¿Jëjpˈamëdaa ndukniˈˈijxëmë uˈunk ënäˈk mä pënën Dios?

“Mä relijyonk yëˈëyë nyajtukniˈˈijxëm parë nayˈaxëkˈijxëm nixim niyam, per kyaj parë nnaytsyojkëm.” (JONATHAN SWIFT, ESCRITOR IRLANDÉS)

DUˈUN ojts yajkujayë mä siiglë 18 ets tyam duˈunyëmë jäˈäy wyinmaytyë. Ta näägë paˈis mä jäˈäy jyënäˈändë ko tääk teety kyaj tmëdattë madakënë parë yˈuˈunk yˈënäˈk ttukmëtmaytyäˈäktët mä pënën Dios. Yëˈëjëty jyënäˈändë ko ja ënäˈkuˈunk diˈib yaˈktëp mä tuˈugë familyë diˈib tyukˈijtëdëbë relijyonk kyaj mbäät këˈëm twinˈixtë ti tyunandëp.

¿Wiˈix mˈokwinmay? Extëm yä abatkëˈëy yajnigajpxy, ¿diˈibëdaa oybyëtsëëmp?

● Kyaj tääk teety pyäädëdë parë yˈuˈunk yˈënäˈk ttukmëtmaytyäˈäktët mä pënën Dios.

● Oyxyëp ko tukmëtmaytyäˈäktë yˈuˈunk ënäˈk ja relijyonk ko nety të yaˈknëdë.

● Mientrës ja uˈunk ënäˈk mutsknëm, tsojkëp ja tääk teety ttukniˈˈixëdët tijaty myëbëjktëp, per ko nety të yaˈknëdë, ta tˈanëëmëdët parë këˈëm tˈixtët pën tëyˈäjtën.

● Ja uˈunk ënäˈk yëˈë mbäät tmëbëktë diˈibë tyääk tyeety të tyukniˈˈixëdë ets kyaj dyajtëwdët pën tëyˈäjtën o kyaj.

¿Yˈaxëktuumbyë relijyongë ënäˈkuˈunk?

Nituˈugë uˈunkteety diˈib oyjyaˈay tkaˈˈaxëktunëdë yˈuˈunk. Per ¿nanduˈundaa jyënäˈändë ëxpekyjyaˈay ko kyaj mbäädë ënäˈkuˈunk yajtukniˈˈixëdë relijyonk? Tamë tiempë nyëjkxnë mä tˈëxpëjkpëtsëmdë wiˈixë ënäˈkuˈunk tyëgatsyë jyukyˈäjtën ko ttukˈitëdë ja relijyonk diˈibë tyääk tyeety tyukˈijtëdëp. Ets ¿wiˈix të tˈëxpëjkpëtsëmdë?

Pes, të tˈëxpëjkpëtsëmdë ko ënäˈkuˈunk ttukˈitëdë tuˈugë relijyonk niˈigyë pyudëkëdë mä yaak pyattë ets kyaj yˈaxëktunëdë. Extëmë tyäˈädë rebistë diˈib pëtsëëm 2008 Social Science Research ojts jyënaˈany: “Të yaˈixy ko relijyonk pyudëjkëp ja uˈunk ënäˈk parë tuˈugyë yˈittët mëdë tyääk tyeety”.a Tyäˈädë rebistë yˈakjënany: “Diˈib mas jëjpˈam mä tuˈugë jäˈäyë jyukyˈäjtën ets ja relijyonk, nan yëˈë diˈib jëjpˈam mä ja ënäˈkuˈungë jyukyˈäjtën, ets yëˈë diˈib pudëjkëdëp parë oy yˈittët mëdë fyamilyë”. Etsë tyäˈädë tuˈugyëbëˈë mët diˈibë Jesus ojts tnigajpxy: “Niˈigyë jyotkujkëty diˈibë myëdoodëp extëm ja Dios jyënaˈany es myëmëdoodëp” (Lukʉs 11:28).

¿Ets ko net jyënäˈändë ko jaanëm ko yaaktët ja uˈunk ënäˈk yajtukmëtmaytyäˈägëdë relijyonk? Ko duˈun jyënäˈändë kyaj tjamyatstë ko ënäˈkuˈunk uˈunknëmë jyot wyinmäˈäny ets pojënë tijaty kyuwëˈëmëdë. Pääty majtsk peky jyaˈˈaty ti mbäät ja tääk teety ttundë, ttukniˈˈixëdët ja oybyë nëˈë tuˈu o tnaˈixtët parë wiinkpë jyot wyinmäˈäny etsë jyot kyorasoon yajtuktujkxëdët mëdë tyukniˈˈijxënë.

¿Wiˈixëdaa mbäät yajtuny?

Nuˈun kujkë xëë tiempë nyaxy jeˈeyë jäˈäy dyajtundë relijyonk parë nyayˈaxëkˈixëdë. Pääty, parë kyaj yˈadëwëdë yˈayukë Jonathan Swift, diˈib të yajnigajpxy, ¿wiˈixëdaa net mbäät ja tääk teety tpudëkëdë yˈuˈunk yˈënäˈk? ¿Wiˈix mbäät ttukniˈˈixëdë ja oybyë nëˈë tuˈu parë ttsoktët ja myëguˈuktëjk?

Parë tnijawëdët wiˈix mbäät ttundë oy ko tˈixtët wiˈix yaˈˈatsoojëmbityë tyäˈädë tëgëëkpë yajtëˈëwën: 1) ¿Ti mbäät yajtukniˈˈixëdë ënäˈkuˈunk?; 2) ¿pën mbäät tyukniˈˈixëdë?, ets 3) ¿ti mbäät pyudëkëdë parë oy ttukniˈˈixëdët?

[Notë diˈib noky ëxˈääy]