Kaka Wanyalo Medo Lony e Tij Lendo​—Dok Timo Limbe

GIMOMIYO MANO DWARORE: Ji mang’eny ma rwako wach Pinyruoth gin joma dwaro ng’eyo adiera e wi Nyasaye. (Isa 55:6) Mondo wapuonjgi ma gitim dongruok, nyaka wadog limogi nyadinwoya. Nikech gik ma chando ji opogore, omiyo yore ma wakonyogigo mondo giher wach ma wapuonjogi bende biro pogore. Kata kamano, wabiro bedo gi nyak maber ka waikore sama pok wadok limogi kendo ka wachano chon gima wadwaro chopo e limbe ka limbe. Timo mago biro konyowa mondo wachak puonjruok kodgi.

KAKA WANYALO TIMO MANO:

• Tem mondo idog mapiyo, ka nyalore to mana bang’ ndalo matin.​—Mat 13:19

• Wuo gi mor kendo nyis luor. Kik itim gik moko kirikni

• Mose gi ilo sama idonjo. Luonge gi nyinge. Parne gimomiyo iduogo lime. Inyalo nyise ni iduogo dwoko penjo moro ma ne iweyego, ikelone gasedewa manyien, iduogo nyise websaitwa, iduogo tugone vidio moro, kata iduogo nyise kaka wapuonjo ji Muma. Inyalo loko mbaka kapo ni openjo penjo mopogore gi ma ne idhi wuoye kode.​—Fil 2:4

• Ol pi e kodhi mar adiera ma ipidho e chunye kuom somone ndiko moro kendo kanyalore to wene gima onyalo somo. (1Ko 3:6) Mak osiep kode

• Ket mise mar limbe ma luwo