub, 3 wuod Amaria, wuod Azaria,+ wuod Meraioth, 4 wuod Zerahia, wuod Uzi, wuod Buki, 5 wuod Abishua, wuod Finehas,+ wuod Eleazar,+ wuod Harun+ jadolo maduong’. 6 Ma e Ezra ma nobiro koa Babulon. Ne en jandiko ma ne olony maber e Chik Musa,+ ma Jehova Nyasach Israel ne osechiwo. Ruoth ne omiye gimoro amora ma ne okwayo, nikech Jehova Nyasache ne ni kode.

7 Moko kuom Jo-Israel, jodolo, Jo-Lawi,+ jower,+ jorit rangeye,+ kod jo ma ne tiyo e hekalu,*+ noidho modhi Jerusalem e higa mar abiriyo mar loch Artashasta. 8 To Ezra nodhi Jerusalem e dwe mar abich, e higa mar abiriyo mar loch ruoth. 9 Ne ochako wuodhe koa Babulon e odiechieng’ mokwongo mar dwe mokwongo, kendo ne ochopo Jerusalem e odiechieng’ mokwongo mar dwe mar abich nikech lwedo maber mar Nyasache ne ni kuome.+ 10 Ezra noseiko chunye* mondo onon Chik Jehova kendo otim mana kaka chik dwaro,+ mondo opuonj Jo-Israel chike Nyasaye kod buchene.+

11 Ma e barua ma Ruoth Artashasta ne omiyo Ezra ma ne en jadolo, jandiko, kendo ma ne olony e chike kod buche ma Jehova nomiyo Jo-Israel:

12 * “Artashasta,+ ruodh ruodhi, ne Ezra jadolo, jandiko mar Chik Nyasach polo: Okuwe. Koro 13 asegolo chik ni Ja-Israel moro amora kod jodologi, kaachiel gi Jo-Lawi manie pinyruodha ma diher dhi kodi Jerusalem, odhi adhiya.+ 14 Nikech ruoth gi jong’adne rieko abiriyo e ma oseori mondo inon ka be Jo-Juda kod Jerusalem tiyo gi Chik Nyasachi manie lweti, 15 kendo mondo iter fedha kod dhahabu ma ruoth kod jong’adne rieko osechiwo ka gihero ne Nyasach Israel, ma kar dakne ni Jerusalem, 16 kaachiel gi fedha duto kod dhahabu ma iseyudo e piny Babulon duto, kod mich ma ji kod jodolo osechiwo ka gihero ne od Nyasachgi man Jerusalem.+ 17 Pesagi onego itigo mapiyo e ng’iewo ruedhi,+ yimbe,+ nyirombe,+ kaachiel gi chiwo mag cham,+ kod chiwo miolo+ monego ochiwgigo. Onego ichiwgi e kendo mar misango manie od Nyasachi man Jerusalem.

18 “To ka po ni fedha gi dhahabu moko odong’, in kod oweteni, ubiro neno kaka owinjore oti kodgi e chopo dwach Nyasachu. 19 To gik moko duto ma osemiyi ma onego otigo e od Nyasachi, nyaka iter Jerusalem e nyim Nyasaye.+ 20 To ka nitie gimoro amora morem ma dwarore ni ochiw e od Nyasachi, inyalo tiyo gi pesa mogol e kar keno mar ruoth.+

21 “An Ruoth Artashasta, asegolo chik ne jokeno duto manie alwora man Loka Aora,* mondo omi Ezra+ jadolo, kendo jandiko mar Chik Nyasach polo, gimoro amora ma okwayou ma ok odeko, 22 kata nyaka talanta* 100 mag fedha, rapim* 100 mag ngano, rapim* 100 mag divai,+ rapim* 100 mag mo,+ kaachiel gi chumbi+ kar modwaro. 23 Gimoro amora ma Nyasach polo ochiko onego otim gi kinda ne od Nyasach polo,+ mondo kik mirima make gi loch ruoth kod yawuote.+ 24 Bende, jodolo, gi Jo-Lawi, gi jower,+ gi jorit rangeye, gi jo ma tiyo e hekalu,*+ kaachiel gi jo ma tiyo ne Nyasaye e odni, ok onego ogol osuru, chiwo,+ kata chudo moro amora.

25 “To in Ezra, kuom rieko ma Nyasachi osemiyi, yier jong’ad bura ma biro yalo jo ma odak e alwora man Loka Aora, jo ma ong’eyo chike Nyasachi; kendo onego ipuonj ng’ato ang’ata kuomgi ma ok ong’eyo chikego.+ 26 To ng’ato ang’ata ma ok orito Chik Nyasachi kaachiel gi chik ruoth onego okum mapiyo, bed ni inege, iriembe, igoye fain, kata itueye e jela.”

27 Duong’ obed ne Jehova Nyasach kwerewa, ma oseketo wach e chuny ruoth mondo olos od Jehova man Jerusalem!+ 28 Osenyisa ng’wono e nyim ruoth,+ jong’adne rieko,+ kod jotelo duto mag ruoth. Kuom mano, nabedo gi chir nikech lwet Jehova Nyasacha ne ni kuoma, mi nachoko jodongo moko mag Israel mondo adhigo.

8 Koro magi e jodong dhoudi kod anyuola mag jo ma ne owuok koda Babulon e ndalo loch mar Ruoth Artashasta:+ 2 kuom yawuot Finehas,+ Gershom; kuom yawuot Ithamar,+ Daniel; kuom yawuot Daudi, Hatush; 3 kuom yawuot Shekania, kuom yawuot Parosh, Zekaria, ne ondik chwo 150 ma ne ni kode; 4 kuom yawuot Pahath-moab,+ Eliehoenai wuod Zerahia, chwo 200 ne ni kode; 5 kuom yawuot Zatu,+ Shekania wuod Jahaziel, kendo chwo 300 ne ni kode; 6 kuom yawuot Adin,+ Ebed wuod Jonathan, chwo 50 ne ni kode; 7 kuom yawuot Elam,+ Jeshaya wuod Athalia, kendo chwo 70 ne ni kode; 8 kuom yawuot Shefatia,+ Zebadia wuod Mikael, chwo 80 ne ni kode; 9 kuom yawuot Joab, Obadia wuod Jehiel, kendo chwo 218 ne ni kode; 10 kuom yawuot Bani, Shelomith wuod Josifia, chwo 160 ne ni kode; 11 kuom yawuot Bebai,+ Zekaria wuod Bebai, kendo chwo 28 ne ni kode; 12 kuom yawuot Azgad,+ Johanan wuod Hakatan, chwo 110 ne ni kode; 13 kuom yawuot Adonikam+ ma nobiro achien, nyingegi ne gin: Elifelet, Jeiel, kod Shemaya, chwo 60 ne ni kodgi; 14 kuom yawuot Bigvai,+ Uthai gi Zabud, chwo 70 ne ni kodgi.

15 Ne achokogi kanyakla e aora mamol kochiko Ahava,+ kendo ne wajot kanyo kuom ndalo adek. To ka ne anono ji kod jodolo, ne afwenyo ni ne onge Ja-Lawi moro amora e kindgi. 16 Eka ne aoro wach mondo oluong Eliezer, Ariel, Shemaya, Elnathan, Jarib, Elnathan, Nathan, Zekaria, kod Meshulam, chwo ma ne otelo ne ji, kaachiel gi Joyarib kod Elnathan, ma ne puonjo ji. 17 Ne aorogi ni gidhi ir Iddo jaduong’ mar Kasifia. Ne anyisogi ni mondo ginyis Iddo gi owetene ma ne gin jotich hekalu* ma ne ni Kasifia, mondo okelnwa jotich mag od Nyasachwa. 18 Nikech lwedo maber mar Nyasachwa ne ni kuomwa, ne gikelonwa ng’at moro mariek kuom yawuot Mali+ nyakwar Lawi wuod Israel, ng’atno niluongo ni Sherebia.+ Nobiro gi yawuote gi owetene, giduto ne gin chwo 18; 19 kod Hashabia, kendo Jeshaya Ja-Merari+ ne ni kode, kaachiel gi owetene kod yawuote, giduto ne gin chwo 20. 20 Kendo ne nitie jotich mag hekalu* 220 ma ne Daudi gi jotelo mamoko osewalo mondo okony Jo-Lawi, giduto ne ondik nyingegi.

21 Eka ne agolo chik mondo wari kech e aora Ahava kanyo, mondo wabolre e nyim Nyasachwa, kendo wakwaye mondo oritwa gi nyithindwa kod mwanduwa duto e wuodhwa. 22 Wiya nokuot kwayo ruoth askeche gi farese ma diritwa e yo kuom wasigu, nimar ne wasewacho ne ruoth niya: “Lwedo maber mar Nyasachwa ni kuom jogo duto ma dware,+ to mirimbe mager ni kuom jogo duto ma weye.”+ 23 Kuom mano, ne wariyo kech kendo kwayo Nyasaye e wi wachni, mi nowinjo kwayowa.+

24 Ne ayiero jodong jodolo 12, ma ne gin Sherebia gi Hashabia+ kod owetegi apar. 25 Eka ne apimo fedha gi dhahabu kod gik mamoko, kae to amiyogi. Mago ne gin chiwo ma ruoth gi jong’adne rieko, kod jotende, kaachiel gi Jo-Israel duto ma ne ni kanyo nosechiwo ne od Nyasachwa.+ 26 Kar romb gik ma ne amiyogigo ne romo talanta* 650 mag fedha, gik fedha 100 ma romo talanta 2, talanta 100 mag dhahabu, 27 bakunde 20 matindo mag dhahabu ma romo darik* 1,000, sende 2 molos gi mula lilo, ma nyilni kendo ma nengogi tek ka dhahabu.

28 Eka ne awachonegi niya: “Un jo ma owal ne Jehova,+ gik ma amiyougi bende owal. To fedha gi dhahabu gin mich ma ji osechiwo kuom herogi ne Jehova Nyasach kwereu. 29 Ritgiuru maber nyaka chieng’ ma ubiro pimogi e nyim jodong jodolo, Jo-Lawi, kod jodong dhout Israel man Jerusalem,+ e ute* manie od Jehova.” 30 Kamano jodolo gi Jo-Lawi nokawo fedha gi dhahabu kod gik ma ne omigigo, mondo gitergi Jerusalem e od Nyasachwa.

31 Gikone, ne wawuok e aora Ahava+ e odiechieng’ mar 12 mar dwe mokwongo,+ mondo wadhi Jerusalem, kendo lwet Nyasachwa ne ni kuomwa. Ne oresowa e lwet wasigu, kendo kuom jo ma ne butonwa e yo. 32 Omiyo, ne wachopo Jerusalem+ mi wabet kuno kuom ndalo adek. 33 E odiechieng’ mar ang’wen, ne wapimo fedha gi dhahabu kod gik mamoko ma ne nie od Nyasachwa,+ mi waketo e lwet Meremoth+ wuod Urija jadolo, ka en gi Eleazar wuod Finehas, kaachiel gi Jozabad+ wuod Jeshua kod Noadia wuod Binui ma ne gin Jo-Lawi.+ 34 Nokwan gik moko duto, kendo ne opim pekgi mi ondik piny. 35 Jo ma yande nie tuech nochiwo misengni miwang’o ne Nyasach Israel. Ne gichiwo ruedhi+ 12 ne Jo-Israel duto, yimbe+ 96, nyiyimbe 77, kod nyuogi+ 12 kaka misango mar richo; gigo duto ne ochiw ne Jehova kaka misango miwang’o.+

36 Eka ne wamiyo jo ma ne ruoth+ oketo mondo orit piny, kod gavana mag alwora man Loka Aora*+ chike mag ruoth. Jogo ne okonyo ji kendo ne gikonyo e tije mag od Nyasaye madier.+

9 Mapiyo bang’ ka nosetim gigo duto, jotelo moko nobiro ira mowachona niya: “Jo-Israel kod jodolo gi Jo-Lawi pok opogore gi jo pinje mamoko, to giluwo mana timbegi modwanyore+ mag Jo-Kanaan, Jo-Hiti, Jo-Perizi, Jo-Jebus, Jo-Amon, Jo-Moab, Jo-Misri,+ kod Jo-Amor.+ 2 Gisenyuomo nyi ogendnigo ne gin giwegi kod yawuotgi.+ Kamano oganda* maler+ osenywandore gi jo pinje mamoko.+ Jodongo kod jotelo makonyo e ma oseketho e wachni moloyo.”

3 To ka ne awinjo awinja wachno, ne ayiecho lawa kod kandhona ma onge bade, kendo ne apudho yie wiya gi yie tika, mi ne abet piny ka adhier nono. 4 Eka ji duto ma ne oluoro wach Nyasach Israel nobiro mochokore buta nikech gima rach ma jo ma noduogo koa e tuech notimo, kendo ne abet kanyo ka adhier nono nyaka godhiambo sa ma igolo chiwo mar cham.+

5 Ka nochopo godhiambo sa ma igolo chiwo mar cham,+ ne achung’ ka ma ne aywagorae ka lawa gi kandhona oyiech, mi ne agoyo chonga piny kendo yaro lwetena ne Jehova Nyasacha. 6 Ne awacho niya: “A Nyasacha, an gi wich-kuot ma ok anyal ting’oni wang’a, A Nyasacha, kethowa osemedore e wiwa kendo richowa osechopo e polo malo.+ 7 Chakre ndalo kwerewa nyaka kawuononi+ kethowa osemedore ahinya;+ osechiwwa e lwet ruodhi mag pinje mamoko, osenegwa gi ligangla,+ oseterwa e tuech,+ osepe mwanduwa,+ kendo waseyudo wich-kuot, nikech richowa, gi mag ruodhiwa, kod mag jodolowa. 8 Kuom kinde matin, waseyudo ng’wono e wang’ Jehova Nyasachwa, nikech oseweyo jomoko otony, kendo osegurowa e kare maler,+ mondo omi wengewa orieny, kendo chunywa oyudie yueyo matin e tuech ma wantiereni, A Nyasachwa. 9 Nimar kata obedo ni wan wasumbni,+ Nyasachwa pok ojwang’owa e tuechwa, to osemiyo wayudo ng’wono e wang’ ruodhi mag Persia,+ mi oduogo chunywa mondo wachungne ot,+ walos kuonde mokethore, kendo wabedie gi ohinga e Juda kod Jerusalem.

10 “To koro yaye Nyasachwa, dwawach ang’o? Nimar wan e ma waseweyo chikeni, 11 ma ne imiyowa kokalo kuom jotichni ma jonabi, kiwacho niya: ‘Piny ma koro udhi kawoni en piny modwanyore nikech timbe jo ma odak e iye richo, kendo timbegi mochidogo osepong’o pinyno kochakore tung’ piny nyaka tung’ piny.+ 12 Kuom mano, kik uchiw nyiu ne yawuotgi, kendo kik unyuom nyigi ne yawuotu;+ kik utim gima dikelnegi kuwe kod mwandu.+ Kamano unubed motegno, kendo unucham gik mabeyo mag pinyno, mi unuwe pinyno ne nyithindu kaka mwandugi nyaka chieng’.’ 13 To ka koro gigi duto osetimorenwa nikech timbewa maricho kod kethowa—nimar yaye Nyasachwa, pok ikumowa mowinjore gi kethowa,+ kendo isemiyo moko kuomwa otony+— 14 ere kaka dwachak waketh chikeni mi wakendre gi jo ma timbegi odwanyoregi?+ Donge mirima dimaki kodwa mi itiekwa chuth, ma ok iweyo kata ng’ato achiel kuomwa? 15 A Jehova Nyasach Israel, in ng’at makare,+ nimar isemiyo jowa matin-gi otony. Koro wan joricho ma bura oloyo, to nikech richowago onge ng’ato ang’ata kuomwa ma nyalo chung’ e nyimi.”+

10 To ka ne Ezra pod lemo+ ka hulo richo koywak kendo konindo piny auma e nyim od Nyasaye madier, oganda maduong’ mar Jo-Israel moting’o chwo, gi mon, kod nyithindo nobiro molwore, nimar ji ne ywak malit. 2 Eka Shekania wuod Jehiel+ ma en achiel kuom yawuot Elam+ nowacho ne Ezra niya: “Waseketho e nyim Nyasachwa kuom kendo nyi pinje mamoko.+ Kata kamano, Jo-Israel pod nigi geno. 3 E momiyo koro, wasingreuru ne Nyasachwa+ ni wanariemb mon duto kod nyithindo ma ginyuolo, kaluwore gi chike Jehova kod jogo moluoro chike Nyasachwa.+ Watimuru gima Chik dwaro. 4 A malo, nimar in e ma omiyi tijni, kendo wabiro riwi lwedo. Bed gi chir kendo ikaw okang’.”

5 Eka Ezra noa malo, kendo nomiyo jodong jodolo gi Jo-Lawi kod Jo-Israel duto okuong’ore ni ginitim gima gisewachono.+ Omiyo, ne gikuong’ore. 6 Ezra ne oa e nyim od Nyasaye, modonjo e od Jehohanan wuod Eliashib. Kata ka nodonjo kanyo, ne ok ochiemo kata modho pi, nimar ne en gi kuyo nikech gik maricho ma jo ma noa e tuech nosetimo.+

7 Eka ne gigoyo milome e Juda gi Jerusalem mondo ji duto ma yande nie tuech ochokre Jerusalem; 8 kendo jodongo kod jotelo ne omiyo ji duto ndalo adek mar chopo, to ng’ato ang’ata ma ok nochopo e kinde ma ne oketno, ne idhi pe mwandune kendo ne idhi riembe oa e kind jo ma noa e tuechgo.+ 9 Jo-Juda gi Jo-Benjamin duto ne ochokore Jerusalem ka pok ndalo adek orumo, tiende ni e odiechieng’ mar 20 mar dwe mar ochiko. Ji duto ne obet e laru man e nyim od Nyasaye ka gitetni nikech wachno kendo nikech koth maduong’ ma ne goyogi.

10 Eka Ezra jadolo nochung’ mowachonegi niya: “Useketho kuom kendo nyi ogendni mamoko,+ mi umedo richo kuom Israel. 11 Kuom mano, huluru kethou e nyim Jehova Nyasach kwereu kendo utim dwache. Pogreuru ua kuom jo pinje mamoko kendo kuom mondeu ma ne ugolo e pinjego.”+ 12 Eka oganda duto ne odwoko gi dwol maduong’ niya: “Wanatim mana kaka iwachono. 13 To kata kamano, ji ng’eny kendo en ndalo koth. Kuom mano, ok wanyal chung’ oko, kendo wachni ok bi kawo odiechieng’ achiel kata ariyo, nikech waseketho ahinya. 14 Omiyo, wasayi, we mondo jotendwa ochung’ kar oganda duto;+ kendo ji duto modak e miechwa ma osenyuomo nyi pinje mamoko obi e ndalo moketi, kaachiel gi jodonggi kod jong’ad bura mag miechgi, nyaka chop ka ma mirima mager mar Nyasachwa biro lokore mi a kuomwa nikech wachni.”

15 Kata kamano, Jonathan wuod Asahel kod Jahzeya wuod Tikva ne ok oyie gi wachno, kendo Meshulam gi Shabethai+ ma Jo-Lawi noriwogi lwedo. 16 To jo ma yande nie tuech notimo kamano; kendo Ezra jadolo kod jodong dhoudi ma nondik nyinggi, noromo tenge e odiechieng’ mokwongo mar dwe mar apar mondo ginon wachno. 17 E odiechieng’ mokwongo mar dwe mokwongo, ne gitieko wach jo ma nosenyuomo nyi pinje mamoko. 18 Kendo ne ofweny ni yawuot jodolo moko ne osenyuomo nyi piny:+ kuom yawuot Jeshua+ wuod Jehozadak kod owetene, Maaseya, Eliezer, Jarib, kod Gedalia. 19 Ne gisingore* ni gidhi riembo mondegigo, to nikech bura noloyogi ne gichiwo yim moa e kueth nikech kethogi.+

20 Kuom yawuot Imer,+ ne nitie Hanani gi Zebadia; 21 kendo kuom yawuot Harim,+ Maaseya, Elija, Shemaya, Jehiel, kod Uzia; 22 kendo kuom yawuot Pashur,+ Elioenai, Maaseya, Ishmael, Nethanel, Jozabad, kod Eleasa. 23 Kuom Jo-Lawi, ne nitie Jozabad, Shimei, Kelaya (ma en, Kelita), Pethahia, Juda, kod Eliezer; 24 kendo kuom jower, Eliashib; kendo kuom jorit rangeye, Shalum, Telem, kod Uri.

25 Kuom Israel, kuom yawuot Parosh,+ ne nitie Ramia, Izia, Malkija, Mijamin, Eleazar, Malkija, kod Benaya; 26 kendo kuom yawuot Elam,+ Matania, Zekaria, Jehiel,+ Abdi, Jeremoth, kod Elija; 27 kendo kuom yawuot Zatu,+ Elioenai, Eliashib, Matania, Jeremoth, Zabad, kod Aziza; 28 kendo kuom yawuot Bebai,+ Jehohanan, Hanania, Zabai, kod Athlai; 29 kendo kuom yawuot Bani, Meshulam, Maluk, Adaya, Jashub, Sheal, kod Jeremoth; 30 kendo kuom yawuot Pahath-moab,+ Adna, Kelal, Benaya, Maaseya, Matania, Bezalel, Binui, kod Manase; 31 kendo kuom yawuot Harim,+ Eliezer, Ishija, Malkija,+ Shemaya, Shimeon, 32 Benjamin, Maluk, kod Shemaria; 33 kuom yawuot Hashum,+ Matenai, Matata, Zabad, Elifelet, Jeremai, Manase, kod Shimei; 34 kuom yawuot Bani, Maadai, Amram, Uel, 35 Benaya, Bedeya, Keluhi, 36 Vania, Meremoth, Eliashib, 37 Matania, Matenai, kod Jaasu; 38 kendo kuom yawuot Binui, Shimei, 39 Shelemia, Nathan, Adaya, 40 Maknadebai, Shashai, Sharai, 41 Azarel, Shelemia, Shemaria, 42 Shalum, Amaria, kod Josef; 43 kendo kuom yawuot Nebo, Jeiel, Matithia, Zabad, Zebina, Jadai, Joel, kod Benaya. 44 Jogi duto ne osenyuomo nyi pinje mamoko,+ kendo ne giriembo mon-go kaachiel gi nyithindgi.+