¿Wiˈix xytyukˈoyˈatäˈänyë Diosë yˈAnaˈam Kyutujkën?

Extëm të xyˈixy mä majtskpë artikulo, Jyobaa tyestiigëty jëjpˈam tpëjtäˈäktë Diosë yˈAnaˈam Kyutujkën. Waˈan xyˈoymyëdoy tuˈuk majtskë wandakën diˈib yajminaambyë Diosë yˈAnaˈam Kyutujkën, per waˈan mtsiptakxëty xymyëbëkët ko jantsy tëyˈäjtën.

Oy ko mnaygyuentˈatëdët ets kyaj xymyëbëjktäˈäyët wiˈix myaˈˈanëëmë (Proverbios 14:15). Duˈun ttuundë ja Dios mëduumbëty diˈib Berea.a Ko tmëdoodë tim jawyiin ja oybyë ayuk mä yajnimaytyaˈagyë Diosë yˈAnaˈam Kyutujkën, kyaj netyë tmëbëjktë. Pyayoˈoytyë jawyiin mä Diosë jyaaybyajtën parë tˈijxtë “pën tëyˈäjtën extëm jyënäˈändë” (Apostʉlʉty 17:11). O ja tuk pëky njënäˈänëm, yˈijxkijpxyëdë mëdë Diosë yˈAyuk parë tmëbëjktë ko jantsy tëyˈäjtën.

Jyobaa tyestiigëty mˈanmääyëdëp parë xytyunët extëm ttuundë ja Dios mëduumbëty diˈib mä primer siiglë. Kojëtsë jäˈäy nyaˈëxpëktë namayˈäjtën mëdë Biiblyë mä jyëën tyëjk, mbäät tˈijxkijpxyë pën duˈunë Biiblyë jyënaˈany extëmëts nimaytyäˈäktë Diosë yˈAnaˈam Kyutujkën.

Kyaj yëˈëyë xynyijawëyaˈanyë Diosë yˈAnaˈam Kyutujkën, nanduˈun xynyijawëyaˈany wiˈix yaˈˈatsoojëmbityë tyäˈädë yajtëˈëwën:

• ¿Mä ntsoˈonëm?

• ¿Tiko të nmiˈinëm yä Naxwiiny?

• ¿Tiko Dios tnasˈixë ayoˈon?

• ¿Wiˈix njäjtëm ko nˈoˈkëm?

• ¿Waˈandaa Naxwinyëdë kyutëgoyaˈany?

• ¿Wiˈix mbäädë familyë jyotkujkˈattë?

Per diˈib mas oy, yëˈë ko mëwingonaambyë Dios ko xyˈëxpëkëdë Biiblyë (Santya̱ˈa̱gʉ 4:8). Ko mas niˈigyë xymyëwingonët, ta niˈigyë xynyijawëyaˈany wiˈix xytyukˈoyˈatäˈänyë yˈAnaˈam Kyutujkën, duˈun tyam ets duˈun mä tiempë myiny kyëdaˈaky. Jesus duˈun tˈanmääyë Tyeety: “Tyäˈädë jikyˈäjtën winë xëë winë tiempë, jaˈa yëˈë ko [...] mij, tiˈigyë Dios, mˈixyˈatëdë es xyˈaxäjëdëts ëj extëm ja Kristë es tmëbëktët ko mij xykyajxëts yä naxwiiny” (Fwank 17:3).