Kaka Wanyalo Medo Lony e Tij Lendo—Dewo Joma Walendonegi

Gimomiyo Mano Dwarore: Yesu ne dewo ji ahinya kendo ne oikore konyo ng’ato ka ng’ato ka luwore gi chal mare. Kuom ranyisi, chieng’ moro ka ne oromo gi jal moro ma ne ite odino, nodewe ahinya kuom gole kama ji ne ng’enyie kendo tere tenge eka ochange. (Mari. 7:31-35) Nodewo jopuonjrene bende nikech ne ok opuonjogi weche mang’eny ma samoro ne ok ginyal mako duto. (Joh. 16:12) Yesu pod dewo ji kata mana bang’ dok e polo. (2 Tim. 4:17) Nikech wan jolupne, onego waluw ranyisine kuom dewo jomamoko. (1 Pet. 2:21; 1 Joh. 3:16, 18) Wanyalo yudo nyak maber sama wadewo joma wawuoyogo e tij lendo kuom wuoyo kodgi kaluwore gi chalgi, gik ma gihero, kod gik ma nyalo bedo ni chando chunygi. Ka ng’ama walosogo ofwenyo ni wadewe gadier kendo ni ok walime mana mondo wachop ote moro kata ni mondo wawene mana buge, onyalo chikonwa ite maber mi oyie winjowa.

Kaka Wanyalo Timo Mano:

Ikri maber. Sama iwuoyo gi ng’ato, bed thuolo, bwonji, kendo wuo e yor osiep.
Yaw wang’i. Be nitie gimoro amora ma nyiso ni odno nitie nyithindo matindo, ni jalo en ng’ama ohero pur kata pidho le matindo? To be nitie gimoro amora manyiso en jadin moro? Mago gin gik ma nyalo konyi chako mbaka e yo ma biro moro wuon ot.
Penj wuon ot penjo moro kae to ichik iti mos maok ing’ade-ing’ade sama ochiwo pache. Ng’i wuon ot sama uloso kode mondo one ni kare iwinje gadier. Nyis ni iwinjo paro ma ochiwo kendo pwoye gadier ka mano owinjore. Tem ahinya kik imin kode wach.
Bed ng’ama oikore lokore. Kanyalore, lok mbaka mondo iwuo kuom weche machando chuny ng’ato ka ng’ato miromogo. Timo lokruok ok tek nikech gasedewa, brosua, kod trakt ma walendogo wuoyoga kuom weche mopogore opogore. Kapo ni ifwenyo ni ilimo ng’ato sama ok owinjore kode kata okoni ni odich, kik ikaw thuolone mang’eny.

Tem Timo Mae e Dweni:

Tiegreuru e lamo mar joot, kata utiegru sama un e tij lendo ka ua e ot moro kuchomo machielo. E tiegruokuno, unyalo timo ranyisi ma jalendo nyisoe gima onyalo timo kapo ni gima chando chuny wuon ot opogore gi wach ma ne oikore tiyogo e odiechieng’no.
Kinde ka kinde e romo mag dhi lendo, owadwa ma tayo nyalo wuoyo e wi yore ma wanyalo nyisogo ni wadewo joma wawuoyogo, kata onyalo iko ranyisi mitimo ma nyiso mano.