Gocho Makende mar Amkeni! Mibiro Chiwo Novemba!
1 Ji mathoth penjo gi chuny maler kabe en adier ni Muma nyalo konyogi. Gipenjore ni, ka kuom adier dhano ema nondiko Muma, ere kaka diluonge ni Wach Nyasaye? Ang’o giri manyalo miyo agen ni Muma ema mondo ota yorega? Ka asomo kendo puonjra Muma, gin gweth mage ma abiro yudo? To en loko mane mar Muma monego ati godo? Magi gin moko kuom penjo mibiro chiwo dwokogi e gocho makende mar Amkeni! ma Novemba, ma wiye wacho ni “Je, Unaweza Kuitegemea Biblia?”
2 Gombowa en ni wabiro chiwo gocho makendeni mar Amkeni! e okang’ mamalo kendo kuonde mang’eny e alworawa. Kanyalore, riw kanyaklau lwedo e tiyo tij lendo ot ka ot chieng’ Ngeso ka Ngeso e dwe mar Novemba. Nyis gochoni mar Amkeni! ne wedeni, ne joma odak e alworau, jotich weteni, jopuonj, jo skul weteni, koda jogo midok limo. Ting’ gasede moko mag gochoni seche ma idhi ng’iepo kata ka idhi e wuoth. Ibiro med kwan mar gasedni, omiyo kanyakla biro bedo gi kwan moromogi.
3 Chak Puonjruok Muma: Kapok itieko wuoyo gi ng’ato bang’ chiwone gasedni, inyalo tiyo gi weche mabiro konyi chako puonjruok Muma kode ka uromo kendo. Kuom ranyisi, inyalo wachone niya, “Kaduogo, abiro nyisi dwoko ma Muma chiwo kuom penjoni, ‘Ang’o momiyo Nyasaye nochweyo piny?’” Bang’e dog ilime ka in-gi bug Muma Puonjo, kendo inyise ite mag 4-5, kata ipuonjri kode paragraf 1-3 e sula mar 3. Yo machielo en wachone ni, “Kaduogo, abiro mor nyisi wach moro ma Muma nokoro, masani timore.” Ka idok lime, nyise sula mar 9 ei bugno kendo uwuo kuom paragraf 1-3. Kata inyalo mana nyiso wuon ot ni: “Ji mathoth yudo ka ok yot winjo tiend gigo ma gisomo ei Muma. Kaduogo, abiro nyisi kaka inyalo winjo tiend weche manie Muma mari e yo mayot.” Ka ilime kendo, ti gi bug Muma Puonjo, kendo inyise kaka unyalo tiyo gi bugni e puonjruok kode Muma.
4 Muma kende e buk moting’o “Ndiko Maler,” manyalo miyo wabed gi ‘rieko ma kelo warruok.’ (2 Timo. 3:15) Kuom mano, waduto wabiro dwaro ni watim kinda e pogo gocho makendeni mar Amkeni! mondo omi wakony ji ogen Muma!