Tiyo gi Weche Momiyi Ne Twak

MUMA pimo kanyakla mar Jokristo gi fuonde mag dend dhano. Moro ka moro kuom fuondego dwarore, kata kamano ‘fuonde duto ok ti tich achiel.’ Nikech mano, dwarore ni watim kinda ahinya e migawo moro amora momiwa. Mano dwaro ni wawinj tiend twak moro amora momiwa kendo wagole maber, kar paro ni wiye moko mit moloyo mamoko. (Rumi 12:4-8) Jatichno mogen kendo mariek nigi ting’ mar pogo chiemb chuny “e kinde makare.” (Math. 24:45) Ka watiyo gi nyalo ma wan-go e iko kendo golo twege ka waluwo kaka migawo chiko, wanyiso ni wariwo lwedo chenro moketno. Mano miyo chenro mag kanyakla odhi maber.

Weche Monego Iket e Twak. Ka omiyi wich monego iwuoye e skul, tem ahinya iwuo kuom wijno to ok wich machielo. Thothne ibi miyi kuonde sie monego itimie nonro. Ka ok omiyi weche sie monego itigo e golo twak, inyalo manyo weche kamoro amora miyiero. Kata kamano, sama iiko twagi, tem ahinya mondo weche duto mag twak osir wich momiyi. Sama iyiero weche monego iket e twagi, dwarore bende ni ipar jowinjoni.

Non adimba weche momiyi, kaachiel gi ndiko manie igi. Kae to par kaka inyalo tiyo gi wechego e yo maber moloyo mondo gikony jowinjo. Yier puonj ariyo kata adek ei weche momiyigo mondo iketgi gibed puonj madongo e twagi. Kamano bende, yier ndiko mibiro somo mayudore e weche momiyi ne twak kendo ilergi.

Onego iti gi weche maromo nade e twagino? Onego iti mana gi weche minyalo tiyogo maber kaka dwarore. Kik iso weche mang’eny e twagi mamiyo ok ipuonj e yo maber. Kapo ni moko kuom weche mag twak momiyi ok chomre ahinya gi gima idwaro chopo e twagi, ti mana gi weche mabiro konyi chopo gima idwaro. Kuom weche momiyi ne twak, ti mana gi weche mabiro puonjo kendo konyo jowinjo moloyo. Gima lonyni puonjo ok en kar romb weche minyalo wuoyo kuomgi e twak, to en kaka inyalo tiyo gi weche momiyi obedni mise mar gero twagi.

Golo twak ok en mana keto weche momiyi ne twak e yo machuok. Onego ichan kaka ibiro lero puonj moko, kaka ibiro wuoyo momedore kuomgi, kaka ibiro lerogi kitiyo gi ranyisi, to kanyalore, inyis kaka inyalo ti kodgi. Kar wilo weche momiyi ne twak gi weche maoko, ti gi weche maokogo mondo okonyi gero puonj madongo manie twak.

Owete mosebedo gi lony mar puonjo, inyalo mi migepe e Chokruok mar Tijwa. Ging’eyo ber mar tiyo gi weche momigi ne twak kar wilogi gi weche maoko. Kamano bende, owete magolo twege mag ji duto imiyo kalatas moting’o weche matayo twak mondo giluw. Wechego miyogi thuolo mar timo lokruok e twak, kata kamano, wechego nyiso maler puonj madongo monego oger, weche monego otigo e siro puonjgo, kaachiel gi ndiko matiyo kaka mise mag twagno. Ng’eyo kaka inyalo puonjo kitiyo gi weche momiyi ne twak konyo ahinya e iko ng’ato ne migepe mamoko mag puonjo.

Tiegruok e lonyni bende nyalo konyi puonjruok Muma gi ji e yo mabiro miyo gitim dongruok e winjruokgi gi Nyasaye. Ibiro puonjori jiwo weche mag sula ma upuonjoru kar jiwo gik mamoko ma kata obedo ni mit to ok kony japuonjre ng’eyo tiend wach ma uwuoyoeno. Kata kamano, king’eyo gima lonyni dwaro chopo, ok ibi makori amaka gi kama upuonjoruno e yo mamoni medo lero weche mamoko manyalo konyo japuonjre.