Nˈokmëjjäˈäjëm ko Jyobaa të xyjuˈuybyëtsëˈëmëm
1. ¿Tiko njäˈäwgyëdakëm mëjwiin kajaa diˈibë Jyobaa të ttuny?
1 Jyobaa yëˈë yajkypy “tëgekyë oybyë”, per diˈib mas kajaa të ttuny, yëˈë ko ojts xyjuˈuybyëtsëˈëmëm mët yëˈëgyëjxmë yˈUˈunk (Sant. 1:17). Ets kanäk peky ndukˈoyˈäjtëm, extëm ko yajmeˈxyë poky kaytyey (Éfe. 1:7). ¿Këdii mëjwiin kajaa njäˈäwgyëdakëm? Pääty mä tadë xëë poˈo myiny kyëdaˈaky mä yajjamyatsäˈänyë Jesusë yˈoˈkën xëë, oy ko nbawinmäˈäyëm wiˈixë Jyobaa ojts xyjuˈuybyëtsëˈëmëm.
2. ¿Wiˈix mbäät niˈigyë nmëjjäˈäjëm këˈëm ets mëdë familyë ko të nyajjuˈuybyëtsëˈëmëm?
2 ¿Wiˈix mbäät niˈigyë nmëjjäˈäjëm? Marsë 30 äämp ja yajjamyatsäˈänyë Jesusë yˈoˈkën xëë, parë niˈigyë nmëjjäˈäjëm oy ko kontiempë nˈëxpëjkëm mä nDiosˈawdäjtëm mëdë Familyë wiˈix ojts nyajjuˈuybyëtsëˈëmëm. Ngäjxëm nanduˈun jabom jabomë Biiblyë mëdë familyë diˈib yajkäjxp ko tpäätyë Jesusë yˈoˈkën xëë. Nbawinmäˈäyëm niduˈuk niduˈuk wiˈix ndukˈoyˈäjtëm ko të nyajjuˈuybyëtsëˈëmëm, ets wiˈixë net tyam nwinmäˈäyëm mä Jyobaa, mä wiink jäˈäy, mä ëtsäjtëm këˈëm ets mä ja tiempë diˈib miin këdakp. Nan oy ko nˈëˈëdakëmë tadë jembyë ëy diˈib yaˈëwäämp mä Jesusë yˈoˈkën xëë, numero 8 etsë 109 (Sal. 77:12).
3. Nigäjx wiˈix mbäät nmëjjäˈäjëm ko Jyobaa të xyjuˈuybyëtsëˈëmëm.
3 Nˈokˈyaˈijxëm ko nmëjjäˈäjëm. Mëjwiin kajaa nmëjjäˈäjëm ko të nyajjuˈuybyëtsëˈëmëm, pääty nyimaytyäˈägäˈänëmë Jyobaa ets wiˈix yëˈë ojts xytsyojkëm ko tkejxyë yˈUˈunk (Sal. 145:2-7). Näägë familyë tyukniwijtsëdëp parë niduˈuk tyundët prekusoor ausilyaar marsë, abril o mayë, duˈuntsoo dyaˈixëdë ko myëjjäˈädëp diˈibë Jyobaa të ttuny. Per pën kyaj mbäät pën duˈun tyuny, oyxyëp ko nyajtuˈunëm yajxon ja tiempë parë nyajmëjwindëjkëmë Diosë tyuunk (Éfe. 5:16). Pën nmëjjäˈäjëm, ta nanduˈun nbudëjkëmë jäˈäy ets nyëjxtët mä yajjamyatsäˈänyë Jesusë yˈoˈkën xëë (Diˈibʉ Jat. 22:17). Nˈokˈyajkojëm tuˈugë listë parë nwoˈojëm extëm pënaty ogäˈän të nijëmbijtëm, pënaty mëdë Biiblyë nˈëxpëjkëm, pënaty mëët nduˈunëm, jiiky mëguˈuk o mëdëjkpäˈä, duˈuntsoo nëjx mëjwiin kajaa nduˈunëm ko naty yajkoonwaˈxy ja neky mä jäˈäy yajwowäˈäny.
4. ¿Wiˈix mbäät nyajtuˈunëm yajxonë tiempë marsë, abril ets mayë?
4 Marsë, abril ets mayë, ja mbäät ndukˈijxëmë Jyobaa ko mëjwiin kajaa nmëjjäˈäjëm ko yëˈë të xyjuˈuybyëtsëˈëmëm. Pääty nˈokˈyajtuˈunëmë tyäˈädë tiempë parë nyaˈijxëm ko njantsy myëjjäˈäjëm diˈib yëˈë të ttuny, ets ko nan nmëjjäˈäjëm tukëˈëyë “jaˈa mëjpë këjaabë Kristo yˈoyˈajt” (Efe. 3:8, Nuevo Testamento de Mazatlán [NTM]).