Hriatrengna Chungchâng Puanchhuahna Campaign Chu March 17-ah Ṭan A Ni Ang
1. March 17 hian eng campaign nge neih ṭan ni dâwn?
1 Kum tina neih Hriatrengna hun serh chuan Isua thihna a puang chhuak a. (1 Kor. 11:26) Chuvângin, mi dangte chu min rawn hmanpui tûr leh Jehova thilpêk duhawm tak, tlanna chungchâng rawn ngaithla tûrin kan duh a ni. (Joh. 3:16) Kumin hian, Hriatrengnaa lo tel tûra mite sâwmna campaign chu March 17, Inrinni-ah kan nei ṭan ang. A tam thei ang bera tel chu i tum em?
2. Sâwmna pe chhuak tûrin eng nge kan sawi theih a, mahse, eng hunah nge fîmkhur a ngaih?
2 Kan Sawi Theih Chu: Tawifel taka thusawi chu a ṭha ber a. Heti hian kan sawi thei ang: “Chibai. In chhûngkaw tân April 5-a khawvêl puma neih tûr hun serh pawimawh taka lo tel tûra sâwmna pêk che u kan duh a. Isua thihnain a hlen chhuahte leh tûna a thiltihte chungchâng Bible ṭanchhan thusawi chu man chawi lova ngaihthlâk theih a ni ang. He sâwmna lehkha hian inkhâwmna hmun leh hun tûr a târ lang a ni,” tiin. In neitu chu Kristian a nih loh chuan, sâwmna i pêk chhuah hmain a dawn duh leh duh loh i chian phawt tûr a ni. Chawlhkâr tâwpa sâwmna kan sem chuan, a remchân hunah magazine pawh kan pe tel tûr a ni.
3. Engtin nge mi a tam thei ang bera kan sâwm ang?
3 Mi A Tam Thei Ang Ber Sâwm Rawh: Kan tum chu mi a tam thei ang bera sâwm a ni a. Chuvângin, i Bible zirpui te, tlawhkîr te, chhûngkhat te, hnathawhpui te, school kalpui te, ṭhenawm te, leh hmêlhriat dangte chu sâwm hmaih suh ang che. In thu hrilhna bial tlawh chhuak tûrin tualchhûng upate chuan bial chhûng dinhmun ngaihtuah tel chungin ruahmanna an siam ang. Hriatrengnaa lo tel tûra mite kum tina sâwmna campaign chuan rah ṭha a chhuah a ni. Ni kum khân, inkhâwmna hmuna hmeichhe pakhat a rawn luh chuan inkhâwm enkawltute chuan a sâwmtu thuchhuahtu zawnpui an tum a. Mahse, chu nu chuan a sâwmtu a hriat loh thu leh chu mi nîa in tina kal tuemaw hnên aṭanga a dawn thu a hrilh a ni.
4. Campaign-a taihmâk chhuah chhan tûr eng nge kan neih?
4 Hriatrengnaah chuan i sâwmna hnutchhiah avânga lo tel pawh an awm mai thei a. Miin an chhâng lêt emaw, lêt lo emaw pawh ni se, taihmâk i chhuahna chuan thu a hriattîr dâwn tho a ni. I sâwmna pêk chhuah chuan Isua chu tûnah Lal thiltithei tak a nih thu a puang chhuak dâwn a. Ṭhahnemngai taka i telna chuan bial chhûnga mite, i ṭhian thuchhuahtute, leh a pawimawh ber Jehova mithmuhah tlanna thilpêk i hlut nasatzia a târ lang dâwn a ni.—Kol. 3:15.