Chokruog-Distrikt mar Joneno mag Jehova, “Mfuateni Kristo!” Higa 2007
1, 2. (a) Musa ne ojiwo Jo-Israel nade mondo giyud kony kuom chokruok kanyachiel? (b) Gin ikruok mage monego wachak timo sani?
1 Musa ne ochiko Jo-Israel duto kaachiel gi welo ma ne odak e kindgi ni gichokre kanyachiel bang’ higini abiriyo ka higini abiriyo mondo osomnegi Chik. Nikech ang’o? “Mondo giwinji, kendo mondo gipuonjre.” (Rapar 31:10-12) Jehova ne oneno ni ber mondo ochok joge kanyachiel e grube madongo dongo. E kinde mabiro machiegni, oganda Jehova biro romo kendo e Chokruog-Distrikt mar ndalo adek ma wiye nobed “Mfuateni Kristo!”
2 Be isechako timo ikruok? Be dwarore ni ikwa thuolo kar tich? Be inyalo konyo jogo mipuonjrigo kata joodi ma ok gin Jokristo mondo omi gidhi kodi e chokruogno mar distrikt? Be nitie jomoko e kanyakla madwaro kony mar chopo e chokruogno? Be ichano dhi e chokruok mopogore gi mano ma oyangi ne kanyaklau? Be ibiro dwaro kar nindo? Weche maluwogi biro konyi timo ikruok.
3. (a) En wach mane ma ne okor e Isaiah 25:6 ma chopo kindegi? (b) En ang’o ma osenenore kaluwore gi kwan mar ji ma bedo e chokruog-distrikt Tich Abich, to ang’o ma wan wawegi wanyalo timo e wi wachno?
3 Bedie Kuom Odiechienge Adekgo: Jehova pidho oganda joge gi puonj mang’eny mawuok kuom Wachne. (Isa. 25:6) Mani oting’o nyaka nyasi maduong’ mar gago e Wachne ma itimo e chokruogewa mag higa ka higa mag distrikt. Osenenore ni Tich Abich, jo mabiro e chokruogno tin ahinya ka ipimo gi odiechienge mamoko. Ket mondo obed dwaro mari mar bedoe kuom ndalo adekgo duto mag chokruog-distrikt ma riwruok mar oganda Jehova ose ikonwa ma gin kinde ma jiwowa kendo duogo chunywa! Ka dwarore mondo ikwa thuolo kama itiye, ket wachno e lamo. Ka isetimo kamano to ‘tim chir’ iwuo gi ng’at ma ondiki tich mapiyo bang’ ka oselandi tarig chokruog-distrikt. (1 Thes. 2:2; Neh. 2:4, 5) Nyalo konyo ka inyalo nyise ni chokruog-distrikt ma wadhiye higa ka higa otudore achiel kachiel gi lamo mari. Timo kamano chon miyo bedo mayot ne ng’at ma ondiki timo chenro madwarore kar tich mondo iyud thuolo mar dhi.
4. Wanyalo iko nade joma wapuonjrego Muma kod joodwa ma ok gin Joneno ne chokruog-distrikt?
4 Konyo Jogo Mipuonjrigo Muma Kod Joodi Mondo Oikore: Nyalo bedo mor manade ka jogo mipuonjrigo Muma nyalo bedo kodi e chokruog-distrikt mondo gine gi wengegi mor manitie e kindwa kaka oganda mar Jokristo “e chokrwok maduong’”! (Zab. 22:25) Nyisgi kapok odiechieng’no ochopo mondo giket thuolo tenge mar bedoe. Nyisgi gik momiyo in iwuon imor bedo e chokruogego. Inyalo iko jopuonjrego mondo ging’e gik ma gidhi neno ka inyisogi vidio magwa ma nigi piche manyiso chokruog-distrikt mamoko ma ne osetimore, moloyo to vidio mar United by Divine Teaching, ka nitie. Kama vidiogo ok yudore inyalo tiyo gi piche manie ite mar 18 e brosua mar, Mashahidi wa Yehova—Wanafanya Mapenzi ya Mungu kwa Umoja Ulimwenguni Pote. Nyis joodu ma ok gin Joneno bende mondo ong’e chenro ma in-go. Nyalo bedo ni ginyalo chano mondo gine drama kata biro e chokruogno kodi e odiechieng’ moro achiel.
5, 6. (a) Ere kaka wanyalo nyiso chuny mar chiwo ne jomoko ma onyisi e 1 Timotheo 6:18? (b) En chenro mane ma oketi mar konyo jogo manyalo bedo ni dwaro kony mar yudo kar nindo?
5 Konyo Oweteni Koda Nyimineni ma Jokristo: Jaote Paulo ne onyiso Jokristo ma ne nikod mwandu mag ringruok mondo gibed “jo ma timo maber, mondo gibed jomwandu mag timbe mabeyo, gibed mang’won, giyie pogo ni jowetegi gik ma gin go.” (1 Timo. 6:17, 18) Wanyalo nyiso chuny mar chiwruok ma Paulo ne jiwo ka waparo joma hikgi ng’eny, joma ool, jopainia, ute ma nigi janyuol achiel, koda joma moko e kanyakla manyalo bedo ni dwaro kony mondo gibi e chokruogno. Wede ma Jokristo mani e adiera ema nigi ting’ mokwongo mar konyo joggi ma nigi dwaro, kata kamano, jodong kanyakla kaachiel gi joma moko nyalo nyiso ni gineno dwaro ma nitie mondo gichiw kony madwarore.—Gala. 6:10; 1 Timo. 5:4.
6 Ka nitie ng’ato ei kanyakla madwaro kony mar yudo kar nindo, Komiti mar Tij Kanyakla onego ong’i ka be oromo yudo fom mar Ombi la Mahali pa Kulala kwa Wenye Mahitaji ya Pekee.
7. En chenro mane ma oketi ka dipo ni wadwaro dhi e chokruok moro mopogore gi ma kanyakla marwa onego odhiye?
7 Kidwaro Dhi E Chokruog-Distrikt Machielo: Tijwa mar Pinyruoth mar Februar 2007, biro bedo gi tarik mag chokruog-distrikt duto ma ibiro tim Afrika ma Ugwe. Ka dipo ni inyalo dwaro weche mamoko kuom chokruog-distrikt mopogore gi ma kanyaklau onego odhiye, inyalo ndiko ne jogo mochung’ne chokruogno ka itiyo gi nonro ma jagoro mar kanyakla biro nwang’o e tok fom mar Ombi la Mahali pa Kulala kwa Wenye Mahitaji ya Pekee ma sani tiyo. To mondo omi iyud dwoko mar barupi, ne ni ioro bahasa man lilo moketie stamp gi nyingi, koda nonro mari mar posta.
8. En chenro mane monego waluw ka wachano nindo ei hotel?
8 Mako Od Nindo ei Otel: Kapo ni idwaro nindo ei hotel to idwaro mondo Migawo Mochung’ne Kar Nindo okonyi yudo hotel maber e dala taon ma chokruog-distrikt dhi timore, ndik ne Rooming Department chon. Nyis pesa minyalo chulo kuom ng’at achiel odiechieng’ ka odiechieng’. Nyis kabe idwaro nengo moriwo kar nindo kod gago mar okinyi ei otendno, koso nindo kende.
9, 10. (a) Gin chenro mage ma osetim nikech wan kata kapok wachopo kar chokruog-distrikt? (b) Ere kaka wanyalo nyiso ni wapuoyo kendo wadwoko erokamano kuom tije duto ma osetim nikech wan? (Som Jo Hibrania 13:17.)
9 Luw Chenro Moketi: Seche ma wachopo kama idhi timie chokruog-distrikt, wanyalo neno ni osetim tich mang’eny mar iko kanyo. Owete manyiso hera matiyo kaka jorwak welo mosowa, gimiyowa kalatese mag program, kendo gikonyowa yudo kar bet. Owete gi nyimine osetimo ler kendo giseloso kama jogol-twak chung’ie mobedo maber ahinya. Tich maduong’ ma ok nyisre e lela bende osetim kaka iko twege mibiro chiw e program, wuoyo gi weg otende kod gik mamoko mang’eny.
10 E chokruok ka chokruok mar distrikt, ji mang’eny osebedo ka tiyo kuom dweche mondo gitim chenro madwarore, kendo joodgi bende osechiwore kuom miyogi thuolo mar timo tijego madwarore ahinya. Donge wapuoyo chiwruok ma osetim kaka mago mondo omi wayud konyruok wan wawegi? Wanyalo nyiso ni wadwoko erokamano kuom luwo chenro ma inyiso kae koda gi weche mamoko momedore ma wanyalo yudo kapok chokruog-distrikt marwa ochopo. (Hibr. 13:17) Ka ji duto luwo chenro moketi, mano miyo bedo gima nyalore mondo gik moko duto “otimre maber kendo makare.”—1 Kor. 14:40.
11. (a) Ang’o momiyo romo mag oganda Jehova gin gik madwarore ahinya ndalowagi? (b) Ang’o ma ng’ato ka ng’ato kuomwa nyalo timo sani?
11 Kaka ‘waneno ni chieng’no sudo machiegni,’ romo mag oganda Nyasaye gin gik madwarore ahinya. (Hibr. 10:25) E chogruogewa mag distrikt ma Jokristo romoe, jatichno mogen kendo mariek miyowa weche manyalo konyowa ‘timo weche duto’ ma Jehova dwaro ni mondo waluw. (Rapar 31:12) Chak timo chenro gie sani mar bedoe kuom ndalo adek duto mag chogruog-distrikt ma wiye nobed “Mfuateni Kristo!” mondo omi iyud kony kuom puonj duto mag Wach Nyasaye kod mor mar bedo gi Jokristo e chokruok!
[Weche manie ite mar 3]
Seche mag Chokruok
Tich Abich kod Ngeso
3:20 okinyi - 11:05 odhiambo
Jumapil
3:20 okinyi - 10:10 odhiambo