Jotmay diˈib wyinguwäˈkëdëbë toxytyëjk
“Kojëts nˈixy wiˈixë toxytyëjk yajtundë, kyajts nekytsyojkënyëˈaty nyaˈkˈabatët.” ZAHRA (15 JYËMËJT), duˈun yajmaytyaˈaky mä rebistë diˈib Francia, diˈib xyëˈäjtypy GEO.
EXTËMË tyäˈädë kiixy jyënany yëˈë xytyukˈijxëm ti jotmay wyinguwäˈkëdëbë toxytyëjk. Abëtsemy nyaxwinyëdë yajjäämˈix yajnääxˈixtë toxytyëjk etsë toˈoxyˈënäˈkuˈunk o axëëk yajtundë. Min nˈokˈijxëm tuk pëky majtsk pëky.
● Kyaj yajtsoktë mët ko tyoxytyëjkëty. Mä yˈit lyugäärë Asia, niˈigyë jäˈäy tˈuˈunkˈatäˈändë yetyëjk ets kyaj dyuˈunëtyë toxytyëjk. Naciones Unidas ojts tnigajpxy mä jëmëjt 2011, ko jap Asia niˈigyë nyimayëtyë yetyëjk ets ko naa jaa 134 miyongënë toxytyëjk nyiwaanëty, mët ko dyaˈooktë mä kyajnëm myaxuˈunkˈaty, dyaˈooktë mä myutskˈaty o ko muum tnikaˈaktë.
● Kyaj yˈëxpëktë mä eskuelë. Kujkwaˈkxy nyaxyë toxytyëjk abëtsemy nyaxwinyëdë ja jeˈeyë të yˈëxpëktë mä eskuelë naa taxk jëmëjtën.
● Axëktuunëdëbë yetyëjk. Ja 2,600 miyongë toxytyëjk diˈib tsënääytyëp mä paˈis mä kyaj kyuboky ko yetyëjk tˈaguanëˈatyë nyëdoˈoxy.
● Kyaj pën diˈib yajtsoybyatëdëp. Mä paˈis diˈib kyaj nëgoo myëkjäˈäyëty, jaa yˈoogyë toxytyëjk win majtsk minutë diˈib uˈunk mëët o mä yˈuˈunk tpääty mët ko kyaj pën diˈib yajtsoybyatëdëp.
● Kyaj yajnaˈixtë parë tmëdattëdë nyax. Toxytyëjk yëˈë diˈib yaˈijt yajwindëëdëp kujkwaˈkxy nyaxy tijaty jaˈäjtp, per mä mayë lugäär kyaj yajnaˈixtë ets tmëdattëdë nyax o yajtukumaytyët.
¿Tiko toxytyëjk axëëk tyim yajtundë? Yëˈko mä näägë lugäär wiˈixëmë jäˈäy tmëdattë mëbëjkën ets wiˈixëm tijaty ttundë mä ryelijyonk diˈib yajmëjwindëjkëp parë toxytyëjk axëëk yajtunët, axtë jyënäˈändë ko kyaj wyiˈixëty ko duˈun yˈadëˈëtstë. Mä tuˈugë perioodikë diˈib España diˈib xyëˈäjtypy El País jap ojts tnigajpxy wiˈix jyënanyë Amelia Valcárcel, diˈib tuump catedrática de Filosofía Moral ets Política: “Kyaj yaˈixyˈaty nituˈugë relijyonk diˈib kyaj pën tjäämˈix tnääxˈixtët”. Ets ta yˈakjënany: “Nituˈugë relijyonk kyajaˈˈaty mä yajmoˈoyëdë toxytyëjk ja madakën parë këˈëm tijaty ttunët”.
¿Nanduˈun mijts mwinmay? ¿Waˈandaa Biiblyë yëˈëjëty jatuˈugë liibrë diˈib kyaj dyajtsobäätyë toxytyëjk? Ta jäˈäy diˈib winmääytyëp ko duˈun, ko tkäjpxtë extëm jyënaˈany tuˈuk majtskë bersikulo. Per ¿wiˈixë Dios diˈib yajjääyë Biiblyë tˈixyë toxytyëjk? Mayë jäˈäy tsipë tyäˈädë tmaytyäˈäktët, per mbäät nnijäˈäwëm wiˈix yaˈˈatsoojëmbity ko nˈijxëm yajxon wiˈixë Biiblyë jyënaˈany.
[Dibujë mä pajina 3]
[Dibujë mä pajina 3]
[Dibujë mä pajina 3]
[Yëˈë të dyakyë dibujë]
© G.M.B. Akash/Panos Pictures