Hrehawm Tawrhna Tâwp Hun A Hnai!

SAWRKAR ṬHA RORELNA

“Vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang.” —Daniela 2:44.

Pathian Ram chu vân sawrkâr a ni a. Chuta Rorêltu tûra thlan Isua Krista chuan mi zawng zawng chungah ro a rêl ang a, Pathian duhzâwng chu vânah mai ni lovin, leiah pawh a tihtîr dâwn a ni. (Matthaia 6:9, 10) He sawrkâr hi mihring sawrkâr engmahin a thlâk lo vang, ‘kan Lalpa leh Chhandamtu chatuan ram’ a nih dâwn avângin. Remna tluantling a awm ngei dâwn a ni.—2 Petera 1:11.

SAKHAW DIK LO A AWM TAWH LO VANG

“Setana meuh pawh êng tirhkohvah a insiam chawp si ṭhîn a. Chuvângin a rawngbâwltute pawh chu felna rawngbâwltuah insiam chawp mah sela thil mak a ni lo ve; chûngho tâwpna chu an thiltih ang zêlin a ni ang.” —2 Korinth 11:14, 15.

Sakhaw dik lo chu Diabola thiltih a ni tih laihlan a ni ang a, lei ata nuaibo a ni ang. Sakhaw pâwl âtchilhna leh thisen chhuahna chu a bo vek tawh ang. Hei hian “Pathian nung leh dik tak” hmangaihtute tân “rinna hmunkhat” leh “thlarau leh thutaka” amah biak theihna hun a pe ang. Remna leh inpumkhatna ṭha a va ni dâwn êm!—1 Thessalonika 1:9, 10; Ephesi 4:5; Johana 4:23, New World Translation.

MIHRING ṬHAT FAMKIM LOHNA A BO TAWH ANG

“Pathian ngei chu an hnênah a awm ang . . . An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”—Thu Puan 21:3, 4.

Pathian Jehova chuan khawvêl mihringte tâna a nun petu a Fapa, Isua hmangin hêngte hi a thlen famkimtîr ang a. (Johana 3:16) Isua kaihhruaina hnuaiah, mihringte chu ṭha famkima siam an ni ang. ‘Pathian ngei chu an hnênah a awm’ tawh dâwn a, “an mit ata mittui zawng zawng” a hrûkfai dâwn avângin hrehawm tawrhna a awm tawh lo vang. Mihring ṭhat famkim lohna leh hrehawm tawrhnate chu “thil hmasate” a ni thuai ang a, “mi felte chuan ram hi an luah ang a, a chhûngah hian kumkhuain an awm ang.”—Sâm 37:29.

THLARAU SUAKSUALHOTE AN AWM TAWH LO VANG

“Drakon, rûlpui tar chu (chu chu Diabola leh Setana a ni) [Isua Krista chuan] a man a, kum sângkhat atân a phuar a, leilâwtah chuan a paih lût a, a khâr khum a, kum sângkhat chu a vei hma loh chuan hnam tin a bum leh tawh lohna tûrin a châr hnan ta a.”—Thu Puan 20:2, 3.

Setana leh a ramhuaite chu ‘leilawta’ paih, a nih loh leh engmah ti thei lova siam an nih hun chuan an thununna zawng zawng chu a bo vek tawh ang a. Anni chuan mihringte chungah thununna ṭha lo an lek tawh lo vang. Setana leh a ramhuaite thununna laka fihlîm khawvêla nun chu a va thawventhlâk dâwn êm!

‘NI HNUHNUNG’ CHU A KIN TAWH ANG

‘Ni hnuhnûng’ chu Isua’n “hrehawm nasa tak” a tihah chuan a tâwp ang. Heti hian a sawi a ni: “Chu mi hunah chuan hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang,” tiin.—Matthaia 24:21.

Chu hrehawmna a nasa dâwn tih awmzia chu tûn hmaa thleng ngai lo chhiatnate a thleng dâwn tihna a ni. Chu chu Armageddon tia hriat lâr tak, ‘Pathian Engkimtitheia ni ropuia indonaah’ a vâwrtâwp a thleng ang.—Thu Puan 16:14, 16.

Dikna ngainatu khawvêl hmun tina mite chuan he kal hmang tâwpna chu an nghâkhlel hle. Pathian Rama malsâwmna an dawn tûr ṭhenkhat chu han en ta ila.

PATHIANIN HEI AIA TAM A TI DAWN!

“Mipui tam tak” chu remna khawvêl tharah an dam khawchhuak ang: Pathian thu chuan a zât bituk loh “mipui tam tak” chu ‘hrehawm nasa tak ata an chhuak’ ang a, khawvêl tharah nungdamin an lût dâwn tih a sawi. (Thu Puan 7:9, 10, 14; 2 Petera 3:13) Anni chuan chhandam an nihna chu Isua Krista, “Pathian Berâm No, khawvêl sual kalpuitu” vâng niin an sawi ang.—Johana 1:29.

Pathian zirtîrna chu nasa taka hlâwkpui a ni ang: Khawvêl tharah chuan, “leilung hi LALPA hriatnain a khat zo vêk dâwn a ni.” (Isaia 11:9) He zirtîrnaah hian mi zawng zawngte nêna inrem taka nun dân leh chhehvêl boruak mila nun dân chungchânga kaihhruaina a tel ang. Pathian chuan heti hian min tiam a ni: “Kei hi LALPA in Pathian, in ṭhatna tûra nangmahni zirtîrtu, in kalna tûr kawnga hruaitu che u chu ka ni,” tiin.—Isaia 48:17.

Kan hmangaih thi tawhte chu thlân ata an lo tho leh ang: Leia a awm laiin Isua chuan a ṭhian Lazara chu thihna ata a kaitho va. (Johana 11:1, 5, 38-44) Chutiang chuan Pathian Ram ruahmanna hnuaia ropui zâwka a tih famkim tûrte chu a târ lang a ni.—Johana 5:28, 29.

Remna leh felna chu chatuanin a dingchang tawh ang: Krista rorêlna hnuaiah chuan, dân bawhchhiatnate chu thil hmasate a ni tawh ang. Chu chu engtin nge kan hriat theih? A chhan chu, Isua’n mihring rilru a hre thei a, mi fel leh mi suaksualte chungah ro a rêl dâwn vâng a ni. An kawng sual hawisan duh lotute chu Pathian khawvêl thara an nun phal a ni ve lo vang.—Sâm 37:9, 10; Isaia 11:3, 4; 65:20; Matthaia 9:4.

Tûna kan hmuh tâkte hi hun ropui tak lo thleng tûr Bible hrilh lâwknate zînga ṭhenkhat chauh a ni a. Pathian Ramin he leia ro a rêl hun chuan, “remna” chu chatuanin a dingchang tawh ang a. (Sâm 37:11, 29) Mihringte tihrehawmtu natna leh hrehawm tawrhna awmtîrtu zawng zawng chu tihbo hlen a ni ang. He mi chungchângah hian Pathian thutiam kan nei a ni: “Ngai teh, thil engkim ka siam thar e. . . . Ziak rawh, hêng thu hi a rinawmin a dik si a,” tih hi.—Thu Puan 21:5.