Nga koannda tsojmi saʼnda nga jaʼai Jtsínʼio

Jñá jaʼaini ngʼajmi kʼoa kao Sonʼnde. Jókoanni kisʼenda Tsʼuí, Sá, niño kʼoa kao ngayeje tsojmi xi tjín i̱ Sonʼnde. Ya Biblia tsoya kixiná kʼianga kʼoatso nga Niná kisinda ngayeje. Kuinga je xo̱nná kui títjon bʼéyanajmí jotso Biblia jokoanni kisʼenda tsojmi xi tjín.

Bakóyaná nga je xi títjon kisinda Niná je chjota xi kʼoatikjoan jokji je nga espíritu. Ánkjení. Kʼoa je Sonʼnde kui xá koanndani nga chjota koatio joni tsañá. Kuinga jngo xʼin kʼoa jngo chjoón kisindasíni Niná xi Adán kʼoa Eva tsakʼin kʼoa ya kisikatío jngo ʼndenaxó xi naskánachon. Tonga likui kisitjosonle Niná kʼoa kisicha je kjoanda xi kisʼele nga koa̱n koatiokon ngantsjai.

Saʼnda nga koannda Adán ʼnda nga jaʼai Jtsínʼio jngo jmi kaoni jaon siento kao ñachan xjaʼaonjngo nó bichóni. Nó xotjín nʼio nkjín chjota tsʼen tsakatio. Ya ngʼajmi je tsakatio chjota xi espíritu, je Satanás kʼoa kao ánkje tsʼenle. I̱ Sonʼnde, tsakʼejna Caín kʼoa kao xi kjaʼaisa chjota tsʼen, kʼoa tsakatio je chjota xi nʼio tse nganʼio kisʼele. Tonga kʼoati tsakatio chjota xi ndʼé koan joni tsa... Abel, Enoc, kʼoa kao Noé. Je XI TÍTJON kʼoétsʼiakoa kui chótʼaya tʼatsʼe chjota jebi kʼoa jme xi koan.