Kaka Wanyalo Tiyo gi Brosua Manyien mar Wach Maber Mowuok Kuom Nyasaye!
Olose Mondo Wati Kode Sama Wadok Timo Limbe Koda e Chako Puonjruok mar Muma gi Ji
1. En brosua mane manyien ma ne wayudo e Chokruog-distrikt mar “Rit Chunyi!” ma olos mondo okonywa sama wadok timo limbe koda e chako puonjruok mar Muma gi ji?
1 E Chokruog-distrikt ma wiye ne wacho ni “Rit Chunyi!” ne wamor ahinya yudo brosua manyien molos mondo okonywa sama wadok timo limbe koda e chako puonjruok mar Muma gi ji. Brosua mar Wach Maber Mowuok Kuom Nyasaye! miluongo e yo machuok ni Wach Maber, nigi sula machieko mana kaka brosua mar Nyasaye Dwaro Ni Mondo Watim Ang’o? ma ne watiyogo chon. Mano miyo bedo mayot tiyo kode e tayo puonjruok mar Muma kata mana e dhoot. Pogruok mantie e kindgi en ni brosua mar Nyasaye Dwaro Ni Mondo Watim Ang’o? ne wuoyo kuom gik ma dwarore ni Jokristo otim, ma samoro nyalo bedo matek ne jopuonjre manyien yiego, to brosua manyienni wuoyo mana kuom wach maber mayudore e Muma.—Tich 15:35.
2. Ler ane gimomiyo olos brosua mar Wach Maber.
2 Ang’o momiyo nolose? Owete e piny ngima osebedo ka kwayo buk moket mayot manyalo ywayo ji e adiera kendo minyalo kwong chakgo puonjruok kapok ng’ato odhi e bug Muma Puonjo. Kinde mang’eny, joma ok ohero somo buge madongo yiega puonjore Muma ka giyudo buge matindo kaka brosua. E wi mago, brosua loko yot e dhok mabuora.
3. Pogruok mane ma nitie e kind brosuani kod buge mamoko mag puonjruok?
3 Kaka Iye Chalo: Bugewa mang’eny mag puonjruok olos e yo ma ng’ato nyalo somo owuon mowinj tiend gik mosomo. Brosuani to opogore. Olose e yo ma japuonj nyaka bedie eka japuonjre owinje maber. Kuom mano, sama wamiye ng’ato, ber mondo wasom kendo wawuo kuom paragraf achiel kata ariyo. Nikech paragraf manie iye chieko, wanyalo nonogi mayot e dhood ng’ato kata kama otiyoe. Kata obedo ni ber chako gi sula mokwongo, pod wanyalo yiero chako gi sula moro amora ma waneno ni owinjore.
4. Ere kaka brosuani konyowa puonjo ji Muma achiel kachiel?
4 E bugewa mang’eny, dwoko mag penjo yudore e paragraf. Brosuani to opogore nikech dwoko mag penjo manie iye yudore mana e Muma. Ji mang’eny neno ni puonjruok Muma achiel kachiel ber moloyo puonjruok buk moro. Omiyo, chiegni ni ndiko duto manie brosuani ok oket wechegi e paragraf. Onego osomgi achiel kachiel e Muma. Mani konyo jopuonjre mondo ong’e maler ni gik ma gipuonjore owuok kuom Nyasaye.—Isa. 54:13.
5. Ang’o momiyo japuonj nyaka ikre maber ne puonjruok ka puonjruok?
5 Nitie ndiko mang’eny e brosuani maok oler tiendgi. Nikech ang’o? Nikech olose e yo mamiyo japuonjre bedo gi siso mar penjo, kendo omiyo japuonj thuolo mar tiyo gi lony ma en-go e puonjo. Mano nyiso ni japuonj nyaka ikre maber ne puonjruok ka puonjruok. Gima iparonwa en ni kik wawuo ahinya e sa puonjruok. En adier ni wahero lero Ndiko, kata kamano, mondo mi wakony japuonjre maber, onego en ema wamiye thuolo mondo oler kaka owinjo tiend ndiko. Ka watiyo gi penjo e yo molony, wanyalo konye mondo one kaka ndiko ka ndiko tiyo kendo otudore gi gima iwuoye.—Tich 17:2.
6. Ere kaka wanyalo tiyo gi brosuani: (a) e alwora ma ji ok oheroe weche Nyasaye kata Muma? (b) sama walendo ot ka ot? (c) e chako puonjruok achiel kachiel? (d) sama wadok timo limbe?
6 Wanyalo miyo ji brosuani sa asaya kata e dweche maok oyang ne tiyo kode e lendo, mana kaka wajotimo gi bugewa mamoko mag tayo puonjruok. Ober ndi gi chako puonjruok achiel kachiel kata mana e dhoot. To bende kaka nolernwa e chokruog-distrikt, tiyo kode sama wadok limo joma orwako wach “nyalo miyo timo limbe obed mamit ahinya.”—Ne sanduge manie ite mag 5-6.
7. Ere kaka inyalo tiyo gi brosua mar Wach Maber e tayo puonjruok mag Muma?
7 Kaka Wanyalo Tiyo Kode e Tayo Puonjruok mag Muma: Wanyalo chako gi somo penjo mochan e bwo sula ka sula. Kae to, wasom gi japuonjre dwoko kaachiel gi ndiko mopiel e giko paragraf. Ti gi penjo e yo manyalo miyo wuon ot owinj tiend ndikogo. Bang’ mano, kapok udhi e penjo machielo, kwa japuonjre mondo otem ane dwoko penjo ma eka ua nono mondo ine kabe owinjo tiende maber. E kinde ma eka ihango limoe ng’ato, nyalo bedo maber ka unono penjo achiel kende kuom penjogo e limbe ka limbe. Mosmos, biro chopo kama koro unyalo nono sula mangima.
8. Gin weche kaka mage monego watigo sama wadwa somo Muma, to nikech ang’o?
8 Kinde mang’eny, ndiko mowach ni “som” ema oting’o dwoko ma achiel kachiel mag penjo manie bwo sulago. Sama udwa somo ndiko moro, tem kik iwach ne wuon ot ni, “Jaote Paulo nondiko kama” kata ni, “Nee gima Jeremia nokoro.” Weche kaka mago nyalo miyo wuon ot opar ni wasomo mana weche mag dhano. Emomiyo diber ka wawacho ni, “Wach Nyasaye wacho kama” kata, “Nee gima Muma nokoro.”
9. Be onego wasom ndiko duto moketi sama watayo puonjruok?
9 Be onego wasom ndiko duto moketi, koso wasom mana mondik ni “som”? Mano biro luwore gi chal mar japuonjre. Ndiko ka ndiko moketi nigi tich. Giduto giting’o paro manyalo konyo. Kata kamano, kinde moko nyalo dwarore ni wasom mana ndiko mowach ni “som,” nikech samoro wuon ot odich, kata ok orwako wach ahinya, kata nikech okiya somo maber.
10. Gin kinde mage ma wanyalo chako tiyoe gi bug Muma Puonjo e tayo puonjruok?
10 Kinde Mowinjore Wachak Tiyoe gi Bug Muma Puonjo: Bang’ ka wasenono brosuani e limbe mogwaro kendo wasebedo gi chenro maber mar puonjruok maok wabare, wanyalo chako tiyo gi bug Muma Puonjo kata wanyalo yiero mar tieko brosuani te komondi. Jolendo ema onego oyier kinde mowinjore mar dhi e bug Muma Puonjo. To kapo ni wayiero mar dhi e bug Muma Puonjo, be ochuno ni wachak gie tiende? Ok dwawach ni ee kata ooyo. Ji opogore. Kata kamano, gima waket e paro en ni thoth jopuonjre biro yudo ber ka ginwoyo e yo matut sula ma ne gisepuonjorego, to koro ka gitimo mano e bug Muma Puonjo.
11. Ang’o momiyo onego wati maber gi brosua manyienni?
11 Nikech wadak e piny ma wach maber nokie, wan gi thuolo makende ahinya mar lando ne ji wach maberie moloyo, ma en ni sani Pinyruodh Nyasaye ema locho, kendo ni pinyruodhno biro kelo piny manyien kama wach makare nodagie! (Math. 24:14; 2 Pet. 3:13) Wan gadier ni ng’eny joma winjo wach maberno biro yie gi wechegi ma ne okudh gi much Nyasaye: ‘Tiend jalo long’o nade mawuotho e gode, makelo weche mokow, malando wach kuwe, makelo weche mokow mabeyo mag gima ber, malando wach resruok, mawacho ne Sayun ni, “Nyasachi olocho kuonde duto!”’ (Isa. 52:7) Omiyo, watiuru gi brosuani e chiwo pi ngima mowuok kuom Nyasaye ne jogo ma riyo oloyo e alworawa!
[Sanduk e ite mar 5]
Sama Wan e Alwora ma Ji Ok Oheroe Weche Nyasaye Kata Muma:
● Nitie alwora moko ma ka jolendo owachoe awacha ne weg udi ni “Nyasaye wacho” kata ni “Muma wacho,” to giketho mbaka. Ka in e alwora ma kamano, nyalo bedo maber ka e limbe mokwongo, iwuo gi ji kuom gik manyalo mako pachgi kaka gombo yudo sirkal maber, kama joot nyalo yudoe puonj manyalo konyogi, koda geno ma wan-go mar kinde mabiro. Bang’ timo limbe mogwaro ka waleronegi gimomiyo wayie ni Nyasaye nitie koda gima nyiso ni Muma wacho adier, wanyalo terogi e brosua mar Wach Maber.
[Sanduk e ite mar 5]
Sama Walendo Ot ka Ot:
● “Abiro mondo alernie kaka wanyalo ng’eyo e yo mayot gima Nyasaye ochano timo ne dhano e kinde mabiro. Be isegapenjori kabe chieng’ moro Nyasaye biro golonwa chandruok? [Rit dwoko.] Brosuani nyiso kama inyalo yudoe dwoko mar penjono e Muma. [Miye brosuano, kendo isom kode paragraf mokwongo mar sula mokwongo kod ndiko mar Yeremia 29:11.] Kaluwore gi gik ma wasenonogi, donge en adier ni Nyasaye dwaro ni wadag e ngima maber e kinde mabiro? [Rit dwoko.] Anyalo weni bugni ka diher. Kata kamano, iparo ni ang’o ma Nyasaye biro timo mondo otiek chandruok ma yudo dhano? Mondo wayud dwoko ma Muma chiwo e wi penjono, abiro duogo mondo wanon paragraf mar ariyo.” Kapo ni wuon ot nigi thuolo sama ihango lendone, unyalo nono paragraf mar ariyono kaachiel gi ndiko adek moket e paragrafno. Kae to itim chenro mar dok nono penjo mar ariyo e bwo sulano.
● “Ji mang’eny ohero lemo, to moloyo ka gin gi chandruok moko e ngimagi. Donge kata in bende ilemoga? [Rit dwoko.] Iparo nade, be Nyasaye winjo lamo duto koso nitie moko maok owinji? [Rit dwoko.] An-gi buk moro matin kae ma konyowa yudo dwoko ma Muma chiwo e wi penjogo. [Miye brosuano, kendo unon kode paragraf mokwongo e sula mar 12 kaachiel gi ndiko mowach ni “som.”] Donge en gima iwuoro ni Nyasaye oikore mar winjowa? To mondo lamowa okonywa maber moloyo, onego wang’e Nyasaye maber. [El sula mar 2 kendo inyise wiye matindo manie bwo sulano.] Anyalo weni buk matinni ka diher, kendo abiro duogo mondo wanon dwoko ma Muma chiwo e wi penjogi.”
● “Ndalogi chuny ji chandore nikech giwuoro kama pinyni ochomo nikech gik moko medo mana bedo marach. Be iparo ni nitie kinde ma weche biro dhi maber? [Rit dwoko.] Ji mang’eny bedoga mamor bang’ fwenyo ni Muma nigi wach maber manyalo miyo wabed gi geno. Magi e moko kuom penjo ma Muma chiwo dwokogi.” Miye brosua, kae to we oyier penjo mamore ahinya kuom penjo manie tok brosuano. El kama penjono yudoree ei brosua, kae to inyise kaka wanyalo puonjore Muma ka watiyo gi brosuano. Tim chenro mar dok lime mondo unon penjo maluwo manie bwo sulano.
[Sanduk e ite mar 6]
Chako Puonjruok Achiel Kachiel:
● “Alimi mondo anyisie buk moro manyien ma konyowa e puonjruok Muma. Bugni nigi sula 15 manyalo konyi ng’eyo ndiko minyalo yudoe dwoko mag penjo machando ji ahinya. [Nyise nyim brosuano kod toke.] Be isetemoga ng’eyo tiend gik ma Muma puonjo? [Rit dwoko.] We anyisie kaka puonjruok sula mag bugni yot. [Nonuru paragraf mar 3 e sula mar 3, kendo usom Fweny 21:4, 5. Ka nyalore, non kode paragraf maluwo kod ndiko mowach ni “som.”] Anyalo weni bugni ka diher. Dwaher jiwi ni itemie puonjori Muma kata mana dichiel kende. Ka omori, inyalo dhi nyime. Wanyalo nono sula mokwongo chieng’ ma waduogo. Sulano nigi ite achiel kende.”
[Sanduk e ite mar 6]
Sama Idok Timo Limbe:
● Inyalo wacho kama: “Amor limi kendo. Akeloni bugni moting’o dwoko mag penjo ma ji jobedogo e wi Muma. [Miye brosuano, kae to isiemne ng’e brosuano.] En sula mane ma mori ahinya kuom magi duto? [Rit dwoko. Kae to el sula moyierono.] We anyisie kaka inyalo tiyo gi buk matinni e yudo dwoko ma Muma chiwo.” Nyise kaka onyalo puonjore Muma kuom nono paragraf achiel kata ariyo kaachiel gi ndiko mowach ni “som.” Kitimo kamano, to isemana chako puonjruok mar Muma! Mi wuon ot brosuano, kendo itim chenro mar dok lime. Kutieko sula achiel, unyalo dhi e sula machielo ma wuon ot oyiero kata unyalo chako gie tiende.