Kaka Wanyalo Medo Lony e Tij Lendo​—Kuom Ndiko Weche e Wi Joma Oyie Winjo Wach

Jaote Paulo nojiwo Timotheo kama: “Tim kinda . . . kiritori iwuon, kendo kirito weche mipuonjo.” (1 Tim. 4:16) Wechego nyiso maler ni nyaka watim kinda mondo wamed lony ma wan-go kaka joland injili, bed ni ne wachako lendo higni machon kata machiegni. Mondo okonywa timo mano, nitie sula ma biro yudorega e Tijwa mar Pinyruoth. Sulano wiye wacho ni, “Kaka Wanyalo Medo Lony e Tij Lendo.” Moro ka moro kuom sulago biro wuoyo kuom wach achiel ma wanyalo medo lonyie, kendo nyiso kaka wanyalo timo kamano. Ijiwo jolendo duto ni gitim matek mondo giti gi parogo e tij lendo e dweno. Kae to ka dweno orumo, Chokruok mar Tijwa biro bedo gi migawo ma miyowa thuolo mar wuoyo kuom ber ma waseyudo kuom tiyo gi parogo. E dweni, sulano wuoyo kuom kaka wanyalo ndiko weche moko e wi joma oyie winjo wach ma walandonegi.

Gimomiyo Onego Wandik Weche Moko e Wi Joma Oyie Winjo Wach: Mondo watim tije duto momiwa, lendo kende ok oromo. Nyaka wadog walim joma owinjo wach ma walandonegi mondo wamed puonjogi. Sama watimo kamano, wachalo joma dok olo pi ne kodhi mag adiera ma ne wasechwoyo. (Math. 28:19, 20; 1 Kor. 3:6-9) Mano dwaro ni wadog wamany jogo, wago kodgi mbaka kuom gik ma owinjore kodgi, kendo wamed leronegi weche ma ne wawacho e limbe mokalo. Kuom mano, ka wayudo joma oyie winjowa, ber mondo wandik weche moko kuomgi manyalo konyowa ka wadok limogi.