JÓSʼIAAN NGA TSÍN XÍNGIAA KOA̱NJTICHAA

1 | Ali Chjotajin Chjaʼajin

Je Biblia itso:

“Niná tongóson fikao ngatsʼi. Tojñani sonʼnde, je xi tsokjónke Niná, xi sʼín xi kjoakixi, Niná tjaokení” (HECHOS 10:34, 35).

Xi tsoyanile:

Je Jeobáa alikui kui fini jñani tsaan, jña kitjenñá, josʼin tsen yaoná kʼoa josʼin nganá. Tosaa kui kuenta sʼín josʼin nikjaʼaitsjeen kao jotjío tokoán, nga̱ kui xi ngisa chjíle. Je Biblia itso: “Je chjota tokui kotsenle jmeni xi beni xko̱n; tonga je Jeobá kui kotsenle jotjín je ni̱ma̱le chjota” (1 Samuel 16:7).

Kʼoatʼiain jebi:

Ningalani tsín ʼyaa jotjío ni̱ma̱le chjota, koaan kʼoasʼiaan josʼín je Jeobá nga tsín ʼya xi bʼasjengi. Tongóson sʼin jchatokuin chjota. Tsa chʼaosʼin nikjaʼaitsjain tʼatsʼe xi kjaʼaí chjota, tobʼelañá, jñani kitjenni kʼoa jñani tsʼe, tijélai Niná nga katabasenkaoli nga tsín ʼya xi chʼa̱sjengi kʼoa nga tsín tikʼoasʼin si̱kjaʼaitsjenni (Salmo 139:23, 24). Ali jaojin bʼai tokuin nga je koasenkaoli (1 Pedro 3:12).

a Jeobá ʼmi jaʼaínle Niná (Salmo 83:18).

“Nisañandiajinla nda fikoa jngo chjota xi chikon kji […]. Tonga ndʼaibi yaa tijnajinle je xi ñaki ndsʼe̱ fáo xi tjío jngo tjíjtsa Sonʼnde” (TITUS).

Jotso kʼa chjota (TITUS)

Alikui tiʼya xi koanjtikeni

Je Titus yaa tsakʼejnajinle je chjota xi nʼio tsʼen, kʼoa nʼio jtike koan je kjoatéxoma xi tsakʼasje je chjota nga tʼaxin kinikatíole xínkjín je xi kjaʼaí kjaʼaísʼin tsen yaole. Je Titus itso: “Yaa tsangínjin ya ʼnde jñani tsín nda ʼyatokon je chjota xi jma sʼin tsen yaole, jolani ya hotel kao ya jñani ʼbi je chjota kʼoa tokui xá bichonijin nga bixkainjin”. Je Titus kʼoatso nga kui nʼio kisikinjele je kjoajticha. Itsosa: “Kʼianga chobatijin, an títjon bʼele ninga xʼin kʼoa ninga chjoón”.

Kʼianga jekiskotʼaya Biblia je Titus kao testigole Jeobá, kisikʼantjaiyaa yaole. Nʼio tsakasenkao nga Biblia tsakʼéxkia. Tonga je xi kichokajin ni̱ma̱le kuinga i̱ tso Biblia tʼatsʼe nichxin xi nroa: “Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male” (Apocalipsis 21: 3, 4).

Nga títjon nʼio ñʼai koanle nga kisikʼantjaiya yaole. Itso: “Nʼio ñʼai koanna nga kisikʼantjaiya josʼin sikjaʼaitsjen kao jmeni xi kisʼian”. Tonga nʼio tsakasenkao jmeni xi tso Hechos 10:34, 35, nga kʼoatso nga tsín ʼya xi faʼájin Niná.

Jósʼin kichomani nga kʼoakisʼin. Je Titus itso: “Kʼianga tsaʼbe jokji tsjoake xínkjín je testigole Jeobá ninga xinxin kitjenni kʼoa ninga kjaʼaí kjaʼaísʼin tsen yaole, ñaki kisʼejngo tokoan nga kui je religión xi kixi. Nga kje fisʼe̱nngindájian, jngo testigole Jeobá xi chikon kji kʼoakitsona nga ya ndʼiale kjuíkakje̱n. Ñaki tokʼoakoanna, nga̱ nisañandiajinla nda fikoa jngo chjota xi chikon kji kʼoa nisañandiajinla ya ndʼiale fikjenkoa. Tonga ndʼaibi yaa tijnajinle je xi ñaki ndsʼe̱ fáo xi tjío jngo tjíjtsa Sonʼnde”.