Ng’at ma Jachir

NE ANE kaka ji jaro ng’at manie pichano. Be ing’eyo ni en ng’a? Mani en Jeremia. En janabi maduong’ ahinya mar Nyasaye.

Bang’ Ruoth Josia chako ketho nyiseche mopa a e piny, Jehova nyiso Jeremia mondo obed janabi mare. Jeremia to paro ni podi otin ahinya ma ok onyal bedo janabi. Kata kamano, Jehova wacho ni obiro konye.

Jeremia nyiso Jo-Israel ni mondo giwe timo timbe maricho. Owachonegi ni, ‘Nyiseche ma ogendini mamoko lamo gin nyiseche manono.’ Kata kamano, ng’eny Jo-Israel neno ni ber mondo gilam nyiseche mopa moloyo lamo Jehova Nyasaye madier. Ka Jeremia nyiso ji ni Nyasaye biro kumogi nikech timbegi maricho, gin ginyiere anyiera.

Higini kalo. Josia tho, kendo dweche adek bang’e, wuode ma Jehoyakim bedo ruoth. Jeremia siko ka nyiso ji ni: ‘Jerusalem ibiro kethi ka ok unyal weyo yoreu maricho.’ Jodolo mako Jeremia kendo gikok ni: ‘Owinjore onegi nikech weche miwachogi.’ Bang’e, jodolo wacho ni ruodhi mag Israel: ‘Jeremia nyaka negi, nikech osewuoyo marach e wi pinywa.’

Ang’o ma Jeremia biro timo koro? Ok oluor! Onyiso jogo duto ni: ‘Jehova noora mondo anyisu gigi. Ka ok unyal loko yoreu mag dak marichogi, Jehova biro ketho Jerusalem. To ng’euru wachni maler: Ka unega, to unego ng’at ma ok oketho gimoro.’

Ruodhi-gi weyo Jeremia mondo obed mangima, kata kamano Jo-Israel ok lok timbegi maricho. Bang’e, Nebukadnezzar ruodh Babulon, biro kendo okedo gi Jerusalem. Gikone, Nebukadnezzar timo Jo-Israel wasumbini mage. Okawo ji mang’eny kuomgi, kendo oterogi Babulon. Par ane kaka inyalo winjo, ka joma ok ing’eyo obiro kendo ogoli dalau nyaka e piny ma ok ing’eyo!