Bed Jakony Maber Seche ma Ulendo
1. Gin ber mage mayudore kuom lendo gi ng’at machielo?
1 E kinde moro, Yesu nooro jopuonjre 70 e tij lendo, “noorogi ji ariyo ariyo.” (Luka 10:1) Onge kiawa ni chenroni nomiyo jopuonjrene ojiwore ng’ato gi nyawadgi e tij lendo. Ere kaka wanyalo konyo seche ma wan gi ng’at machielo e tij lendo?
2. Ang’o momiyo onego wachik itwa seche ma ng’at ma wan-go lendo, to wanyalo timo mano nade?
2 Kuom Bedo Ng’at Machiko Ite: Chik iti malong’o seche ma ng’at ma un-go lendo. (Jak. 1:19) Seche mosomo ndiko, in bende luwri kode e Mumbi. Ng’i wang’ ng’at mawuoyo, obed jalendo ma un-go kata ng’at milendone. Ka iketo pachi duto e gima iwuoyoe, mano biro jiwo ng’at milendone mondo oket pache e gima iwacho.
3. Gin kinde mage ma ng’at mwalendogo nyalo kwayowa mondo wawuo?
3 Kuom Ng’eyo Seche Mowinjore Iwuo: Ka ng’at ma wan-go ema lendo, wamiye luor kuom weyone thuolo mondo owuo nyaka otieki. (Rumi 12:10) Ok onego wang’ade. Kapo ni wiye owil gi wach moro kata ka wuon ot kwedo kata penjo wach moro ma jalendono okwayowa mondo wakonye, onego watem matek mondo wamed jiwo gima iwuoyoe maok wachako wuoyo e wach machielo. (Nge. 16:23; Ekl. 3:1, 7) Kochuno ni nyaka wawuo, wechewa onego ojiw gima iwuoyoe.—1 Kor. 14:8.
4. Ang’o mabiro kelonwa mor kod nyak e tijwa mar lendo?
4 Kane jopuonjre 70 otieko tijgi mar lendo, ne ‘giduogo gi mor.’ (Luka 10:17) Wan bende wabiro yudo mor kod nyak e tijwa mar lendo ka wachiko itwa malong’o kendo ng’eyo seche mowinjore wawuoe ka wakonyo joma walendogo.